ପ୍ରମୁଖ ଖବର

ଭୁବନେଶ୍ବର: ତଳସରା ବିଧାୟକ ଭବାନୀ ଭୋଇ ବିଜେପିର ଉପ ବାଚସ୍ପତି ପ୍ରାର୍ଥୀ
ନୂଆ ଆୟକର ବ୍ୟବସ୍ଥାରେ ବଦଳିଲା ଛାଡସୀମା, ପୁରୁଣା ବ୍ୟବସ୍ଥାରେ ଅପରିବର୍ତ୍ତିତ, ଷ୍ଟାଣ୍ଡାର୍ଡ ଡିଡକ୍ସନ ୭୫୦୦୦କୁ ବୃଦ୍ଧି
୧୫ ପ୍ରତିଶତ ସୀମା ଶୁଳ୍କ ହ୍ରାସ ନେଇ ଅର୍ଥମନ୍ତ୍ରୀଙ୍କ ଘୋଷଣା: ଶସ୍ତା ହେବ ସୁନା, ରୂପା, କ୍ୟାନ୍ସର ଔଷଧ, ମୋବାଇଲ
ଏଥର ବଜେଟ୍ ରେ ନୂଆ ଚାକିରିଆଙ୍କ ପାଇଁ ଖୁସି ଖବର, ତିନୋଟି କିସ୍ତିରେ ମିଳିବ ୧୫ ହଜାର

ନବୀନଙ୍କ ରାସ୍ତାରେ ସୂର୍ଯ୍ୟ କଣ୍ଟା

0

କାଳିଆ ସଫଳତାକୁ ଅଟକାଉଛି ଧାନ କିଣା ଅବ୍ୟବସ୍ଥା
ସୂର୍ଯ୍ୟଙ୍କ ବାମ ହାତ କଳଙ୍କ ଡାହାଣ ହାତ ସଫଳତାକୁ ପୋଛୁଛି
ଗାଁ ଗାଁରେ ତେଜିଲାଣି ଅସନ୍ତୋଷ, ମନ୍ତ୍ରୀ, ପ୍ରଶାସନ ବେଫିକର

