ଯୁବକଙ୍କ ଅହଂକାରୀ ଆଚରଣ ‘ମୋ ବାପା ସବୁକିଛି ସମ୍ଭାଳି ନେବେ
ଭୁବନେଶ୍ବର: ମଦ ନିଶାରେ ଦ୍ରୁତଗତିରେ କାର୍ ଚଳାଇ ତିନି ଜଣଙ୍କ ଜୀବନ ନେଇଥିବା ଅଭିଯୋଗରେ କେରଳର କୋଚିରେ ଜଣେ ୧୯ ବର୍ଷୀୟ କଲେଜ ଛାତ୍ରଙ୍କୁ ପୋଲିସ ଗିରଫ କରିଛି। ଅଭିଯୁକ୍ତ ହେଉଛନ୍ତି ସୁହୈଲ୍ ସଜୀବ। ଦୁର୍ଘଟଣା ପରେ ଅନୁତାପ ପ୍ରକାଶ କରିବା ପରିବର୍ତ୍ତେ ସେ ପୋଲିସ ସହ ଯୁକ୍ତିତର୍କ କରିବା ସହ ‘ବାପା ସବୁ ମ୍ୟାନେଜ୍ କରିଦେବେ’ ବୋଲି କହିଥିବା ଅଭିଯୋଗ ହୋଇଛି।
ମୃତକମାନେ ହେଉଛନ୍ତି ୨୧ ବର୍ଷୀୟା ଦେବିକା, ଇଜାଜ୍ ଏବଂ ୨୨ ବର୍ଷୀୟା ଗୋପିକା। ସେମାନେ ପାର୍ଟ-ଟାଇମ୍ ବିକ୍ରୟ କର୍ମଚାରୀ ଭାବେ କାମ କରୁଥିଲେ। ବିଳମ୍ବିତ ରାତିରେ ଚା’ ପିଇବାକୁ ସ୍କୁଟରରେ ଯାଉଥିବା ବେଳେ ଏହି ଦୁର୍ଘଟଣା ଘଟିଥିଲା। ସିସିଟିଭି ଫୁଟେଜ୍ ଅନୁଯାୟୀ, ସୁହୈଲ୍ଙ୍କ କାର୍ ଘଣ୍ଟାପ୍ରତି ପ୍ରାୟ ୧୨୦ କିଲୋମିଟରରୁ ଅଧିକ ବେଗରେ ଆସି ସ୍କୁଟରକୁ ପଛପଟୁ ଧକ୍କା ଦେଇଥିଲା। ଧକ୍କା ପରେ ସ୍କୁଟର ସହ ଆରୋହୀମାନଙ୍କୁ ପ୍ରାୟ ୧୦୦ ମିଟର ପର୍ଯ୍ୟନ୍ତ ଘୋଷାଡ଼ି ନେଇଥିବା ଜଣାପଡ଼ିଛି।
ତଦନ୍ତରୁ ଅଭିଯୁକ୍ତ ମଦ୍ୟପାନ କରି କାର୍ ଚଳାଉଥିବା ଏବଂ ଦୁର୍ଘଟଣା ପୂର୍ବରୁ ଏକ ବାର୍କୁ ଯାଇଥିବା ଜଣାପଡ଼ିଥିବା ରିପୋର୍ଟରେ କୁହାଯାଇଛି। ସୁହୈଲ୍ଙ୍କୁ ତାଙ୍କ ମା’ ଜନ୍ମଦିନ ଉପହାର ଭାବେ ଏହି ଦାମୀ କାର୍ ଦେଇଥିଲେ ବୋଲି ମଧ୍ୟ ସୂଚନା ମିଳିଛି। ଏହି ଘଟଣାରେ ଅଭିଯୁକ୍ତଙ୍କ ବିରୋଧରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଧାରା ୧୦୫ ଅନୁଯାୟୀ ମାମଲା ରୁଜୁ ହୋଇଛି। ଗୋଟିଏ ମୁହୂର୍ତ୍ତର ବେପରୁଆ ଗାଡ଼ିଚାଳନା ତିନୋଟି ଜୀବନ ଛଡ଼ାଇ ନେଇଥିବା ଏହି ଘଟଣା ମଦ୍ୟପାନ କରି ଗାଡ଼ି ଚଳାଇବାର ଭୟାବହ ପରିଣାମକୁ ପୁଣିଥରେ ସାମ୍ନାକୁ ଆଣିଛି।