ନ୍ୟୁଜ୍ ବ୍ୟୁରୋ: ସିବିଆଇ NEET-UG 2026 ପେପର୍ ଲିକ୍ ମାମଲାରେ ଆଉ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହା ସହିତ ଏହି ମାମଲାରେ ମୋଟ ଗିରଫ ଅଭିଯୁକ୍ତଙ୍କ ସଂଖ୍ୟା ୧୩କୁ ବୃଦ୍ଧି ପାଇଛି। ଗିରଫ ହୋଇଥିବା ପ୍ରଥମ ଅଭିଯୁକ୍ତ ହେଉଛନ୍ତି ଲାଟୁରର ଡାକ୍ତର ମନୋଜ ଶିରୁରେ। ସିବିଆଇ ଅନୁଯାୟୀ, ସେ ତିନି ଜଣ ଛାତ୍ରଙ୍କୁ ଲିକ୍ ହୋଇଥିବା ରସାୟନ ବିଜ୍ଞାନ ପ୍ରଶ୍ନପତ୍ର ବଣ୍ଟନ କରିବାରେ ମୁଖ୍ୟ ଭୂମିକା ନେଇଥିଲେ। ଏହି ଛାତ୍ରମାନଙ୍କ ମଧ୍ୟରୁ ଜଣେ ଅଭିଯୁକ୍ତ କୋଚିଂ ସେଣ୍ଟର ମାଲିକଙ୍କ ପୁଅ ବୋଲି ତଦନ୍ତରୁ ଜଣାପଡ଼ିଛି। ସିବିଆଇ କହିଛି ଯେ, ଡାକ୍ତର ମନୋଜ ଶିରୁରେ ଅଭିଯୁକ୍ତ ପି.ଭି. କୁଲକର୍ଣ୍ଣିଙ୍କ ଙ୍କଠାରୁ ଏହି ପ୍ରଶ୍ନପତ୍ର ପାଇଥିଲେ।
ଦ୍ୱିତୀୟ ଗିରଫ ଅଭିଯୁକ୍ତ ହେଉଛନ୍ତି ତେଜସ୍ ହର୍ଷଦକୁମାର ଶାହ, ଯିଏ ପୁଣେର ଅଭଙ୍ଗ ପ୍ରଭୁ ମେଡିକାଲ୍ ଏକାଡେମୀରେ ପଦାର୍ଥ ବିଜ୍ଞାନ ଫ୍ୟାକଲ୍ଟି ସଦସ୍ୟ ଭାବେ କାମ କରୁଛନ୍ତି। ତଦନ୍ତରୁ ଜଣାପଡ଼ିଛି ଯେ ପୂର୍ବରୁ ଗିରଫ ହୋଇଥିବା ଅଭିଯୁକ୍ତ ମନୀଷା ହାବଲଦାର ତେଜସ୍ ଶାହଙ୍କୁ NEET-UG 2026 ପଦାର୍ଥ ବିଜ୍ଞାନ ପ୍ରଶ୍ନପତ୍ର ଯୋଗାଇଥିଲେ।
ସିବିଆଇ ଏବେ ସମଗ୍ର ରାକେଟ ପଛରେ ଥିବା ନେଟୱର୍କ ଏବଂ ଷଡ଼ଯନ୍ତ୍ରର ପୁଙ୍ଖାନୁପୁଙ୍ଖ ତଦନ୍ତ କରୁଛି। ଏଜେନ୍ସି ଏପର୍ଯ୍ୟନ୍ତ ଦେଶର ୪୯ଟି ସ୍ଥାନରେ ଚଢାଉ କରିଥିବା ବେଳେ ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର, ଲାପଟପ୍ ଓ ମୋବାଇଲ୍ ଫୋନ୍ ଜବତ କରାଯାଇଛି। ଏହାର ଫରେନସିକ୍ ଓ ବୈଷୟିକ ତଦନ୍ତ ଜାରି ରହିଛି।