ଅଭିନନ୍ଦନ ଜଣାଇଲେ ମୁଖ୍ୟମନ୍ତ୍ରୀ ବିଜୟ
ତାମିଲନାଡୁ: ୭୨ତମ ଜାତୀୟ ଚଳଚ୍ଚିତ୍ର ପୁରସ୍କାରରେ ତାମିଲ ଚଳଚ୍ଚିତ୍ର ଜଗତ ୧୦ଟି ସମ୍ମାନ ହାସଲ କରିବା ପରେ ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ତାମିଲ ଫିଲ୍ମ ଇଣ୍ଡଷ୍ଟ୍ରିର କଳାକାର ଓ ଟେକ୍ନିସିଆନମାନଙ୍କୁ ଅଭିନନ୍ଦନ ଜଣାଇଛନ୍ତି। ସେ ଏହାକୁ ତାମିଲନାଡୁ ପାଇଁ ଏକ ଗର୍ବର ମୁହୂର୍ତ୍ତ ବୋଲି କହିବା ସହ ତାମିଲ ସିନେମାର ସୃଜନଶୀଳତା, ପ୍ରତିଭା ଓ ଉତ୍କର୍ଷତାର ପ୍ରତିଫଳନ ବୋଲି ବର୍ଣ୍ଣନା କରିଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ, ଚଳିତ ବର୍ଷର ଜାତୀୟ ଚଳଚ୍ଚିତ୍ର ପୁରସ୍କାରରେ ତାମିଲ ସିନେମାର ଉଲ୍ଲେଖନୀୟ ସଫଳତା ପ୍ରମାଣ କରିଛି ଯେ ରାଜ୍ୟର ନିର୍ଦ୍ଦେଶକ, ଅଭିନେତା ଓ ଟେକ୍ନିକାଲ ଟିମ୍ ଭାରତୀୟ ସିନେମାକୁ ନୂଆ ଉଚ୍ଚତାକୁ ନେବାରେ ଲଗାତାର ଅବଦାନ ରଖୁଛନ୍ତି। ନୂଆଦିଲ୍ଲୀରେ ଘୋଷିତ ଏହି ପୁରସ୍କାରରେ ୨୦୨୪ ମସିହାରେ ମୁକ୍ତିଲାଭ କରିଥିବା ଚଳଚ୍ଚିତ୍ରଗୁଡ଼ିକୁ ସମ୍ମାନିତ କରାଯାଇଛି। ତାମିଲ ସିନେମା ଶ୍ରେଷ୍ଠ ତାମିଲ ଫିଚର ଫିଲ୍ମ, ନିର୍ଦ୍ଦେଶନା, ଅଭିନୟ, ସମ୍ପାଦନା, ପୃଷ୍ଠଭୂମି ସଙ୍ଗୀତ, ଷ୍ଟଣ୍ଟ କୋରିଓଗ୍ରାଫି, ସାଉଣ୍ଡ ଡିଜାଇନ ଓ ଅଡିଓଗ୍ରାଫି ଭଳି ବିଭିନ୍ନ ବର୍ଗରେ ସଫଳତା ହାସଲ କରିଛି।
ମୁଖ୍ୟମନ୍ତ୍ରୀ ବିଜୟ ବିଶେଷ ଭାବେ ଅଭିନେତା-ନିର୍ଦ୍ଦେଶକ ଧନୁଷଙ୍କୁ ଅଭିନନ୍ଦନ ଜଣାଇଛନ୍ତି। ଧନୁଷଙ୍କ ନିର୍ଦ୍ଦେଶିତ ‘ରାୟାନ’ ଶ୍ରେଷ୍ଠ ତାମିଲ ଫିଚର ଫିଲ୍ମ ଭାବେ ସମ୍ମାନିତ ହୋଇଥିବାବେଳେ ‘କ୍ୟାପଟେନ୍ ମିଲର’ ଚଳଚ୍ଚିତ୍ରରେ ତାଙ୍କ ଅଭିନୟ ପାଇଁ ସେ ଶ୍ରେଷ୍ଠ ଅଭିନେତା ବିଭାଗରେ ‘ସ୍ପେଶାଲ ମେନ୍ସନ’ ପାଇଛନ୍ତି।
ସେହିପରି ‘ଅମରନ’ ଚଳଚ୍ଚିତ୍ରର ସଫଳତାକୁ ମଧ୍ୟ ସେ ପ୍ରଶଂସା କରିଛନ୍ତି। ଫିଲ୍ମର ନିର୍ଦ୍ଦେଶକ ରାଜକୁମାର ପେରିଆସାମି ଶ୍ରେଷ୍ଠ ନିର୍ଦ୍ଦେଶକ, ଆର୍. କଲୈବାନନ୍ ଶ୍ରେଷ୍ଠ ସମ୍ପାଦକ ଏବଂ ଜି.ଭି. ପ୍ରକାଶ କୁମାର ଶ୍ରେଷ୍ଠ ପୃଷ୍ଠଭୂମି ସଙ୍ଗୀତ ପାଇଁ ଜାତୀୟ ପୁରସ୍କାର ଜିତିଛନ୍ତି। ‘ମହାରାଜା’ ଚଳଚ୍ଚିତ୍ରର ଟିମ୍କୁ ମଧ୍ୟ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇଛନ୍ତି। ଏହି ଫିଲ୍ମ ପାଇଁ ଆନଲ୍ ଅରାସୁ ଶ୍ରେଷ୍ଠ ଷ୍ଟଣ୍ଟ କୋରିଓଗ୍ରାଫି ପୁରସ୍କାର ଜିତିଥିବାବେଳେ ସଚନା ନମିଦାସ ଶ୍ରେଷ୍ଠ ସହଅଭିନେତ୍ରୀ ଭାବେ ସମ୍ମାନିତ ହୋଇଛନ୍ତି।
ଅନ୍ୟପଟେ ‘ମେୟାଝାଗନ’ ପାଇଁ ସୁରେନ୍ ଜି. ଅଡିଓଗ୍ରାଫିରେ ‘ସ୍ପେଶାଲ ମେନ୍ସନ’ ପାଇଥିବାବେଳେ ‘ବ୍ଲୁ’ ନାମକ ସ୍ୱଳ୍ପଦୈର୍ଘ୍ୟ ଚଳଚ୍ଚିତ୍ର ପାଇଁ ଟି.ଏସ୍. ହରିହରସୁଧନ ଶ୍ରେଷ୍ଠ ସାଉଣ୍ଡ ଡିଜାଇନ ପୁରସ୍କାର ହାସଲ କରିଛନ୍ତି। ମୁଖ୍ୟମନ୍ତ୍ରୀ ବିଜୟ କହିଛନ୍ତି ଯେ, ଏହି ସମ୍ମାନ ତାମିଲ ଚଳଚ୍ଚିତ୍ର ଜଗତର ସୃଜନଶୀଳତା ଓ କଠିନ ପରିଶ୍ରମ ପ୍ରତି ଏକ ସ୍ୱୀକୃତି। ଏହା ନୂତନ ପିଢ଼ିର କଳାକାର ଓ ନିର୍ମାତାମାନଙ୍କୁ ଉତ୍କର୍ଷତାର ଲକ୍ଷ୍ୟରେ ଆଗେଇ ଯିବାକୁ ପ୍ରେରଣା ଦେବ ବୋଲି ସେ ଆଶା ପ୍ରକାଶ କରିଛନ୍ତି।