ପଶ୍ଚିମବଙ୍ଗ: ଶୁଭେନ୍ଦୁ ଅଧିକାରୀଙ୍କ ଘନିଷ୍ଠ ସହଯୋଗୀ ଓ ବ୍ୟକ୍ତିଗତ ସହାୟକ ଚନ୍ଦ୍ରନାଥ ରଥଙ୍କୁ ବୁଧବାର ବିଳମ୍ବିତ ରାତିରେ ଗୁଳି କରି ହତ୍ୟା କରାଯାଇଛି। ମଧ୍ୟମଗ୍ରାମରେ ଘଟିଥିବା ଏହି ଚର୍ଚ୍ଚିତ ହତ୍ୟାକାଣ୍ଡକୁ ପୂରାପୂରି ଯୋଜନାବଦ୍ଧ ଆକ୍ରମଣ ବୋଲି ପୁଲିସ୍ ସନ୍ଦେହ କରୁଛି। ଆକ୍ରମଣରେ ଚନ୍ଦ୍ରନାଥଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ଡ୍ରାଇଭର ଗୁରୁତର ଆହତ ହୋଇଛନ୍ତି।
ପୁଲିସ୍ ଅନୁସାରେ, ଚନ୍ଦ୍ରନାଥ ନିଜ ସ୍କର୍ପିଓରେ ଘରକୁ ଫେରୁଥିବା ସମୟରେ ଗୋଟିଏ ବାଇକ ଓ ସିଲଭର ରଙ୍ଗର ସାଣ୍ଟ୍ରୋ କାର ତାଙ୍କୁ ପିଛା କରୁଥିଲା। ନିଛାଟିଆ ସ୍ଥାନରେ ସାଣ୍ଟ୍ରୋ କାରଟି ତାଙ୍କ ଗାଡ଼ିକୁ ଅଟକାଇ ଦେବା ପରେ ବାଇକରେ ଥିବା ଦୁର୍ବୃତ୍ତମାନେ ନିକଟରୁ ଗୁଳି ଚଳାଇଥିଲେ। ପ୍ରାୟ ୧୦ ରାଉଣ୍ଡ ଫାୟାରିଂ ହୋଇଥିବା ବେଳେ ଚନ୍ଦ୍ରନାଥଙ୍କ ଶରୀରର ବିଭିନ୍ନ ସ୍ଥାନରେ ଗୁଳି ବାଜିଥିଲା। ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲକୁ ନିଆଯାଇଥିଲେ ମଧ୍ୟ ଡାକ୍ତରମାନେ ମୃତ ଘୋଷଣା କରିଥିଲେ। ତାଙ୍କ ଡ୍ରାଇଭରଙ୍କ ଚିକିତ୍ସା ଏସଏସକେଏମ ହସ୍ପିଟାଲରେ ଚାଲିଛି ଓ ତାଙ୍କ ଅବସ୍ଥା ଗୁରୁତର ରହିଛି।