ନୂଆ ଖେଳ ଆରମ୍ଭ କଲେ ବୈଜୟନ୍ତ

ଭୁବନେଶ୍ୱର: ପୁଣି ଚର୍ଚ୍ଚାକୁ ଆସିଛନ୍ତି ପୂର୍ବତନ ସାଂସଦ ବୈଜୟନ୍ତ ପଣ୍ଡା । ବାହମାସ୍‍ ଟିକସ ଠକେଇ ଭଳି ଘଟଣାରେ ବିଜେଡି ଏବେ ତାଙ୍କୁ ଘେରିଛି । କେବଳ ସେତିକି ନୁହେଁ, କେନ୍ଦ୍ର ସରକାର କାହିଁକି ଏହି ଘଟଣାରେ ତଦନ୍ତ କରୁନାହାନ୍ତି ବୋଲି ପ୍ରଶ୍ନ ଉଠାଇବା ସହିତ ଦଳ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିରବତା ଉପରେ ପ୍ରଶ୍ନଚିହ୍ନ ଆଙ୍କିଛି ।
ଅନ୍ୟପଟେ ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ବିଜେଡିର ଏହି ପୂର୍ବତନ ସାଂସଦ କେନ୍ଦ୍ରାପଡାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚେକ୍‍ ଦେବା ଲାଗି ଅଣ୍ଟା ଭିଡିଲେଣି । ଏମିତି ରଣନୀତି ଆପଣାଇଛନ୍ତି, ଯେଉଁଥିରେ ଲାଭ ବିଜେପି କିମ୍ୱା କଂଗ୍ରେସ ନେବ ସିନା, ହେଲେ ବିଜେଡିକୁ ସେ ପାନେ ଚଖେଇବେ । କେନ୍ଦ୍ରାପଡାରେ ଲୋକସଭା ଆସନରେ ସେ ପ୍ରାର୍ଥୀ ହେବା ଲାଗି ନିଷ୍ପତ୍ତି ନେଇ କ୍ୟାମ୍ପ ଖୋଲିଲେଣି । ଜିତନ୍ତୁ କି ହାରନ୍ତୁ, ସ୍ପଷ୍ଟ ବାର୍ତା ଦେବାକୁ ଚାହୁଁଛନ୍ତି ଯେ ସେ କେନ୍ଦ୍ରାପଡା ଲୋକଙ୍କ ସହ ରହିବେ ଓ ସେଇଠିି ରାଜନୀତି କରିବେ । ବିଜେଡି ଭୋଟ ବିଭାଜନ କରିବା ସହିତ ଶଙ୍ଖ ପ୍ରାର୍ଥୀଙ୍କୁ ପରାଜୟ ମୁହଁକୁ ଠେଲିଦେବେ । କେବଳ ସେତିକି ନୁହେଁ, ସେ କଂଗ୍ରେସ ଶିବିର ସହିତ ସଂପର୍କରେ ଥିବା ମଧ୍ୟ ସୂଚନା ମିଳିଛି । ଯଦି କଂଗ୍ରେସ ସେଠାରେ ତାଙ୍କୁ ସମର୍ଥନ କରେ, ପ୍ରତିଦାନରେ ସେ ଜିଲ୍ଲାର ବିଭିନ୍ନ ବିଧାନସଭାରେ ହାତ ଚିହ୍ନକୁ ସମର୍ଥନ ଦେବାକୁ କୁଣ୍ଠାବୋଧ କରିବେ ନାହିଁ ।
