ଭୁବନେଶ୍ବର: ଦୀର୍ଘ ଦିନ ଧରି ଚାଲିଥିବା ସମସ୍ତ କଳ୍ପନାଜଳ୍ପନାର ଅବସାନ ଘଟାଇ ବିଜୁ ଜନତା ଦଳ (ବିଜେଡି)ରେ ସାମିଲ ହୋଇଛନ୍ତି ସୁଜାତା ଆର୍ କାର୍ତ୍ତିକେୟନ। ଗୁରୁବାର ଶଙ୍ଖ ଭବନରେ ଆୟୋଜିତ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ବିଜେଡି ସଭାପତି ନବୀନ ପଟ୍ଟନାୟକଙ୍କ ଉପସ୍ଥିତିରେ ସେ ଦଳରେ ଆନୁଷ୍ଠାନିକ ଭାବେ ଯୋଗ ଦେଇଛନ୍ତି। ଭି.କେ. ପାଣ୍ଡିଆନଙ୍କ ପତ୍ନୀ ସୁଜାତାଙ୍କ ଦଳରେ ଯୋଗଦାନକୁ ନେଇ ଗତ କିଛି ଦିନ ଧରି ରାଜନୈତିକ ମହଳରେ ଚର୍ଚ୍ଚା ଜୋର ଧରିଥିଲା। ଶେଷରେ ସେହି ଚର୍ଚ୍ଚାରେ ପୂର୍ଣ୍ଣଛେଦ ପଡ଼ିଛି। ଶଙ୍ଖ ଭବନରେ ପହଞ୍ଚିବା ପରେ ସୁଜାତାଙ୍କୁ ବିଜେଡିର ବରିଷ୍ଠ ନେତ୍ରୀମାନେ ସ୍ୱାଗତ ଜଣାଇଥିଲେ। ବରିଷ୍ଠ ନେତ୍ରୀ ପ୍ରମିଳା ମଲ୍ଲିକ ଏବଂ ସ୍ନେହାଙ୍ଗିନୀ ଛୁରିଆ ତାଙ୍କୁ ପାଛୋଟି ନେଇ କାର୍ଯ୍ୟକ୍ରମ ସ୍ଥଳକୁ ନେଇଥିଲେ।
ଦଳୀୟ ସୂତ୍ର ଅନୁଯାୟୀ, ସୁଜାତାଙ୍କ ଯୋଗଦାନକୁ ନେଇ ପୂର୍ବରୁ ବିଜେଡିର ବରିଷ୍ଠ ନେତାମାନଙ୍କୁ ଅବଗତ କରାଯାଇଥିଲା। ଏଥିପାଇଁ ଦଳୀୟ ବିଧାୟକ, ସାଂସଦ ଏବଂ ବରିଷ୍ଠ ନେତୃତ୍ୱଙ୍କୁ ଶଙ୍ଖ ଭବନରେ ଉପସ୍ଥିତ ରହିବାକୁ ନିର୍ଦ୍ଦେଶ ଦିଆଯାଇଥିଲା। ସୁଜାତାଙ୍କ ବିଜେଡିରେ ଯୋଗଦାନକୁ ଦଳ ପାଇଁ ଏକ ଗୁରୁତ୍ୱପୂର୍ଣ୍ଣ ଘଟଣା ଭାବେ ଦେଖାଯାଉଥିବାବେଳେ, ଏହା ରାଜ୍ୟ ରାଜନୀତିରେ ମଧ୍ୟ ନୂଆ ଚର୍ଚ୍ଚାର ସୃଷ୍ଟି କରିଛି।