ଭୁବନେଶ୍ବର: ବହୁଚର୍ଚ୍ଚିତ ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସ ହତ୍ୟା ମାମଲାର ଖୁବ୍ଶୀଘ୍ର ଖୁଲାସା ହେବ ବୋଲି ରାଜ୍ୟର ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ କହିଛନ୍ତି। ନବ ଦାସଙ୍କ ଝିଅ ଦୀପାଳି ଦାସଙ୍କ ମନ୍ତବ୍ୟକୁ ନେଇ ପ୍ରତିକ୍ରିୟା ଦେଇ ମନ୍ତ୍ରୀ କହିଛନ୍ତି ଯେ ସେ ତାଙ୍କ ବୟାନ ଗଣମାଧ୍ୟମ ମାଧ୍ୟମରେ ଦେଖିଛନ୍ତି।
ମନ୍ତ୍ରୀ କହିଛନ୍ତି, ନବ ଦାସଙ୍କ ପରିବାର ଲୋକଙ୍କ ଉଠାଇଥିବା ସନ୍ଦେହକୁ ଗୁରୁତ୍ୱ ଦେଇ କ୍ରାଇମବ୍ରାଞ୍ଚ ଦ୍ୱାରା ପୁନଃ ତଦନ୍ତ ଆରମ୍ଭ କରାଯାଇଛି। ମାମଲାର ସତ୍ୟତା, ସମ୍ଭାବ୍ୟ ଷଡ଼ଯନ୍ତ୍ର ଏବଂ ଅନ୍ୟ କାହାର ସମ୍ପୃକ୍ତି ରହିଛି କି ନାହିଁ—ସେ ସମ୍ପର୍କରେ ଆମୂଳଚୂଳ ତଦନ୍ତ କରାଯିବ ବୋଲି ସେ ସ୍ପଷ୍ଟ କରିଛନ୍ତି।
ଆଇନ ମନ୍ତ୍ରୀ ଅଭିଯୋଗ କରିଛନ୍ତି ଯେ, ପୂର୍ବତନ ସରକାର ଏହି ମାମଲାର ତଦନ୍ତକୁ ବନ୍ଦ କରିବାକୁ ଚେଷ୍ଟା କରିଥିଲେ। ତେବେ ନବ ଦାସଙ୍କ ପରିବାର ଲୋକେ ମୁଖ୍ୟମନ୍ତ୍ରୀଙ୍କୁ ଭେଟିବା ପରେ ପୁନଃ ଏହି ମାମଲାର ତଦନ୍ତକୁ ଗତି ମିଳିଛି।ମନ୍ତ୍ରୀ କହିଛନ୍ତି ଯେ ରାଜ୍ୟ ସରକାର ସତ୍ୟ ଉଦ୍ଘାଟନ ପାଇଁ ସଂକଳ୍ପବଦ୍ଧ ଓ ଖୁବ୍ଶୀଘ୍ର ନବ ଦାସ ହତ୍ୟାକାଣ୍ଡର ସମ୍ପୂର୍ଣ୍ଣ ଖୁଲାସା ହେବ।