ପଞ୍ଜାବ: ପଞ୍ଜାବର ଡ୍ରାଫ୍ଟ ଭୋଟର ତାଲିକାରୁ ରାଜ୍ୟସଭା ସାଂସଦ ରାଘବ ଚଢ଼ାଙ୍କ ନାଁ ବାଦ ପଡ଼ିବା ଘଟଣାକୁ ନେଇ ରାଜନୈତିକ ବିବାଦ ତୀବ୍ର ହୋଇଛି। ନିର୍ବାଚନ କମିଶନଙ୍କ ଚାଲିଥିବା ସ୍ୱତନ୍ତ୍ର ସଘନ ସଂଶୋଧନ (SIR) ପ୍ରକ୍ରିୟାରେ ଚଢ଼ାଙ୍କ ନାଁକୁ ‘ପର୍ମାନେଣ୍ଟଲି ସିଫ୍ଟେଡ୍’ ବା ‘ସ୍ଥାୟୀ ଭାବେ ସ୍ଥାନାନ୍ତରିତ’ ଭାବେ ଚିହ୍ନଟ କରାଯାଇଛି।
ଅଗଷ୍ଟ ୧୩ରେ ପ୍ରକାଶିତ ଡ୍ରାଫ୍ଟ ଭୋଟର ତାଲିକାରେ ‘ଅନୁପସ୍ଥିତ, ସ୍ଥାନାନ୍ତରିତ, ମୃତ ଏବଂ ନକଲ/ଦ୍ୱିତୀୟ ଏଣ୍ଟ୍ରି’ ବର୍ଗରେ ଚଢ଼ାଙ୍କ ନାଁ ରହିଛି। ତାଙ୍କ ନାଁ ଆଗରେ ବାଦ ପଡ଼ିବାର କାରଣ ଭାବେ ‘ସ୍ଥାୟୀ ଭାବେ ସ୍ଥାନାନ୍ତରିତ’ ଉଲ୍ଲେଖ କରାଯାଇଛି। ଏହି ପ୍ରକ୍ରିୟାରେ ପଞ୍ଜାବର ପ୍ରାୟ ୨୦.୬୬ ଲକ୍ଷ ଭୋଟରଙ୍କ ନାଁ ବିଭିନ୍ନ କାରଣରୁ ଡ୍ରାଫ୍ଟ ତାଲିକାରୁ ବାଦ ଦିଆଯାଇଛି।
ଚଢ଼ାଙ୍କ ଅଭିଯୋଗ ଅନୁସାରେ, ତାଙ୍କ ଭୋଟର ପରିଚୟପତ୍ର ମୋହାଲିରେ ପଞ୍ଜୀକୃତ ଥିବା ସତ୍ତ୍ୱେ ତାଙ୍କୁ ସ୍ଥାନାନ୍ତରିତ ଭାବେ ଚିହ୍ନଟ କରାଯିବା ଅସ୍ୱାଭାବିକ। ସେ ଏହାକୁ ଦପ୍ତରୀୟ ତ୍ରୁଟି ନୁହେଁ, ବରଂ ରାଜନୈତିକ ପ୍ରତିଶୋଧ ବୋଲି ଦାବି କରିଛନ୍ତି। ତେବେ ଡ୍ରାଫ୍ଟ ତାଲିକା ହୋଇଥିବାରୁ ନିୟମ ଅନୁଯାୟୀ ଦାବି ଓ ଆପତ୍ତି ଦାଖଲ କରିବାର ସୁଯୋଗ ରହିଛି।
ଅନ୍ୟପକ୍ଷରେ, ଆମ୍ ଆଦମୀ ପାର୍ଟି (ଆପ) ଚଢ଼ାଙ୍କ ଅଭିଯୋଗକୁ ଖଣ୍ଡନ କରିଛି। ଦଳର କହିବା ଅନୁସାରେ, SIR ପ୍ରକ୍ରିୟା ନିର୍ବାଚନ କମିଶନଙ୍କ ଅଧୀନରେ ଚାଲିଛି ଏବଂ ଭୋଟର ତାଲିକାରୁ ନାଁ ଯୋଡ଼ିବା କିମ୍ବା ବାଦ ଦେବାରେ ପଞ୍ଜାବ ସରକାରଙ୍କ କୌଣସି ଭୂମିକା ନାହିଁ। ଏହାରି ମଧ୍ୟରେ ଆପ ରାଘବ ଚଢ଼ାଙ୍କ ବିରୋଧରେ ପାଲଟା ଅଭିଯୋଗ ଆଣିଛି। ଦଳର ଦାବି ହେଉଛି, ଦିଲ୍ଲୀର ରାଜିନ୍ଦର ନଗରରେ ଭୋଟର ଭାବେ ପଞ୍ଜୀକରଣ କରିବା ସମୟରେ ଚଢ଼ା ପଛୁଆ ତାରିଖ ଦର୍ଶାଇବାକୁ ଚେଷ୍ଟା କରିଥିଲେ। ଏହି ଅଭିଯୋଗର ଉଚିତ ତଦନ୍ତ ହେବା ଆବଶ୍ୟକ ବୋଲି ଦଳ କହିଛି।