ଭୁବନେଶ୍ୱର: ଭୁବନେଶ୍ୱରରେ କେନ୍ଦ୍ରୀୟ ବିଦ୍ୟାଳୟରେ ବୋମାମାଡ। ଭୁବନେଶ୍ୱରର ଗଡକଣା ଅଞ୍ଚଳରେ ଥିବା କେନ୍ଦ୍ରୀୟ ବିଦ୍ୟାଳୟ ନମ୍ବର ୩ ନିକଟରେ ଶୁକ୍ରବାର ସକାଳେ ଏକ ବୋମା ମାଡ ହୋଇଛି।
ସୂଚନା ଅନୁଯାୟୀ, ଘଟଣାଟି ସକାଳ ପ୍ରାୟ ୮ଟା ସମୟରେ ଘଟିଥିଲା। ଯେତେବେଳେ ଦୁର୍ବୃତ୍ତମାନେ ବାଇକରେ ଆସି ସ୍କୁଲର ଗେଟ୍ ପାଖରେ କିଛି ଫିଙ୍ଗି ଦେଇଥିଲେ। ଏହାର କିଛି ସମୟ ପରେ ବିସ୍ଫୋରଣ ହୋଇଥିଲା ବେଳେ ସୌଭାଗ୍ୟ ବଶତଃ କୌଣସି କ୍ଷତି ହୋଇନଥିଲା। ଛାତ୍ରଛାତ୍ରୀମାନେ କ୍ଲାସରେ ଥିବା ବେଳେ ଜୋରଦାର ବିସ୍ଫୋରଣ ଶୁଣି ଆତଙ୍କିତ ହୋଇପଡ଼ିଥିଲେ। ବିସ୍ଫୋରଣ ପ୍ରଭାବରେ ଗେଟ୍ ଏବଂ କାନ୍ଥ କ୍ଷତିଗ୍ରସ୍ତ ହୋଇଥିବା ବେଳେ ଏହି ରାସ୍ତାରେ ଲୁହା କଣ୍ଟା ଏବଂ ରଶି ବିଛାଡ଼ି ପଡ଼ିଥିବା ଦେଖିବାକୁ ମିଳିଥିଲା। ତେବେ ଆକ୍ରମଣ ପଛର ଉଦ୍ଦେଶ୍ୟ ଅସ୍ପଷ୍ଟ ରହିଛି।
ମଞ୍ଚେଶ୍ୱର ପୋଲିସ ଏକ ଫୋରେନସିକ୍ ଦଳ ସହିତ ଘଟଣାସ୍ଥଳରେ ପହଞ୍ଚି ତୁରନ୍ତ ଅଞ୍ଚଳକୁ ଘେରାବନ୍ଦୀ କରି ତଦନ୍ତ ଆରମ୍ଭ କରିଛି। ପୋଲିସ ଧାତୁ ସ୍ପ୍ଲିଣ୍ଟର, ଲୁହା କଣ୍ଟା ଏବଂ ବୋମାର ଅନ୍ୟାନ୍ୟ ଅବଶିଷ୍ଟାଂଶ ସଂଗ୍ରହ କରିଛି। ଏହାବ୍ୟତୀତ ଅପରାଧୀମାନଙ୍କୁ ଚିହ୍ନଟ କରିବା ପାଇଁ ନିକଟସ୍ଥ ସିସିଟିଭି ଫୁଟେଜ୍ ଯାଞ୍ଚ କରୁଛି।