ଯାଜପୁର: ବିବାହ ସାରି ଫେରୁଥିବା ବରଯାତ୍ରୀଙ୍କ ଗାଡ଼ି ସହ ଘଟିଥିବା ଭୟାବହ ସଡ଼କ ଦୁର୍ଘଟଣାରେ ୫ ଜଣଙ୍କ ଜୀବନ ଚାଲିଯାଇଛି। ବୋଲେରୋ ଗାଡ଼ିଟି ଜାତୀୟ ରାଜପଥ ୫୩ର ବରଡ଼ା ଛକ ନିକଟରେ ପୂର୍ବରୁ ଥିବା ଏକ ହାଇୱାର ପଛପଟେ ଧକ୍କା ଦେବାରୁ ଏହି ଦୁର୍ଘଟଣା ଘଟିଛି।ବଡ଼ଚଣା ଥାନା ଶାସନପୁରୁଷୋତ୍ତମପୁର ଗାଁର ଲୋକେ କେଉଁଝରରେ ବିବାହ ଉତ୍ସବରେ ଯୋଗଦେଇ ବୋଲେରୋରେ ଫେରୁଥିବା ବେଳେ ସକାଳ ୭ଟାରୁ ୮ଟା ମଧ୍ୟରେ ଏହି ମର୍ମନ୍ତୁଦ ଦୁର୍ଘଟଣା ଘଟିଥିଲା। ଗାଡ଼ିରେ ଡ୍ରାଇଭର ସହିତ ମୋଟ ୧୩ ଜଣ ଥିଲେ। ଦୁର୍ଘଟଣାରେ ଡ୍ରାଇଭର ସମେତ ୮ ଜଣ ଗୁରୁତର ଆହତ ହୋଇଥିବାବେଳେ, ମୃତକଙ୍କ ମଧ୍ୟରେ ୪ ଜଣ ମହିଳା ଓ ଜଣେ ପୁରୁଷ ରହିଛନ୍ତି। ଧର୍ମଶାଳା ମେଡିକାଲରେ ୩ ଜଣ ଓ ବଡ଼ଚଣା ମେଡିକାଲରେ ୨ ଜଣଙ୍କୁ ଡାକ୍ତର ମୃତ ଘୋଷଣା କରିଥିଲେ।
ଆହତମାନଙ୍କୁ ପ୍ରଥମେ ବଡ଼ଚଣା ଓ ଧର୍ମଶାଳା ହସ୍ପିଟାଲକୁ ନେଇଯାଇଥିବାବେଳେ ପରେ ଗୁରୁତର ଅବସ୍ଥାରୁ କଟକ ମେଡିକାଲକୁ ସ୍ଥାନାନ୍ତର କରାଯାଇଛି। ଆହତମାନଙ୍କ ମଧ୍ୟରେ ୨ ଜଣ ଛୋଟ ପିଲା ଥିବା ସହ ସମସ୍ତଙ୍କ ଅବସ୍ଥା ଗମ୍ଭୀର ଥିବା ଜଣାପଡ଼ିଛି। ଘଟଣା ପରେ ଅଗ୍ନିଶମ ବାହିନୀ, ପୋଲିସ ଓ ସ୍ଥାନୀୟ ଲୋକେ ମିଶି ଉଦ୍ଧାର କାର୍ଯ୍ୟ ଚାଲାଇ ଆହତମାନଙ୍କୁ ଗାଡ଼ି ଭିତରୁ ବାହାର କରିଥିଲେ। ଜେନାପୁର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଏହି ଦୁର୍ଘଟଣା ପ୍ରତି ଗଭୀର ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ସେ ମୃତକଙ୍କ ପରିବାର ପାଇଁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୪ ଲକ୍ଷ ଟଙ୍କା କରି ସହାୟତା ଘୋଷଣା କରିଥିବା ସହ ଆହତମାନଙ୍କ ଆଶୁ ସୁସ୍ଥତା କାମନା କରିଛନ୍ତି।