ରୀତା, ଅମର, ଆକାଶଙ୍କ ମୁଣ୍ଡରେ ଖଣ୍ଡା

ବଦଳୁଛି ଯାଜପୁର ରାଜନୀତି ସମୀକରଣ
ଅମର ପାଇଁ କର ବା ମର ପରିସ୍ଥିତି
ସପ୍ତାହକ ଭିତରେ ନ ସୁଧୁରିଲେ ବିପଦ
ବାବୁଙ୍କୁ ମିଳିପାରେ ଲୋକସଭା ଟିକେଟ୍‍
ଭୁବନେଶ୍ୱର:ବଦଳୁଛି ଯାଜପୁର ଜିଲ୍ଲା ରାଜନୀତି ସମୀକରଣ । କାହାକୁ ଟିକେଟ୍‍ ଦିଆଯିବ, କିଏ ବଞ୍ଚିତ ହେବେ ସେ ନେଇ ବିଜେଡି ଶୀର୍ଷସ୍ତରରେ କସରତ ଚାଲିଥିବା ବେଳେ ତୃଣମୂଳସ୍ତରରେ ମଧ୍ୟ ନାନା କଳ୍ପନାଜଳ୍ପନା ପ୍ରକାଶ ପାଇଲାଣି । ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, କୋରେଇ, ବଡ଼ଚଣା ନିର୍ବାଚନମଣ୍ଡଳୀ ପ୍ରାର୍ଥୀଙ୍କ ପ୍ରତି ବିପଦ ରହିଛି । କେବଳ ସେତିକି ନୁହେଁ, ଯାଜପୁର ସାଂସଦ ରୀତା ତରାଇ ଆଉ ଥରେ ଲୋକସଭା ପ୍ରାର୍ଥୀ ହେବା ସମ୍ଭାବନା ମଧ୍ୟ କ୍ଷୀଣା
ନିର୍ବାଚନ ଯେତିକି ପାଖେଇ ଆସୁଛି, ବିଜେଡି ଆଭ୍ୟନ୍ତରୀଣ ରାଜନୀତି ସେତିକି ଗୋଳମାଳିଆ ଧରୁଛି । ପତିଆରା ଥାଉ କି ନ ଥାଉ, କର୍ମୀ ସାଙ୍ଗରେ ରୁହନ୍ତୁ ବା ନ ରୁହନ୍ତୁ, ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହେବା ଲାଗି ଯୁବକମାନଙ୍କ ଭିତରେ ପ୍ରବଳ ଆଗ୍ରହ ପରିଲକ୍ଷିତ ହେଉଛି । ବୟସ୍କ ଓ ବରିଷ୍ଠ ବି ଏଥିରୁ ବାଦ୍‍ ନାହାନ୍ତି । ଏ କ୍ଷେତ୍ରରେ ସେମାନେ ପ୍ରାରମ୍ଭିକ ଲବି ବିଜେଡି ପାଇଁ କରୁଛନ୍ତି । କାରଣ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପତିଆରାରେ ନିର୍ବାଚନ ବୈତରଣୀ ପାର ହେବା ଲାଗି ସମସ୍ତେ ଆଗ୍ରହୀ ।
