ଭୁବନେଶ୍ଵର: ସସ୍ମିତ ପାତ୍ର ସିଜିମାଳି ଘଟଣାକୁ ଗୁରୁତ୍ୱ ଦେଇ କେନ୍ଦ୍ରୀୟ ଆଦିବାସୀ କଲ୍ୟାଣ ମନ୍ତ୍ରୀ ଜୁଏଲ ଓରାମଙ୍କ ହସ୍ତକ୍ଷେପ ଦାବି କରିଛନ୍ତି। ସେ ଏନେଇ ଏକ ଚିଠି ଲେଖି ଆଦିବାସୀ ଭାଇଭଉଣୀଙ୍କ ଉପରେ ହୋଇଥିବା ଅତ୍ୟାଚାର ପ୍ରତି ତତ୍କାଳ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛନ୍ତି।
ଅଭିଯୋଗ ଅନୁସାରେ, ସିଜିମାଳି ଅଞ୍ଚଳରେ ବକ୍ସାଇଟ ଖଣି ପ୍ରକଳ୍ପକୁ ନେଇ ଆଦିବାସୀମାନେ ବିରୋଧ କରୁଥିବାବେଳେ ପୁଲିସ ପକ୍ଷରୁ ଅତ୍ୟାଚାର ହୋଇଥିବା କୁହାଯାଇଛି। ପୁଲିସ ମାଡରେ ଅନେକ ଆଦିବାସୀ ଆହତ ହୋଇଥିବା ସୂଚନା ମିଳିଛି, ଯାହା ଉଦ୍ବେଗଜନକ ବୋଲି ସସ୍ମିତ ପାତ୍ର କହିଛନ୍ତି। ସେ ଚିଠିରେ ଉଲ୍ଲେଖ କରିଛନ୍ତି ଯେ, ଗ୍ରାମସଭାଗୁଡ଼ିକ ଠିକ୍ ଭାବରେ ହୋଇନଥିଲା ଏବଂ ଆଦିବାସୀମାନଙ୍କ ମତାମତକୁ ଅବହେଳା କରି ବକ୍ସାଇଟ ପ୍ରକଳ୍ପକୁ ଜୋରପୂର୍ବକ ଆଗେଇ ନେବା ଚେଷ୍ଟା ହୋଇଛି। ଏହା ସହିତ ପେସା ଆଇନ (PESA) ଓ ଫରେଷ୍ଟ ରାଇଟସ୍ ଆକ୍ଟର ଉଲଂଘନ ହୋଇଥିବା ଅଭିଯୋଗ ମଧ୍ୟ କରାଯାଇଛି।
ସସ୍ମିତ ପାତ୍ରଙ୍କ କହିବା ଅନୁଯାୟୀ, ଆଦିବାସୀଙ୍କ ମୂଳ ଅଧିକାର, ସମ୍ମାନ ଓ ସୁରକ୍ଷାକୁ ଅବହେଳା କରାଯାଉଛି ଏବଂ ପୁଲିସ ପକ୍ଷପାତିତା ଦେଖାଉଛି। ସେ କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କୁ ଓଡ଼ିଶା ସରକାର ସହ ତୁରନ୍ତ ଆଲୋଚନା କରି ଯଥୋଚିତ ପଦକ୍ଷେପ ନେବାକୁ ଅନୁରୋଧ କରିଛନ୍ତି। ଆଦିବାସୀ ଭାଇଭଉଣୀଙ୍କ ସୁରକ୍ଷା ନିଶ୍ଚିତ କରିବା ସହିତ ଏପରି ଘଟଣା ପୁଣି ନ ଘଟେ ବୋଲି କଡ଼ା ବ୍ୟବସ୍ଥା ନେବା ଆବଶ୍ୟକ ବୋଲି ଦାବି କରାଯାଇଛି।