ନୂଆଦିଲ୍ଲୀ:ମାତୃ ଓ ଶିଶୁ ସ୍ୱାସ୍ଥ୍ୟସେବାକୁ ଆହୁରି ସୁଦୃଢ଼ କରିବା ଲକ୍ଷ୍ୟରେ କେନ୍ଦ୍ର ସରକାର ‘ଜନନୀ’ (JANANI – Journey of Antenatal, Natal and Neonatal Integrated Care) ନାମକ ଏକ କ୍ୟୁଆର୍ କୋଡ୍ ସକ୍ଷମ ଡିଜିଟାଲ୍ ସ୍ୱାସ୍ଥ୍ୟ ପ୍ଲାଟଫର୍ମ ଆରମ୍ଭ କରିଛନ୍ତି।
ସରକାରୀ ସୂଚନା ଅନୁଯାୟୀ, ଏହି ପ୍ଲାଟଫର୍ମ ମାଧ୍ୟମରେ ଗର୍ଭାବସ୍ଥାରୁ ଆରମ୍ଭ କରି ପ୍ରସବ, ପ୍ରସବ ପରବର୍ତ୍ତୀ ସେବା, ନବଜାତ ଶିଶୁ ଯତ୍ନ, ଟିକାକରଣ ଓ ପରିବାର ନିୟୋଜନ ପର୍ଯ୍ୟନ୍ତ ସମସ୍ତ ସ୍ୱାସ୍ଥ୍ୟ ସେବାର ଡିଜିଟାଲ୍ ରେକର୍ଡ ରଖାଯିବ। ପୂର୍ବତନ RCH ପୋର୍ଟାଲ୍ର ଉନ୍ନତ ସଂସ୍କରଣ ଭାବେ ତିଆରି ହୋଇଥିବା ଏହି ବ୍ୟବସ୍ଥା ମାତୃ ଓ ଶିଶୁ ସ୍ୱାସ୍ଥ୍ୟ ସେବାକୁ ନିରନ୍ତର ଭାବେ ଟ୍ରାକ୍ କରିବା ସହ ସମୟୋଚିତ ଚିକିତ୍ସା ସୁବିଧା ଯୋଗାଇବ।
‘ଜନନୀ’ ପ୍ଲାଟଫର୍ମରେ କ୍ୟୁଆର୍ ସକ୍ଷମ ଡିଜିଟାଲ୍ ମଦର୍ ଆଣ୍ଡ୍ ଚାଇଲ୍ଡ ହେଲ୍ଥ କାର୍ଡ, ଉଚ୍ଚ-ଜୋଖିମ ଗର୍ଭାବସ୍ଥା ପାଇଁ ସ୍ୱୟଂଚାଳିତ ସତର୍କ ସନ୍ଦେଶ, ରିଅଲ୍ ଟାଇମ୍ ଡ୍ୟାଶବୋର୍ଡ ଓ ଟ୍ରାକିଂ ବ୍ୟବସ୍ଥା ରହିଛି। ଏହାକୁ U-WIN ଓ POSHAN ପରି ଜାତୀୟ ପ୍ଲାଟଫର୍ମ ସହ ସଂଯୋଗ କରାଯାଇଥିବାରୁ ତଥ୍ୟ ଆଦାନ-ପ୍ରଦାନ ଓ ସେବା ସମନ୍ୱୟ ଆହୁରି ସହଜ ହେବ।
ସରକାରଙ୍କ କହିବା ଅନୁଯାୟୀ, ଏପର୍ଯ୍ୟନ୍ତ ‘ଜନନୀ’ ପ୍ଲାଟଫର୍ମରେ ୧.୩୪ କୋଟିରୁ ଅଧିକ ଲାଭାନ୍ବିତଙ୍କ ପଞ୍ଜିକରଣ ହୋଇଥିବା ବେଳେ ୩୦ ଲକ୍ଷରୁ ଅଧିକ ଗର୍ଭବତୀ ମହିଳାଙ୍କ ନାମ ଅନୁମୋନୋଦନ ହୋଇଛି। ସେହିପରି ୩୦ ଲକ୍ଷରୁ ଅଧିକ ଡିଜିଟାଲ୍ MCH କାର୍ଡ ମଧ୍ୟ ସୃଷ୍ଟି କରାଯାଇଛି।