ଉତ୍ତରପ୍ରଦେଶ: ଆସନ୍ତାବର୍ଷ ହେବାକୁ ଥିବା ଉତ୍ତରପ୍ରଦେଶ ବିଧାନସଭା ନିର୍ବାଚନରେ କେନ୍ଦ୍ରମନ୍ତ୍ରୀ ଚିରାଗ ପାଶ୍ବାନଙ୍କ ନେତୃତ୍ୱାଧୀନ ଲୋକ ଜନଶକ୍ତି ପାର୍ଟି (ରାମ ବିଳାଶ) ପ୍ରତିଦ୍ୱନ୍ଦ୍ୱିତା କରିବ। ଏ ସମ୍ପର୍କରେ ରବିବାର ଚିରାଗ ପାଶ୍ବାନ ଆନୁଷ୍ଠାନିକ ଘୋଷଣା କରିଛନ୍ତି।
ସେ କହିଛନ୍ତି ଯେ ନିର୍ବାଚନରେ ଆସନ ବୁଝାମଣା ଓ ଅନ୍ୟାନ୍ୟ ରଣନୀତିଗତ ପ୍ରସଙ୍ଗରେ ଦଳର ଉତ୍ତରପ୍ରଦେଶ ଶାଖା ଆବଶ୍ୟକ ନିଷ୍ପତ୍ତି ନେବ। ପରେ ଦଳର ସଂସଦୀୟ ବୋର୍ଡ ସେହି ନିଷ୍ପତ୍ତିକୁ ଅନୁମୋଦନ କରିବ। ଆଗାମୀ ଦିନରେ ଦଳର ସଂଗଠନକୁ ଆହୁରି ସୁଦୃଢ଼ ଓ ବିସ୍ତୃତ କରାଯିବ। କେବଳ ବିହାରରେ ସୀମିତ ନ ରହି ଦେଶବ୍ୟାପୀ ଏକ ଶକ୍ତିଶାଳୀ ସଂଗଠନ ଗଢ଼ି ତୋଳିବା ଦଳର ଲକ୍ଷ୍ୟ ହେବ।
ଏହାସହ ଚିରାଗ ସୂଚନା ଦେଇଛନ୍ତି ଯେ ଆସନ୍ତା ବର୍ଷ ଦଳର ପ୍ରତିଷ୍ଠାତା ତଥା ପୂର୍ବତନ କେନ୍ଦ୍ରମନ୍ତ୍ରୀ ରାମ ବିଳାସ ପାଶ୍ବାନଙ୍କ ଜନ୍ମଜୟନ୍ତୀ ଲକ୍ଷ୍ନୌରେ ପାଳନ କରାଯିବ। ଉତ୍ତରପ୍ରଦେଶରେ ଦଳର ସଂଗଠନ ବିସ୍ତାର ଓ ରାଜନୈତିକ ସକ୍ରିୟତା ବଢ଼ାଇବା ଦିଗରେ ଏହି ଘୋଷଣାକୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବେ ଦେଖାଯାଉଛି।