ଆଜି ଦିନରେ ଯାଜପୁର ଜିଲ୍ଲାର ସମସ୍ତ ବିଧାନସଭା ଓ ଲୋକସଭା ଆସନ ବିଜେଡି ଦଖଲରେ ଅଛି । ହେଲେ ରାଜନୀତି ପାଣିପାଗକୁ ନିରେଖି ଦେଖିଲେ, ବଡ଼ଚଣା ଓ କୋରେଇରେ ଦଳ ପ୍ରତି ବିପଦ ଘନାଉଛି । ବଡଚଣାରେ ବିଜେଡି କର୍ମୀଙ୍କ ଅସନ୍ତୋଷ ଦେଖି ଏକାଧିକ ପ୍ରାର୍ଥୀ ମୁଣ୍ଡ ଟେକିଲେଣି । ସ୍ଥିତିରୁ ଫାଇଦା ଉଠାଇବା ଲାଗି କଂଗ୍ରେସ ତୟାର । ପୂର୍ବତନ ବିଧାୟକ ସୀତାକାନ୍ତ ମହାପାତ୍ର ଏବେ ଘମାଘୋଟ ଲଢେଇ ପାଇଁପ୍ରସ୍ତୁତ ଚଳାଇଛନ୍ତି । ବିଜେଡି ଶୀର୍ଷସ୍ତରରୁ ମିଳୁଥିବା ଖବର ଅନୁସାରେ, ଯଦି ଆସନ୍ତା ସପ୍ତାହେ ମଧ୍ୟରେ ବଡ଼ଚଣା ବିଧାୟକ ଅମର ପ୍ରସାଦ ଶତପଥୀ ଦଳର କର୍ମୀଙ୍କୁ ମନାଇବାରେ ବିଫଳ ହୁଅନ୍ତି, ତେବେ ତାଙ୍କ ପ୍ରତି ବିପଦ ସୁନିଶ୍ଚିତ । ଦଳ ତାଙ୍କ ପ୍ରାର୍ଥିତ୍ୱ ସଂପର୍କରେ ଆଉ ଥରେ ବିଚାର କରିପାର । ବରୀରେ ରାଜନୀତି ପାଣିପାଗ ବଦଳିଛି । କର୍ମୀଙ୍କୁ ମନେଇବାରେ ଦେବାଶିଷ ନାୟକ ଆପାତତଃ ସଫଳ ହୋଇଛନ୍ତି । ଅନ୍ୟପକ୍ଷରେ କୋରେଇରେ ବିଧାୟକ ଆକାଶ ଦାସ ନାୟକଙ୍କ ଉପରେ ଖଣ୍ଡା ଝୁଲୁଛି । ନିର୍ବାଚନ ରାଜନୀତିରେ ତାଙ୍କ ପ୍ରାର୍ଥିତ୍ୱ ସଂପର୍କରେ ଏଯାଏ ଠୋସ୍‍ ଚିତ୍ର ମିଳିପାରୁନାହିଁ । ଅନ୍ୟ ସବୁ ଆସନରେ ବିଧାୟକମାନଙ୍କୁ ଦଳ ଟିକେଟ୍‍ ଦେବାର ସମ୍ଭାବନା ଉଜ୍ଜଳ ।
ସେହିପରି ଯାଜପୁର ସାଂସଦ ରୀତା ତରାଇ ପାଞ୍ଚ ବର୍ଷ ପରେ ବି ସକ୍ରିୟ ହୋଇପାରିଲେ ନାହିଁ । ନିଜର ପତିଆରା ବଢାଇଲେନି । ଦଳକୁ ସମୃଦ୍ଧ କରିବାରେ ବି ତାଙ୍କର ଯୋଗଦାନ କମ ରହିଲା । ଏଥର ବିଜେଡି ତାଙ୍କୁ ଟିକେଟ୍‍ ଦେଇନପାରେ । ତାଙ୍କ ସ୍ଥାନରେ ପୂର୍ବତନ ଆରଡିସି ମହେନ୍ଦ୍ର ମଲ୍ଲିକଙ୍କ ନାମ ଚର୍ଚ୍ଚାରେ ଅଛି । କେବଳ ସେ ନୁହେଁ, ପୂର୍ବତନ ସାଂସଦ ମୋହନ ଜେନା, ସଚିବାଳୟରେ କାର୍ଯ୍ୟରତ ରାଜ୍ୟ ଅର୍ଥ ସେବାର ଜଣେ ପ୍ରଶାସନିକ ଅଧିକାରୀଙ୍କ ନାମ ନେଇ ବି ବିଚାର ଚାଲିଛି ।