ନୂଆଦିଲ୍ଲୀ: ଭାରତୀୟ ସେନା, ବାୟୁସେନା ଏବଂ ନୌସେନାରେ ଯୋଗ ଦେଇ ଦେଶ ସେବା କରିବାକୁ ଇଚ୍ଛୁକ ଯୁବକମାନଙ୍କ ପାଇଁ ଏକ ବଡ଼ ଖବର ସାମ୍ନାକୁ ଆସିଛି। ଅଗ୍ନିପଥ ଯୋଜନା ଅଧୀନରେ ନିଯୁକ୍ତ ଅଗ୍ନିବୀରମାନଙ୍କ ମଧ୍ୟରୁ ସ୍ଥାୟୀ ନିଯୁକ୍ତି ପାଉଥିବା ସୈନିକଙ୍କ ସଂଖ୍ୟା ବୃଦ୍ଧି କରିବା ପାଇଁ ତିନୋଟି ସଶସ୍ତ୍ର ବାହିନୀ କେନ୍ଦ୍ର ସରକାରଙ୍କୁ ପ୍ରସ୍ତାବ ଦେଇଥିବା ସୂଚନା ମିଳିଛି।
ବର୍ତ୍ତମାନ ବ୍ୟବସ୍ଥା ଅନୁଯାୟୀ, ଚାରି ବର୍ଷର ସେବା ଅବଧି ଶେଷ ହେବା ପରେ କେବଳ ୨୫ ପ୍ରତିଶତ ଅଗ୍ନିବୀରଙ୍କୁ ସ୍ଥାୟୀ ଭାବେ ସେବାରେ ରଖାଯାଉଛି। ତେବେ ନୂତନ ପ୍ରସ୍ତାବ ଅନୁସାରେ ସେନା ଏବଂ ବାୟୁସେନାରେ ଏହି ହାରକୁ ୫୦ ପ୍ରତିଶତକୁ ବୃଦ୍ଧି କରିବା ଏବଂ ନୌସେନାରେ ୭୫ ପ୍ରତିଶତ ପର୍ଯ୍ୟନ୍ତ ଅଗ୍ନିବୀରଙ୍କୁ ସ୍ଥାୟୀ ନିଯୁକ୍ତି ଦେବା ପାଇଁ ସୁପାରିସ କରାଯାଇଛି। ଯଦିଓ କେନ୍ଦ୍ର ସରକାର ଏପର୍ଯ୍ୟନ୍ତ ଏହି ପ୍ରସ୍ତାବକୁ ଅନୁମୋଦନ କରିନାହାଁନ୍ତି, ତଥାପି ଏହା ମଞ୍ଜୁର ହେଲେ ୨୦୨୩ ବ୍ୟାଚର ଅଗ୍ନିବୀରମାନେ ସର୍ବପ୍ରଥମେ ଏହାର ଲାଭ ପାଇପାରନ୍ତି। ବିଶେଷକରି ନୌସେନା ପକ୍ଷରୁ ସ୍ଥାୟୀ ନିଯୁକ୍ତି ହାରକୁ ୨୫ ପ୍ରତିଶତରୁ ବଢ଼ାଇ ୭୫ ପ୍ରତିଶତ କରିବା ପାଇଁ ଜୋରଦାର ପ୍ରସ୍ତାବ ଦିଆଯାଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ୨୦୨୫ ମସିହାରେ ସଶସ୍ତ୍ର ବାହିନୀର ତିନୋଟି ଶାଖାରେ ପ୍ରାୟ ୭୦ ହଜାର ଅଗ୍ନିବୀରଙ୍କୁ ନିଯୁକ୍ତି ଦିଆଯାଇଥିଲା। ଆସନ୍ତା ବର୍ଷ ଏହି ସଂଖ୍ୟାକୁ ୯୦ ହଜାରକୁ ବୃଦ୍ଧି କରିବା ପାଇଁ ଯୋଜନା ଚାଲିଛି। ସଶସ୍ତ୍ର ବାହିନୀରେ ଥିବା ପ୍ରାୟ ୧.୮ ଲକ୍ଷ ସୈନିକ ଅଭାବ ପୂରଣ କରିବା ଏହାର ମୁଖ୍ୟ ଲକ୍ଷ୍ୟ ବୋଲି କୁହାଯାଉଛି।
ଉଲ୍ଲେଖଯୋଗ୍ୟ ଯେ, କେନ୍ଦ୍ର ସରକାର ୨୦୨୨ ମସିହାରେ ଅଗ୍ନିପଥ ଯୋଜନା ଆରମ୍ଭ କରିଥିଲେ ଏବଂ ୨୦୨୩ରେ ପ୍ରଥମ ବ୍ୟାଚ୍ ଅଗ୍ନିବୀରଙ୍କ ନିଯୁକ୍ତି ହୋଇଥିଲା। ଏହି ଯୋଜନା ଅନୁସାରେ ଯୁବକମାନେ ଭାରତୀୟ ସେନା, ବାୟୁସେନା ଓ ନୌସେନାରେ ଚାରି ବର୍ଷ ପାଇଁ ସେବା କରିବାର ସୁଯୋଗ ପାଉଛନ୍ତି। ବର୍ତ୍ତମାନ ସ୍ଥାୟୀ ନିଯୁକ୍ତି ହାର ବୃଦ୍ଧି ସମ୍ପର୍କିତ ଏହି ପ୍ରସ୍ତାବ ଲକ୍ଷାଧିକ ଯୁବକଙ୍କ ପାଇଁ ନୂଆ ଆଶା ସୃଷ୍ଟି କରିଛି।