ବାଂଲାଦେଶ: ବାଂଲାଦେଶର ୨୩ତମ ରାଷ୍ଟ୍ରପତି ଭାବେ ବାଂଲାଦେଶ ନେସନାଲିଷ୍ଟ ପାର୍ଟିର ପ୍ରାର୍ଥୀ ମିର୍ଜା ଫକରୁଲ୍ ଇସଲାମ୍ ଆଲମଗୀର ନିର୍ବାଚିତ ହୋଇଛନ୍ତି। ସଂସଦୀୟ ନିର୍ବାଚନରେ ସେ ୨୫୫ଟି ଭୋଟ୍ ପାଇ ବିଜୟୀ ହୋଇଥିବାବେଳେ ତାଙ୍କ ପ୍ରତିଦ୍ୱନ୍ଦ୍ୱୀ ଓଲି ଅହମ୍ମଦ ୮୮ଟି ଭୋଟ୍ ପାଇଛନ୍ତି। ଓଲି ଅହମ୍ମଦଙ୍କୁ ୧୧ଟି ଦଳର ମେଣ୍ଟ ସମର୍ଥନ କରୁଥିଲା।
ବାଂଲାଦେଶରେ ଦୀର୍ଘ ବ୍ୟବଧାନ ପରେ ରାଷ୍ଟ୍ରପତି ପଦ ପାଇଁ ପ୍ରତିଦ୍ୱନ୍ଦ୍ୱିତା ହୋଇଛି। ଏହା ପୂର୍ବରୁ ୮ ଅକ୍ଟୋବର ୧୯୯୧ରେ ରାଷ୍ଟ୍ରପତି ପଦ ପାଇଁ ନିର୍ବାଚନ ହୋଇଥିଲା। ପରବର୍ତ୍ତୀ ୧୯୯୬, ୨୦୦୧, ୨୦୦୨, ୨୦୦୯, ୨୦୧୩, ୨୦୧୮ ଓ ୨୦୨୩ରେ କେବଳ ଜଣେ ପ୍ରାର୍ଥୀ ଥିବାରୁ ଭୋଟିଂ ଆବଶ୍ୟକ ହୋଇନଥିଲା।
ସଂସଦରେ ବାଂଲାଦେଶ ନେସନାଲିଷ୍ଟ ପାର୍ଟିର ଦୁଇ-ତୃତୀୟାଂଶ ବହୁମତ ଥିବାରୁ ଫକରୁଲଙ୍କ ବିଜୟ ପ୍ରାୟ ନିଶ୍ଚିତ ଥିବା କୁହାଯାଉଥିଲା। ତେବେ ଚୂଡ଼ାନ୍ତ ଫଳାଫଳ ଓ ବିରୋଧୀ ପ୍ରାର୍ଥୀଙ୍କ ପ୍ରଦର୍ଶନ ଉପରେ ନଜର ରହିଥିଲା। ନବନିର୍ବାଚିତ ରାଷ୍ଟ୍ରପତି ଆସନ୍ତା ୨୧ ଅଗଷ୍ଟ ସନ୍ଧ୍ୟା ୭ଟା ୩୦ରେ ବଙ୍ଗଭବନରେ ଶପଥ ଗ୍ରହଣ କରିବେ ବୋଲି ଜଣାପଡ଼ିଛି।
ମିର୍ଜା ଫକରୁଲ୍ ଇସଲାମ୍ ଆଲମଗୀର ଠାକୁରଗାଁ-୧ ନିର୍ବାଚନମଣ୍ଡଳୀରୁ ସାଂସଦ ଅଛନ୍ତି। ସେ ବର୍ତ୍ତମାନ ସ୍ଥାନୀୟ ସରକାରୀ ମନ୍ତ୍ରୀ ଭାବେ ମଧ୍ୟ କାର୍ଯ୍ୟ କରୁଛନ୍ତି। ୨୦୦୧ରୁ ୨୦୦୬ ପର୍ଯ୍ୟନ୍ତ ସରକାରରେ ସେ କୃଷି ରାଷ୍ଟ୍ରମନ୍ତ୍ରୀ ଏବଂ ପରେ ଅସାମରିକ ବିମାନ ଚଳାଚଳ ଓ ପର୍ଯ୍ୟଟନ ମନ୍ତ୍ରଣାଳୟରେ ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ। ୧୯୪୮ ଜାନୁଆରୀ ୨୬ରେ ଠାକୁରଗାଁ ଜିଲ୍ଲାରେ ଜନ୍ମଗ୍ରହଣ କରିଥିବା ଫକରୁଲଙ୍କ ପିତା ମିର୍ଜା ରୁହୁଲ ଅମୀନ ଜଣେ ପୂର୍ବତନ ସାଂସଦ ଥିଲେ। ତାଙ୍କ ପତ୍ନୀ ରାହତ୍ ଆରା ବେଗମ୍ କୋଲକାତା ବିଶ୍ୱବିଦ୍ୟାଳୟରୁ ଶିକ୍ଷା ଗ୍ରହଣ କରିଛନ୍ତି। ଦମ୍ପତିଙ୍କର ଦୁଇ ଝିଅ ଅଛନ୍ତି।