ରାଜସ୍ଥାନ: ଦେଶର ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼ ଜୁଲାଇ ୨୨ରେ ତାଙ୍କ ପଦରୁ ଇସ୍ତଫା ଦେଇ ଚର୍ଚ୍ଚାରେ ଥିଲେ। ସେ ତାଙ୍କ ଇସ୍ତଫା ପଛରେ ସ୍ବାସ୍ଥ୍ୟଗତ କାରଣ ଦର୍ଶାଇଥିଲେ। ଏବେ ସୂଚନା ମିଳିଛି ଯେ ଜଗଦୀପ ଧନଖଡ ରାଜସ୍ଥାନ ବିଧାନସଭାରେ ପେନସନ ପାଇଁ ଆବେଦନ କରିଛନ୍ତି। ସେ ୧୯୯୩ମସିହାରେ କଂଗ୍ରେସ ଟିକେଟରେ ଆଜମେରର କିଶନଗଡ ବିଧାନସଭା ଆସନରୁ ବିଧାୟକ ଥିଲେ। ତେଣୁ ଏବେ ସେ ପେନସନ ପାଇଁ ଆବେଦନ କରିଛନ୍ତି।
ଜଗଦୀପ ଧନଖଡ଼ ୧୯୮୯-୯୧ ମଧ୍ୟରେ ରାଜସ୍ଥାନର ଝୁନଝୁନ(ଲୋକସଭା ନିର୍ବାଚନମଣ୍ଡଳୀ)ରୁ ୯ମ ଲୋକସଭାରେ ଜନତା ଦଳ ସାଂସଦ ଭାବରେ ନିର୍ବାଚିତ ହୋଇଥିଲେ । ଏହାପରେ ସେ ୧୯୯୩ ମସିହାରେ କିଶନଗଡରୁ ଦଶମ ବିଧାନସଭାର ସଦସ୍ୟ ମଧ୍ୟ ଥିଲେ। ଏହା ସହିତ ଜଗଦୀପ ଚନ୍ଦ୍ରଶେଖରଙ୍କ ସରକାରରେ ସଂସଦୀୟ ବ୍ୟାପାର ମନ୍ତ୍ରୀ ଭାବରେ ମଧ୍ୟ କାର୍ଯ୍ୟ କରିଛନ୍ତି। ୨୦୧୯ ଜୁଲାଇ ୨୦ରେ ତାଙ୍କୁ ପଶ୍ଚିମବଙ୍ଗର ରାଜ୍ୟପାଳ ଭାବରେ ନିଯୁକ୍ତ କରାଯାଇଥିଲା।
ନିୟମ ଅନୁସାରେ ଜଗଦୀପ ଧନଖଡ଼ଙ୍କୁ ରାଜସ୍ଥାନ ବିଧାନସଭାରୁ ପେନସନ ମିଳିବା ଉଚିତ। ଏପରି ପରିସ୍ଥିତିରେ ସେ ପେନସନ ପାଇଁ ଆବେଦନ କରିଛନ୍ତି। ରାଜସ୍ଥାନ ବିଧାନସଭା ବାଚସ୍ପତି ବାସୁଦେବ ଦେବନାନୀ ଧନଖରଙ୍କ ପେନସନ ସମ୍ପର୍କିତ ଆବେଦନକୁ ନିଶ୍ଚିତ କରିଛନ୍ତି ଏବଂ କହିଛନ୍ତି ଯେ ତାଙ୍କ ଆବେଦନ ଉପରେ ପ୍ରକ୍ରିୟା ଚାଲିଛି।
ଧନଖଡ଼ ରାଜସ୍ଥାନ ବିଧାନସଭାରେ ବିଧାୟକ ରହିସାରିଛନ୍ତି। ରାଜସ୍ଥାନରେ ପୂର୍ବତନ ବିଧାୟକମାନଙ୍କୁ ପେନସନ ଭାବରେ ୩୫,୦୦୦ ଟଙ୍କା ମିଳିଥାଏ। ଯଦି ପୂର୍ବତନ ବିଧାୟକଙ୍କ ବୟସ ୭୦ ବର୍ଷରୁ ଅଧିକ ହୁଏ, ତେବେ ତାଙ୍କୁ ୮୦ ବର୍ଷ ବୟସରେ ୨୦% ଏବଂ ୩୦% ଅତିରିକ୍ତ ପେନସନ ମିଳିଥାଏ। ଧନଖଡଙ୍କ ବୟସ ବର୍ତ୍ତମାନ ୭୪ ବର୍ଷ, ତେଣୁ ସେ ୨୦% ଅତିରିକ୍ତ ପେନସନ ସହିତ ପ୍ରାୟ ୪୨,୦୦୦ ଟଙ୍କା ପେନସନ ପାଇବେ।