ପୁରୀରେ ୧୫୦ କିଲୋମିଟର ବେଗରେ ପବନ
ବ୍ରହ୍ମପୁରରେ ସର୍ବାଧିକ ବର୍ଷା, ୮୫ କିଲୋମିଟର ଛୁଇଁଲାଣି ପବନ
ଭୁବନେଶ୍ୱରରେ ବର୍ଷା ଓ ପବନ ଆରମ୍ଭ
ଭୁବନେଶ୍ୱର: ଭୀଷଣରୁ ଭୀଷଣ ଅବସ୍ଥାରେ ସାମୁଦ୍ରିକ ବାତ୍ୟା ଫନି ଏବେ ଭୟାନକ ରୂପ ଧରି ପୁରୀ ଉପକୂଳ ଅଞ୍ଚଳକୁ ମାଡି ଆସୁଛି । ଯେ କୌଣସି ମୁହୂର୍ତରେ ଏହା ଉପକୂଳ ଛୁଇଁବାର ସମ୍ଭାବନା ଅଛି । ସକାଳ ୭ଟା ରିପୋର୍ଟ ଅନୁସାରେ, ଏହା ପୁରୀ ଠାରୁ ୭୫ କିଲୋମିଟର ଓ ଗୋପାଳପୁର ଠାରୁ ୬୫ କିଲୋମିଟର ଦୂରରେ ରହିଛି । ବର୍ତମାନ ସେଠାରେ ପବନର ବେଗ ଘଣ୍ଟାପ୍ରତି ୨୦୫ କିଲୋମିଟର ପର୍ଯ୍ୟନ୍ତ ରହିଛି ।
ଏପଟେ ପୁରୀ ଓ ଗୋପାଳପୁରରେ ପବନର ବେଗ ଯଥାକ୍ରମେ ଘଣ୍ଟାପ୍ରତି ୧୫୦କିଲୋମିଟର ଓ ୮୫ କିଲୋମିଟର ରହିଛି । ପ୍ରବଳରୁ ପ୍ରବଳ ବର୍ଷା ଆରମ୍ଭ ହୋଇଛି । ସେହିପରି ରାଜଧାନୀ ଭୁବନେଶ୍ୱରରେ ମଧ୍ୟ ବର୍ଷା ଓ ପବନ ଜାରି ରହିଛି । ଗୋପାଳପୁରରେ ବର୍ତମାନ ସୁଦ୍ଧା ୧୬୦ ମିଲିମିଟର ବର୍ଷା ହୋଇସାରିଲାଣି । ସେହିପରି ପୁରୀରେ ୧୦୦ ମିଲିମିଟର ଓ ଭୁବନେଶ୍ୱରରେ ୫୦ ମିଲିମିଟର ବର୍ଷା ରେକର୍ଡ କରାଯାଇଛି ।
ପୁରୀ ପେଣ୍ଠକଟା ବସ୍ତିରେ ପାଣି ପଶିଯାଇଛି । ରାସ୍ତା ଠାରୁ ୧୫ ଫୁଟ ଦୂରରେ ସମୁଦ୍ର ରହିଥିବା ଲକ୍ଷ୍ୟ କରାଯାଉଛି । ୬ ଫୁଟରୁ ଅଧିକ ଉଚ୍ଚର ଜୁଆର ଉଠୁଛି ।
ଏହା ଯେ କୌଣସି ମୁହୂର୍ତରେ ଉତ୍ତର ଉତ୍ତର ପୂର୍ବ ଦିଗକୁ ଗତି କରି ପୁରୀ ଉପକୂଳ ସ୍ପର୍ଶ କରିବ । ସର୍ବାଧିକ ୨୦୦ କିଲୋମିଟର ପବନର ବେଗ ରହିବ ବୋଲି ପାଣିପାଗ ବିଭାଗ ସୂଚାଇଛି ।
ସରକାରୀ ସୂଚନା ମୁତାବକ, ୧୦ଲକ୍ଷ ଲୋକଙ୍କୁ ସ୍ଥାନାନ୍ତର ସରିଛି । ଭୁବନେଶ୍ୱରରେ ମଧ୍ୟ ୧୫ହଜାର ଲୋକ ବିଭିନ୍ନ ଆଶ୍ରୟସ୍ଥଳୀରେ ଅଛନ୍ତି ।