ଗମାଙ୍ଗ ଦଳ ଛାଡିଲେ, ପ୍ରଶାନ୍ତ ଦ୍ୱନ୍ଦ୍ୱରେ

ବିଜେଡିରେ ଘଡିକେ ଘୋଡା ଛୁଟୁଛି
ରଘୁନନ୍ଦନ ଦାସ ବିଜେଡିକୁ ଫେରିବେ
ତ୍ରିନାଥ ଖୁବ୍‍ ଶୀଘ୍ର ବିଜେପି ଯାଇପାରନ୍ତି
ଭୁବନେଶ୍ୱର: ଗୁଣୁପୁର ବିଧାୟକ ତ୍ରିନାଥ ଗମାଙ୍ଗ ଆଜି ବିଜେଡିରୁ ଇସ୍ତଫା ଦେଇଛନ୍ତି । ମୁଖ୍ୟମନ୍ତ୍ରୀ ତଥା ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କୁ ସେ ତାଙ୍କର ଇସ୍ତଫା ପଠାଇଛନ୍ତି । ବିଜେଡି ତାଙ୍କୁ ବାଦ୍‍ ଦେଇ ଗୁଣୁପୁର ଆସନରୁ ରଘୁନାଥ ଗମାଙ୍ଗଙ୍କୁ ପ୍ରାର୍ଥୀ କରୁଥିବା ଜାଣି ସେ ଏଭଳି ପଦକ୍ଷେପ ନେଇଛନ୍ତି । ବିଶ୍ୱସ୍ତ ସୂତ୍ରରୁ ମିଳୁଥିବା ସୂଚନା ମୁତାବକ, ଶ୍ରୀ ଗମାଙ୍ଗ ବିଜେପିକୁ ଯାଇପାରନ୍ତି ।
ସେପଟେ ଯେ କୌଣସି ମୁହୂର୍ତରେ ବିଜେପି ନେତା ରଘୁନନ୍ଦନ ଦାସ ବିଜେଡିରେ ଯୋଗ ଦେଇପାରନ୍ତି । ଡାକ୍ତର ଦାମୋଦର ରାଉତ ବିଜେପିରେ ଯୋଗଦେବା ସହିତ ଏରସମା ବାଲିକୁଦାରୁ ପ୍ରାର୍ଥୀ ହେବେ ବୋଲି ନିଷ୍ପତ୍ତି ନେବା ପରେ ରଘୁନନ୍ଦନ ପୁଣି ଥରେ ବିଜେଡିକୁ ଫେରିବେ । ଏ ନେଇ ବିଜେଡି ଶୀର୍ଷ ନେତୃତ୍ୱ ସହିତ ଆଲୋଚନା ହୋଇଛି । ତେବେ ସ୍ଥାନୀୟ ବିଧାୟକ ପ୍ରଶାନ୍ତ ମୁଦୁଲିଙ୍କୁ ଟିକେଟ୍‍ ମିଳିବା ସମ୍ଭାବନା କ୍ଷୀଣ ବୋଲି ସୂଚନା ମିଳିଛି । ଏରସମା ବାଲିକୁଦାରୁ ଶ୍ରୀ ଦାସଙ୍କୁ ଦଳ ଲଢାଇବାକୁ ବିଚାର ଚାଲିଛି । ସେପଟେ ମହାନଦୀ ବଞ୍ଚାଅ ଆନ୍ଦୋଳନର ନେତା ଲଳିତ ପଟ୍ଟନାୟକ କଂଗ୍ରେସରୁ ଇସ୍ତଫା ଦେଇଛନ୍ତି ।
ଉଲ୍ଲେଖଯୋଗ୍ୟ, ନିକଟରେ ସାଂସଦ ବଳଭଦ୍ର ମାଝୀ ଓ ବିଧାୟକ ସୁକାନ୍ତ ପ୍ରଧାନ ବିଜେଡିରୁ ଇସ୍ତଫା ଦେଇଛନ୍ତି ।