ବୈଜୟନ୍ତଙ୍କ ଏଭଳି ରଣନୀତିକୁ ନେଇ ରାଜନୈତିକ ମହଲରେ ତର୍ଜମା ଆରମ୍ଭ ହୋଇଗଲାଣି । ଏହାର କି କି ପ୍ରଭାବ ପଡିବ, କିଏ ଲାଭବାନ ହେବେ, ଆଉ କାହାକୁ କ୍ଷତି ସହିବାକୁ ପଡିବ ତାହା ମଧ୍ୟ ହିସାବ କରାଯାଉଛି । ବିଶେଷକରି ବିଜୟ ମହାପାତ୍ର ଏବେ ବି ବିଜେଡିକୁ ଯିବେ କି ଅନ୍ୟ କୌଣସି ବିକଳ୍ପ ପଦକ୍ଷେପ ନେବେ, ତାହା ସ୍ପଷ୍ଟ କରିନଥିବାରୁ କେନ୍ଦ୍ରାପଡା ୨୦୧୯ରେ ସବୁଠାରୁ ଚର୍ଚ୍ଚିତ ଆସନ ହୋଇପାରେ ବୋଲି ମଧ୍ୟ ରାଜନୈତିକ ପଣ୍ଡିତମାନେ ଭବିଷ୍ୟବାଣୀ କଲେଣି ।
ଏହି ମହଲର କହିବା କଥା ହେଉଛି, ବିଜୟ ଯଦି ବିଜେଡିକୁ ନ ଯାନ୍ତି, ତେବେ ଶେଷ ମୁହୂର୍ତରେ ଉଭୟ ବିଜୟ-ବୈଜୟନ୍ତ ହାତ ମିଳାଇପାରନ୍ତି । କାରଣ ବିଜୟଙ୍କ ପାଇଁ ପାଟକୁରା ବିଧାନସଭା ଆସନରୁ ବିଜୟୀ ହେବା ପାଇଁ ଡେରାବିଶ ବାରମ୍ୱାର ପ୍ରତିବନ୍ଧକ ସାଜୁଛି । ସେ ଯଦି ଗରଦପୁର ଓ ମାର୍ଶାଘାଇରେ ଶ୍ରୀ ପଣ୍ଡାଙ୍କୁ ସାହାଯ୍ୟ କରନ୍ତି, ତେବେ ପ୍ରତିବଦଳରେ ଅସନ୍ତୁଷ୍ଟ ବିଜେଡି ଭୋଟକୁ ହାତେଇପାରିବେ । ଉଭୟ ମିଶିଲେ, ଉପକୂଳର ସବୁଠାରୁ ସମ୍ୱେଦନଶୀଳ ଜିଲ୍ଲାରୁ ସରକାର ବିରୋଧରେ ଏକ ବଡ ଜନମତ ତିଆରି କରିଦେବା ବିଚିତ୍ର ନୁହେଁ । ସେହିଭଳି ଜିଲ୍ଲାରେ ବିଜୟଙ୍କ ଲୋକ ଯଦି ବୈଜୟନ୍ତଙ୍କୁ ସମର୍ଥନ କରନ୍ତି ତେବେ ବିଜେଡି ପ୍ରାର୍ଥୀକୁ ସେ ଯେ ମୁକାବିଲା ଦେଇପାରିବେ, ତାହାକୁ ମଧ୍ୟ ଟାଳିଦେଇ ହେବ ନାହିଁ । କାରଣ ନବୀନ ପଟ୍ଟନାୟକଙ୍କ ନାମରେ ଭୋଟ ଥିଲେ ହେଁ, ସ୍ଥାନୀୟ ନେତାଙ୍କ ବିରୋଧରେ ଅସନ୍ତୋଷ ଦିନକୁ ଦିନ ବଢିବାରେ ଲାଗିଛି । ଏକାଧିକ ନେତା ଟିକେଟ ଆଶାୟୀ ହୋଇଥିବାରୁ ବିଦ୍ରୋହୀଙ୍କ ସଂଖ୍ୟା ମଧ୍ୟ ଅନୁରୂପ ଭାବେ ବଢିବ । ଏସବୁକୁ ବୈଜୟନ୍ତଙ୍କୁ ପରୋକ୍ଷରେ ସୁହାଇପାରେ ।
ଏଠାରେ ପ୍ରକାଶଥାଉକି, ବୈଜୟନ୍ତ ନିଜେ କେନ୍ଦ୍ରାପଡାରୁ ବିଜେଡିକୁ ମୁକାବିଲା କରିବା ପାଇଁ ଅସ୍ତ୍ର ଧରିବେ । କିନ୍ତୁ ରାଜ୍ୟର ପାଖାପାଖି ଆଉ ଆଠ ଦଶଟି ଆସନରେ ବିଜେଡି ଭୋଟ ବିଭାଜନରେ ମଧ୍ୟ ନିଜ ବୁଦ୍ଧି ଲଗାଇପାରନ୍ତି ।