ମହାରାଷ୍ଟ୍ର: ମହାରାଷ୍ଟ୍ରର ରାୟଗଡ଼ ଜିଲ୍ଲାରେ ପ୍ରବଳ ମୌସୁମୀ ବର୍ଷା ଯୋଗୁଁ ବନ୍ୟା ପରିସ୍ଥିତି ଉପୁଜିଛି। ନଦୀଗୁଡ଼ିକର ଜଳସ୍ତର ବିପଦ ସୀମା ଉପରେ ପ୍ରବାହିତ ହେଉଥିବା ବେଳେ ଅନେକ ଅଞ୍ଚଳ ଜଳବନ୍ଦୀ ହୋଇପଡ଼ିଛି। ଏହାରି ମଧ୍ୟରେ ଖାଲାପୁର ଅଞ୍ଚଳର ପାତାଳଗଙ୍ଗା ନଦୀରେ ଶହଶହ ଏଲପିଜି ଗ୍ୟାସ୍ ସିଲିଣ୍ଡର ଭାସୁଥିବା ଏକ ବିରଳ ଦୃଶ୍ୟ ସାମ୍ନାକୁ ଆସିଛି।
ସୂଚନା ଅନୁଯାୟୀ, ଖାଲାପୁରସ୍ଥିତ ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍ ଲିମିଟେଡ୍ ଏଲପିଜି ବଟଲିଂ ପ୍ଲାଣ୍ଟରୁ ପ୍ରାୟ ୩ ହଜାର ଗ୍ୟାସ୍ ସିଲିଣ୍ଡର ବନ୍ୟା ପାଣିରେ ଭାସିଯାଇଛି। ପ୍ରବଳ ବର୍ଷା ଯୋଗୁଁ ଗୋଦାମରେ ପାଣି ପଶିବା ସହ କାନ୍ଥ ଭାଙ୍ଗିଯିବାରୁ ସିଲିଣ୍ଡରଗୁଡ଼ିକ ନଦୀ ସ୍ରୋତରେ ଭାସିଯାଇଥିବା କୁହାଯାଉଛି। ଏହି ସିଲିଣ୍ଡର ମଧ୍ୟରୁ କିଛି ଭର୍ତ୍ତି ଥିବା ବେଳେ ଅନ୍ୟଗୁଡ଼ିକ ଖାଲି ଥିବା ଜଣାପଡ଼ିଛି।
ସୋସିଆଲ୍ ମିଡିଆରେ ଭାଇରାଲ୍ ଭିଡିଓରେ ସ୍ଥାନୀୟ ଲୋକମାନେ ରଶି ଓ ହୁକ୍ ବ୍ୟବହାର କରି ନଦୀରୁ ସିଲିଣ୍ଡର ବାହାର କରୁଥିବା ଦେଖାଯାଇଛି। ଏହାକୁ ନେଇ ପ୍ରଶାସନ ଲୋକଙ୍କୁ ସତର୍କ କରିବା ସହ ନଦୀରେ ଭାସୁଥିବା କୌଣସି ସିଲିଣ୍ଡର ମିଳିଲେ ତୁରନ୍ତ ସମ୍ପୃକ୍ତ ତହସିଲଦାର କାର୍ଯ୍ୟାଳୟ କିମ୍ବା ଏଚପିସିଏଲର ଅଧିକୃତ ଡିଲରଙ୍କୁ ସୂଚନା ଦେବାକୁ ଅନୁରୋଧ କରିଛି। ସିଲିଣ୍ଡରଗୁଡ଼ିକୁ ନିଜ ପାଖରେ ନ ରଖି ଫେରସ୍ତ କରିବାକୁ ମଧ୍ୟ ନିବେଦନ କରାଯାଇଛି।ଘଟଣାର ତଦନ୍ତ ଚାଲିଥିବା ବେଳେ ଭାସିଯାଇଥିବା ସିଲିଣ୍ଡରଗୁଡ଼ିକୁ ସଂଗ୍ରହ କରିବା ପାଇଁ ପ୍ରଶାସନ ପକ୍ଷରୁ ସ୍ୱତନ୍ତ୍ର ଅଭିଯାନ ଆରମ୍ଭ କରାଯାଇଛି।