ଭୁବନେଶ୍ୱର: କିଏ କହିଲା ୩୦ ହଜାରରୁ କମିବନି । କିଏ କହିଲା ୩୫ ହଜାର ନିଶ୍ଚିତ । କିନ୍ତୁ ପାଟକୁରାରୁ ଯେଉଁ ରାୟ ଆସିଲା, ତାହା ସମସ୍ତଙ୍କ ଦମ୍ଭ ଭାଙ୍ଗିଦେଇଛି । ବିଜେପି ପ୍ରାର୍ଥୀ ବିଜୟ ମହାପାତ୍ର ହାରିଛନ୍ତି । ପାଟକୁରା ସ୍ୱାଭିମାନ କଥା କହିି ଲୋକଙ୍କୁ ଭୋଟ ମାଗୁଥିଲେ । ଲୋକେ ଏହି ପ୍ରସଙ୍ଗକୁ ପ୍ରତ୍ୟାଖ୍ୟାନ କଲେ । ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରଵାଲ ଜିତିଲେ । ହେଲେ ବିଜେଡି ମୁଖିଆମାନେ ହାରିଗଲେ । ବିପୁଳ ଭୋଟ ବ୍ୟବଧାନରେ ବିଜୟଙ୍କୁ ହରାଇବେ ବୋଲି ଯେଉଁ ବାହାସ୍ଫୋଟ ମାରୁଥିଲେ, ସେମିତି ହେଲାନି । ୪୦ରୁ ଅଧିକ ନେତା ବିଧାନସଭା ଛାଡି ପାଟକୁରାରେ ଡେରା ପକାଇଥିଲେ । ୧୦ ମନ୍ତ୍ରୀ ସରକାରଙ୍କ ସବୁ ସୁବିଧା ସୁଯୋଗ ଉପଭୋଗ କରିବା ସତ୍ତ୍ୱେ ରାଜ କାର୍ଯ୍ୟ ଛାଡି ଦଳ କାର୍ଯ୍ୟରେ ମାତି ସେଠାରେ ଦୁଅାର ଦୁଆର ବୁଲିଥିଲେ । ଭୋଟ ବ୍ୟବଧାନ ୨୦ ହଜାର ଟପି ପାରିଲାନି ।
ସମ୍ଭବତଃ ନବୀନ କେନ୍ଦ୍ରାପଡା ନ ଯାଇଥିଲେ, ବିଜେଡି ବିଜୟକୁ ହରାଇବାରେ ସଫଳ ହୋଇନଥାନ୍ତା । ଏମିତି ଏକ ପ୍ରଶ୍ନ ଏବେ ରାଜନୈତିକ ମହଲରେ ଚର୍ଚ୍ଚାର ବିଷୟ ହେଲାଣି ।
ଏହି ମହଲର କହିବା କଥା, ଆଜିର ବିଜୟ ଫଳରେ ବିଜୟଙ୍କୁ ବିଧାନସଭାକୁ ରୋକିବାରେ ନବୀନ ସକ୍ଷମ ହୋଇଛନ୍ତି । କିନ୍ତୁ ପ୍ରମାଣିତ ହୋଇଛି, ତାଙ୍କ ଛଡା ଭୋଟ ହାତେଇବାର କୌଣସି ଶକ୍ତି ବିଜେଡି ନେତାମାନଙ୍କର ନାହିଁ । ବିଶେଷକରି ବିଜେଡିର ଯୁବ ନେତାମାନେ ଏ କ୍ଷେତ୍ରରେ ଫେଲ୍ । ବିଜେପି ଯେଉଁ ଅଭିଯୋଗ କରୁଥିଲା ଯେ ବିଜେଡିର ଅନେକ ନେତା ତାଙ୍କ ପାଇଁ କାମ କରୁଛନ୍ତି, ତାହା ମଧ୍ୟ ଅମୂଳକ ନଥିଲା । ଅନ୍ୟଥା ଭୋଟ ବ୍ୟବଧାନ କମିଲା କେମିତି । ଗତ ପଞ୍ଚାୟତ ନିର୍ବାଚନରେ ବି ସେମିତି ହୋଇଥିଲା । ବିଜେଡି ସୁପ୍ରିମୋ ଗଲେ ନାହିଁ ବୋଲି ବିଜେପି ଦୋହଲାଇ ଦେଲା । ନବୀନ ଏକା ଷ୍ଟାର ପ୍ରଚାରକ ହୋଇ ଗତ ନିର୍ବାଚନରେ ବିଜେପିକୁ ତାର ସୀମା ଦେଖାଇଦେଲେ । ୨୩ ଆସନରେ ଅଟକିଲା ଦଳ । କେନ୍ଦ୍ରାପଡାରେ ବୈଜୟନ୍ତଙ୍କୁ ଲକ୍ଷାଧିକ ଭୋଟରେ ହରାଇଲେ ଅନୁଭବ ମହାନ୍ତି, ବାହାରୁ ଯାଇ । କେନ୍ଦ୍ରାପଡାରେ ବି ସେୟା ହେଲା । ତତ୍କାଳୀନ ଅର୍ଥମନ୍ତ୍ରୀ ଶଶିଭୂଷଣ ବେହେରାଙ୍କୁ ନେଇ ପ୍ରାର୍ଥୀ କରାଇଲେ ଓ ନବୀନ ଜିତାଇଲେ । ବିଜେଡିି ୧୧୧ ଆସନ ଦଖଲ କରିଥିଲା । ଆଜିକୁ ମିଶାଇଲେ ୧୧୨ ହେଲ ।
ବିଶ୍ୱସ୍ତ ସୂତ୍ରରୁ ମିଳିଥିବା ସୂଚନା ମୁତାବକ, ବିଜୟ ପାଇଁ ନବୀନ ଖୁସି ଅଛନ୍ତି । କିନ୍ତୁ ଭୋଟ ବ୍ୟବଧାନ ହାର କମିବା ଘଟଣା ତାଙ୍କୁ ବିଚଳିତ କରିଛି । ଯଦି କେହି ନ ରହି ଶଶୀ ଏତେ ଭୋଟରେ ଜିତିଲେ, ତେବେ ବିଜୟଙ୍କ କ୍ଷେତ୍ରରେ ଏମିତି କେମିତି ହେଲା । ତା ଅର୍ଥ ୨୦ ବର୍ଷ ଦୂରେଇବା ପରେ ବି ବିଜୟଙ୍କ ଶକ୍ତି ଏବେ ବି ଅଛି ।
ଆଜି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି ବିଜେଡିକୁ ଛିଗୁଲାଇଛନ୍ତି । ବିଜେଡି ନେତାଙ୍କ ଦମ୍ଭୋକ୍ତି ଉପରେ ପ୍ରଶ୍ନ ଉଠାଇଛନ୍ତି । ହେଲେ ଦାୟିତ୍ୱ ନେଇଥିବା ବିଜେଡି ନେତା ପୂର୍ବଭଳି ମୁହଁଫୁଟାଣି ମାରିପାରିନାହାନ୍ତି । ବିଜେପି ପୂର୍ଣମାତ୍ରାରେ ଶକ୍ତି ପ୍ରୟୋଗ କଲାନାହିଁ । ତା ସତ୍ତ୍ୱେ ମାତ୍ର ୧୭ ହଜାର ୬୫୫ ଖଣ୍ଡ ଭୋଟ ବ୍ୟବଧାନ , ସେମାନଙ୍କ ମୁହଁ ଚୁପ୍ କରିଦେଇଛି ।