ନୂଆ ଦିଲ୍ଲୀ: ଦେଶର ପ୍ରଥମ ମହିଳା ଆଇପିଏସ୍ ଅଧିକାରୀ ତଥା ପୁଡୁଚେରୀର ପୂର୍ବତନ ଉପରାଜ୍ୟପାଳ କିରଣ ବେଦୀ ଦିଲ୍ଲୀର ପ୍ରଶାସନିକ ବ୍ୟବସ୍ଥା ଓ ସମ୍ପତ୍ତି ପରିଚାଳନାକୁ ନେଇ ପୁଣିଥରେ ପ୍ରଶ୍ନ ଉଠାଇଛନ୍ତି। ସେ ଦିଲ୍ଲୀ ହାଇକୋର୍ଟର ମୁଖ୍ୟ ବିଚାରପତିଙ୍କୁ ଏକ ଖୋଲା ଅନଲାଇନ୍ ପ୍ରାର୍ଥନାପତ୍ର ଲେଖି ଦିଲ୍ଲୀର ବର୍ତ୍ତମାନ ଓ ପୂର୍ବତନ ବିଧାୟକ, ପାର୍ଷଦ ଏବଂ ନଗର ନିଗମ ଅଧିକାରୀଙ୍କ ସମ୍ପତ୍ତିର ବିବରଣୀ ସାର୍ବଜନୀନ କରିବାକୁ ଦାବି କରିଛନ୍ତି। ଅନଲାଇନ୍ ପ୍ରାର୍ଥନାପତ୍ରରେ ବେଦୀ ଦିଲ୍ଲୀରେ କଥିତ ଭାଇ-ଭତିଜାବାଦ, ଅବୈଧ ନିର୍ମାଣ ଏବଂ ନିୟମ ଉଲ୍ଲଂଘନକୁ ନେଇ ଚିନ୍ତା ପ୍ରକାଶ କରିଛନ୍ତି। ସେ ପ୍ରଶ୍ନ କରିଛନ୍ତି ଯେ ବର୍ତ୍ତମାନ ଓ ପୂର୍ବତନ ବିଧାୟକ, ପାର୍ଷଦ ଏବଂ ଏମ୍ସିଡି ଅଧିକାରୀଙ୍କ ନିଜ ନାମ କିମ୍ବା ପରିବାର ସଦସ୍ୟଙ୍କ ନାମରେ ଥିବା ସମ୍ପତ୍ତିର ବିବରଣୀ ପ୍ରକାଶ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇପାରିବେ କି ନାହିଁ।
ବେଦୀଙ୍କ ଅଭିଯୋଗ ଅନୁଯାୟୀ, ଦିଲ୍ଲୀରେ କେତେକ ସମ୍ପତ୍ତି ଓ ବ୍ୟବସାୟିକ ପ୍ରତିଷ୍ଠାନ ଆଇନ ଓ ନିୟମ ଉଲ୍ଲଂଘନ କରି ଚାଲିଥିବା ନେଇ ସନ୍ଦେହ ରହିଛି। ଅବୈଧ ନିର୍ମାଣ ହେଉ କିମ୍ବା ନିୟମକୁ ଅଣଦେଖା କରି ବ୍ୟବସାୟ ଚଳାଇବା—ଏଭଳି ଘଟଣା ପଛରେ ଦୀର୍ଘଦିନର ସାଂଠଗାଠ ସଂସ୍କୃତି ରହିଥିବା ସେ ଦାବି କରିଛନ୍ତି। ନିଜ ଅଞ୍ଚଳରେ ଆଇନ ପାଳନ ଏବଂ ଅବୈଧ ନିର୍ମାଣ ରୋକିବାର ଦାୟିତ୍ୱରେ ଥିବା ଜନପ୍ରତିନିଧି ଓ ଅଧିକାରୀମାନେ ଯଦି ଏଭଳି ମାମଲାରେ ଜଡ଼ିତ ହୁଅନ୍ତି, ତେବେ ଜନସୁରକ୍ଷା ଓ ଆଇନଗତ ଚିନ୍ତା ବଢ଼ିବା ସ୍ୱାଭାବିକ ବୋଲି ବେଦୀ କହିଛନ୍ତି। ସରକାରୀ ବିଭାଗଗୁଡ଼ିକୁ ପ୍ରଶାସନିକ ନିରୀକ୍ଷଣରେ ପ୍ରଯୁକ୍ତିର ବ୍ୟବହାର ବଢ଼ାଇବା ସହ ପ୍ରକ୍ରିୟାକୁ ଅଧିକ ସ୍ୱଚ୍ଛ କରିବାକୁ ସେ ପରାମର୍ଶ ଦେଇଛନ୍ତି।
ଦିଲ୍ଲୀରେ ବାରମ୍ବାର ଘଟୁଥିବା ଅଘଟଣ ଓ ଅନିୟମିତତା ପଛରେ ନିରୀକ୍ଷଣର ଅଭାବ ଏବଂ ପ୍ରଶାସନିକ ଇଚ୍ଛାଶକ୍ତିର ଅଭାବ ରହିଥିବା ନେଇ ବେଦୀ ପୂର୍ବରୁ ମଧ୍ୟ ପ୍ରଶ୍ନ ଉଠାଇଥିଲେ। ସରକାରୀ ବ୍ୟବସ୍ଥା ବିଭିନ୍ନ ବିଭାଗରେ ବିଭକ୍ତ ହୋଇ ନୁହେଁ, ବରଂ ଏକ ସମନ୍ୱିତ ବ୍ୟବସ୍ଥା ଭାବେ କାର୍ଯ୍ୟ କରିବା ଆବଶ୍ୟକ ବୋଲି ସେ ମତ ଦେଇଛନ୍ତି। ଏବେ ତାଙ୍କ ଅନଲାଇନ୍ ପ୍ରାର୍ଥନାପତ୍ର ଉପରେ ଦିଲ୍ଲୀ ହାଇକୋର୍ଟ କି ପଦକ୍ଷେପ ନେଉଛନ୍ତି, ତାହା ଉପରେ ନଜର ରହିଛି।