ନ୍ୟୁଜ୍ ବ୍ୟୁରୋ: ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତ ପାଇଁ ଭାରୋତ୍ତୋଳନ ଏବେ ମଧ୍ୟ ସବୁଠାରୁ ସଫଳ କ୍ରୀଡ଼ା ଭାବେ ପ୍ରମାଣିତ ହୋଇଛି। ସୋମବାର ମହିଳା ଭାରୋତ୍ତୋଳନରେ ଭାରତ ଆଉ ଦୁଇଟି ପଦକ ଜିତିଛି। ୫୩ କିଗ୍ରା ବର୍ଗରେ ଜ୍ଞାନେଶ୍ବରୀ ଯାଦବ ରୌପ୍ୟ ପଦକ ଜିତିଥିବା ବେଳେ ୫୮ କିଗ୍ରା ବର୍ଗରେ ବିନ୍ଦିୟାରାଣୀ ଦେବୀ କାଂସ୍ୟ ପଦକ ହାସଲ କରିଛନ୍ତି। ଏହା ସହିତ ଭାରତର ମୋଟ ପଦକ ସଂଖ୍ୟା ୬ରେ ପହଞ୍ଚିଛି।
୨୩ ବର୍ଷୀୟା ଜ୍ଞାନେଶ୍ବରୀ ଯାଦବ ସ୍ନାଚ୍ରେ ୮୮ କିଗ୍ରା ଏବଂ କ୍ଲିନ୍ ଏଣ୍ଡ୍ ଜର୍କରେ ୧୧୧ କିଗ୍ରା ସହ ମୋଟ ୧୯୯ କିଗ୍ରା ଭାର ଉଠାଇ ଦ୍ବିତୀୟ ସ୍ଥାନ ଅଧିକାର କରିଥିଲେ। କ୍ଲିନ୍ ଏଣ୍ଡ୍ ଜର୍କରେ ୧୧୧ କିଗ୍ରା ତାଙ୍କର ବ୍ୟକ୍ତିଗତ ସର୍ବଶ୍ରେଷ୍ଠ ପ୍ରଦର୍ଶନ ରହିଛି। ନାଇଜେରିଆର ଓନୋମେ ଡିଡିହ୍ ୨୦୬ କିଗ୍ରା ମୋଟ ଭାର ଉଠାଇ ସ୍ବର୍ଣ୍ଣ ପଦକ ଜିତିବା ସହ କ୍ଲିନ୍ ଏଣ୍ଡ୍ ଜର୍କରେ ୧୧୩ କିଗ୍ରା ଉଠାଇ ନୂତନ ରାଜ୍ୟଗୋଷ୍ଠୀ କ୍ରୀଡ଼ା ରେକର୍ଡ ସ୍ଥାପନ କରିଥିଲେ। କାନାଡାର ରେବେକା ଗ୍ରୌଲ୍କ୍ସ ୧୭୮ କିଗ୍ରା ସହ କାଂସ୍ୟ ପଦକ ଜିତିଥିଲେ। ଛତିଶଗଡ଼ର ରାଜନାନ୍ଦଗାଓଁର ଜ୍ଞାନେଶ୍ବରୀଙ୍କ ପାଇଁ ଏହା ଆନ୍ତର୍ଜାତିକ ସ୍ତରର ସର୍ବଶ୍ରେଷ୍ଠ ସଫଳତା।
ଅନ୍ୟପକ୍ଷରେ, ମହିଳା ୫୮ କିଗ୍ରା ବର୍ଗରେ ମଣିପୁରର ବିନ୍ଦିୟାରାଣୀ ଦେବୀ ସ୍ନାଚ୍ରେ ୮୭ କିଗ୍ରା ଓ କ୍ଲିନ୍ ଏଣ୍ଡ୍ ଜର୍କରେ ୧୧୨ କିଗ୍ରା ସହ ମୋଟ ୧୯୯ କିଗ୍ରା ଭାର ଉଠାଇ କାଂସ୍ୟ ପଦକ ଜିତିଛନ୍ତି। ଏହା ରାଜ୍ୟଗୋଷ୍ଠୀ କ୍ରୀଡ଼ାରେ ତାଙ୍କର ଦ୍ବିତୀୟ ପଦକ। ଏହା ପୂର୍ବରୁ ୨୦୨୨ ବର୍ମିଂହାମ୍ କ୍ରୀଡ଼ାର ୫୫ କିଗ୍ରା ବର୍ଗରେ ସେ ରୌପ୍ୟ ପଦକ ଜିତିଥିଲେ। ଏହି ବର୍ଗରେ ନାଇଜେରିଆର ରାଫିଆତୁ ୨୨୯ କିଗ୍ରା ଭାର ଉଠାଇ ନୂତନ ରାଜ୍ୟଗୋଷ୍ଠୀ କ୍ରୀଡ଼ା ରେକର୍ଡ ସହ ସ୍ବର୍ଣ୍ଣ ପଦକ ହାସଲ କରିଥିଲେ। କାନାଡାର ଆନ୍ ସୋଫି ୨୧୫ କିଗ୍ରା ସହ ରୌପ୍ୟ ପଦକ ଜିତିଥିଲେ।