ଭୁବନେଶ୍ୱର: ମନ୍ତ୍ରୀ ସୂର୍ଯ୍ୟନାରାୟଣ ପାତ୍ରଙ୍କ ହାତରେ ରହିଛି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ । ସମବାୟ ବିଭାଗର ମନ୍ତ୍ରୀ ମଧ୍ୟ ସେ । ରାଜ୍ୟ ସରକାର କାଳିଆ ଯୋଜନାକୁ ସବୁଠାରୁ ବଡ କାର୍ଯ୍ୟକ୍ରମ ହାତକୁ ନେଇଛନ୍ତି । ନିର୍ବାଚନ ରଣନୀତିରେ ଏହି ଯୋଜନା ଗେମ୍‍ ଚେଞ୍ଜର ହେବ ବୋଲି କୁହାଯାଉଛି । ଏହି ଦାୟିତ୍ୱଟି ସମବାୟ ବିଭାଗ ହାତରେ । କିନ୍ତୁ ବାସ୍ତବିକତା ହେଲା, ସୂର୍ଯ୍ୟଙ୍କ ବାମ ହାତର କଳଙ୍କ ଡାହାଣ ହାତର ସଫଳତାକୁ ପୋଛି ନେଲାଣି । ମନ୍ତ୍ରୀ ଅସହାୟ, ବେଫିକର ବି । ସରକାର ବିରୋଧରେ ଜନମତ ଥମିବା ବଦଳରେ ବଢିବାରେ ମନ୍ତ୍ରୀ ଏକ ପ୍ରମୁଖ ମାଧ୍ୟମ ପାଲଟିଛନ୍ତି ।
ସଂପ୍ରତି କାଳିଆ ଯୋଜନାକୁ ନେଇ ଗାଁ ଗଣ୍ଡାରେ ଲୋକମାନଙ୍କ ମଧ୍ୟରେ ନାହିଁ ନଥିବା ଆଗ୍ରହ ସୃଷ୍ଟି ହୋଇଛି । ବିରୋଧୀ ଏହାକୁ ଯେତେ ବିରୋଧ କଲେ ବି ଲୋକଙ୍କ ଭିତରେ ଏହା ସେତେଟା ପ୍ରଭାବ ପକାଇ ପାରୁନାହିଁ । ସମବାୟ ବିଭାଗର ଏହି ସଫଳତାକୁ କିନ୍ତୁ ସୂର୍ଯ୍ୟଙ୍କ ମୂଳ ବିଭାଗ ଅର୍ଥାତ୍‍ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପ୍ରତିଦିନ ମୋଡି ମକଚି ଦେବାରେ ଲାଗିଛି । ନିର୍ବାଚନ ବର୍ଷରେ ଧାନ ସଂଗ୍ରହ ବ୍ୟବସ୍ଥାରେ ଦେଖା ଦେଇଥିବା ଅବ୍ୟବସ୍ଥା ଏବେ ଗାଁ କୁ ଗାଁ ଡେଇଁବାରେ ଲାଗିଲାଣି ।
ସବୁଠାରୁ ବଡ କଥା ହେଲା, କଟନି ଛଟନି ବାବଦରେ ସର୍ବନିମ୍ନ ୩ ପ୍ରତିଶତ କାଟି ଦିଆଯାଉଛି । ମନ୍ତ୍ରୀ ସଚିବାଳୟରେ ବସି ଯେତେ ତମ୍ୱିତୋଫାନ କଲେ ବି ବିଭାଗୀୟ ଅଧିକାରୀଙ୍କ ଉପରେ ଏହାର ସାମାନ୍ୟତମ ପ୍ରଭାବ ପଡୁନାହିଁ । ସବୁଠାରୁ ବଡ଼ କଥା ହେଲା, ଜିଲ୍ଲା ପ୍ରଶାସନ ଓ ଯୋଗାଣ ବିଭାଗ ଅଧିକାରୀମାନେ କେଉଁଠାରେ ବି ଚଢଉ କରୁନାହାନ୍ତି । କୋଟା ଆବଣ୍ଟନ କରି ବସିଯାଇଛନ୍ତି । ୨୪ ଘଣ୍ଟା ତ ଦୂରର କଥା, ୮ ଦିନ ପର୍ଯ୍ୟନ୍ତ ଆକାଉଣ୍ଟରେ ଟଙ୍କା ଜମା ହେଉନାହିଁ । କେବଳ ସେତିକି ନୁହେଁ, ମନଇଚ୍ଛା ମଣ୍ଡି ଖୋଲୁଛିି, ବନ୍ଦ ବି ସେମିତି ହେଉଛି । ଚାଷୀ ନାହିଁନଥିବା ଦୁର୍ଦଶାର ଶିକାର ହେଉଛନ୍ତି । ଗାଁ ଗଣ୍ଡାରେ ସରକାରଙ୍କ ବିରୋଧରେ ଏହି ଅବ୍ୟବସ୍ଥାଟି ସ୍ୱର ତେଜିବାରେ ସାହାଯ୍ୟ କଲେଣି । ଗଞ୍ଜାମ ଜିଲ୍ଲା ଠାରୁ ଆରମ୍ଭ କରି ପୁରୀ ସବୁଆଡେ ଏହାକୁ ନେଇ ଚିତ୍କାର ଶୁଭିଲାଣି । ଗୁରୁବାର ମୁଖ୍ୟମନ୍ତ୍ରୀଙ୍କ ଜିଲ୍ଲା ତଥା ଯୋଗାଣ ମନ୍ତ୍ରୀଙ୍କ ନିଜ ଜିଲ୍ଲାରେ ବୁଗୁଡାରେ ଅନୁରୂପ ପରିସ୍ଥିତି ସୃଷ୍ଟି ହୋଇଛି । ଚାଷୀ ରାଜରାସ୍ତାକୁ ସିନା ଓହ୍ଲାଇଲେ,କିନ୍ତୁ ମନ୍ତ୍ରୀଙ୍କ ନଜରରେ ନିଜ ଜିଲ୍ଲାର ଏ ଅବ୍ୟବସ୍ଥା ପଡିଲା ନାହିଁ ।
ଏଠାରେ ପ୍ରକାଶଥାଉକି, ଗାଁ ଗଣ୍ଡାର ଏହି ଅସନ୍ତୋଷକୁ କଂଗ୍ରେସ ପୁଞ୍ଜି କରିଛି । ଗୋଟିଏ ପଟେ ରାହୁଲ ଗାନ୍ଧୀ ସରକାରକୁ ଆସିଲେ କ୍ୱିଣ୍ଟାଲ ପିଛା ୨୬୦୦ ଟଙ୍କା ଧାନର ମୂଲ୍ୟ ବାବଦରେ ଦିଆଯିବ ବୋଲି ଘୋଷଣା କରିଛନ୍ତି । ଅନ୍ୟପଟରେ ଚାଷୀକୁ ଋଣ ଛାଡର ସ୍ୱପ୍ନ ବି ଦେଖାଇଛନ୍ତି । ଏମିତି ଅବ୍ୟବସ୍ଥା ଲାଗି ରହିଲେ, ଗାଁ ଗଣ୍ଡାରେ ଜନମତବଦଳିବାକୁ ବେଶୀ ସମୟ ଲାଗିବ ନାହିଁ ବୋଲି ରାଜନୈତିକ ମହଲ ମତ ରଖୁଛନ୍ତି ।

Leave A Reply

Your email address will not be published.