ନ୍ୟୁଜ୍ ବ୍ୟୁରୋ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ପଞ୍ଚରାଷ୍ଟ୍ରୀୟ ଗସ୍ତର ଅନ୍ତିମ ପର୍ଯ୍ୟାୟରେ ନରୱେ ଗସ୍ତ ଶେଷ କରି ମଙ୍ଗଳବାର ଇଟାଲୀ ଅଭିମୁଖେ ଯାତ୍ରା କରିଛନ୍ତି। ଇଟାଲୀ ପ୍ରଧାନମନ୍ତ୍ରୀ ଜର୍ଜିଆ ମେଲୋନିଙ୍କ ନିମନ୍ତ୍ରଣକ୍ରମେ ସେ ରୋମ ଗସ୍ତରେ ଯାଇଛନ୍ତି।
ନରୱେ ଗସ୍ତ ସମୟରେ ମୋଦୀ ଭାରତ ଓ ନର୍ଡିକ ଦେଶମାନଙ୍କ ମଧ୍ୟରେ ସମ୍ପର୍କ ସୁଦୃଢ଼ କରିବା ପାଇଁ ଏକାଧିକ ବୈଠକ କରିଥିଲେ। ସେ ଆଇସଲ୍ୟାଣ୍ଡ ପ୍ରଧାନମନ୍ତ୍ରୀ କ୍ରିଷ୍ଟ୍ରୁନ୍ ଫ୍ରୋଷ୍ଟାଡୋଟିର୍, ଫିନଲ୍ୟାଣ୍ଡ ପ୍ରଧାନମନ୍ତ୍ରୀ ପେଟେରୀ ଓର୍ପୋ ଏବଂ ଡେନମାର୍କ ପ୍ରଧାନମନ୍ତ୍ରୀ ମେଟେ ଫ୍ରେଡେରିକସେନଙ୍କ ସହ ପୃଥକ ଆଲୋଚନା କରିଥିଲେ।
ଏହି ବୈଠକଗୁଡ଼ିକରେ ବାଣିଜ୍ୟ, ବିନିଯୋଗ, ସବୁଜ ଶକ୍ତି, ସ୍ୱଚ୍ଛ ପ୍ରଯୁକ୍ତିବିଦ୍ୟା, ସାମୁଦ୍ରିକ ସହଯୋଗ ଓ ଡିଜିଟାଲ କ୍ଷେତ୍ରରେ ସହଯୋଗ ବଢ଼ାଇବା ଉପରେ ଆଲୋଚନା ହୋଇଥିଲା। ଭାରତ ଓ ନର୍ଡିକ ଦେଶମାନଙ୍କ ମଧ୍ୟରେ ଆଗାମୀ ସହଯୋଗ ପାଇଁ ଏକ ରୂପରେଖ ମଧ୍ୟ ପ୍ରସ୍ତୁତ କରାଯାଇଛି। ଡେନମାର୍କ, ଫିନଲ୍ୟାଣ୍ଡ, ଆଇସଲ୍ୟାଣ୍ଡ, ନରୱେ ଏବଂ ସ୍ୱିଡେନକୁ ନର୍ଡିକ ଦେଶ କୁହାଯାଏ। ଏହି ଦେଶଗୁଡ଼ିକ ସବୁଜ ଶକ୍ତି, ଆଧୁନିକ ପ୍ରଯୁକ୍ତିବିଦ୍ୟା ଓ ସ୍ଥାୟୀ ବିକାଶ କ୍ଷେତ୍ରରେ ବିଶ୍ୱରେ ଅଗ୍ରଣୀ ଭାବେ ପରିଚିତ।