ଭୁବନେଶ୍ବର: ରାଜ୍ୟରେ ଚାଲିଥିବା ପ୍ରବଳ ଗ୍ରୀଷ୍ମ ପ୍ରବାହ ଓ ଖରା ପରିସ୍ଥିତିକୁ ଦୃଷ୍ଟିରେ ରଖି ସ୍କୁଲଗୁଡ଼ିକର ଗ୍ରୀଷ୍ମ ଛୁଟି ଅବଧି ବଢ଼ିପାରେ। ଏନେଇ ଶୁକ୍ରବାର ନିତ୍ୟାନନ୍ଦ ଗଣ୍ଡ ସୂଚନା ଦେଇଛନ୍ତି। ସେ କହିଛନ୍ତି ଯେ, ରାଜ୍ୟର ଖରା ସ୍ଥିତିକୁ ସମୀକ୍ଷା କରି ସ୍କୁଲ ଖୋଲିବା ସମ୍ପର୍କରେ ପୁନଃ ନିଷ୍ପତ୍ତି ନିଆଯିବ। ପୂର୍ବରୁ ସରକାର ଘୋଷଣା କରିଥିଲେ ଯେ ରାଜ୍ୟର ସମସ୍ତ ସ୍କୁଲ ଜୁନ୍ ୨୨ରେ ଖୋଲିବ। କିନ୍ତୁ ବର୍ତ୍ତମାନର ତାପପ୍ରବାହ ପରିସ୍ଥିତି ଦେଖି ଏହି ସମୟସୀମାରେ ପରିବର୍ତ୍ତନ ହୋଇପାରେ।
ପ୍ରବଳ ଗ୍ରୀଷ୍ମ ପ୍ରବାହ କାରଣରୁ ଏପ୍ରିଲ ୨୭ରୁ ରାଜ୍ୟର ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ ଏବଂ ବେସରକାରୀ ବିଦ୍ୟାଳୟରେ ଆଗୁଆ ଗ୍ରୀଷ୍ମ ଛୁଟି ଘୋଷଣା କରାଯାଇଥିଲା। ଛାତ୍ରଛାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ମୋହନ ଚରଣ ମାଝୀ ଏହି ପ୍ରସ୍ତାବକୁ ଅନୁମୋଦନ କରିଥିଲେ। ଏବେ ରାଜ୍ୟର ପାଣିପାଗ ଓ ଖରା ପରିସ୍ଥିତି ଉପରେ ନଜର ରଖି ସରକାର ସ୍କୁଲ ଖୋଲିବା ତାରିଖ ନେଇ ଚୂଡ଼ାନ୍ତ ନିଷ୍ପତ୍ତି ନେବେ।