- ମନ କି ବାତ୍ରେ ମୋଦୀ କହିଲେ ମହାତ୍ମାଗାନ୍ଧୀଙ୍କ କଥା
- ପାଠ୍ୟକ୍ରମରେ ସାମିଲ କରିବା ନେଇ ଆନ୍ତରିକତା ନାହିଁ
- ଠୋସ୍ କାର୍ଯ୍ୟକ୍ରମ ହାତକୁ ନେଇପାରୁନାହାନ୍ତି କେନ୍ଦ୍ର-ରାଜ୍ୟ
ଭୁବନେଶ୍ୱର: ୧୫୦ତମ ଜନ୍ମ ବର୍ଷରେ ମହାତ୍ମାଗାନ୍ଧୀଙ୍କୁ ନେଇ ସମଗ୍ର ଦେଶରେ ଚର୍ଚ୍ଚା ଆଲୋଚନା ଜାରି ରହିଛି । ଏହା ସତ୍ତ୍ୱେ ମହାତ୍ମାଙ୍କୁ ଦେଶ ନିର୍ଦିଷ୍ଟ ପରବର୍ତୀ ପିଢୀ ନିକଟକୁ କେଉଁ ଢଙ୍ଗରେ ନେବ, ସେ ନେଇ ଏଯାଏ ନା କେନ୍ଦ୍ର ସରକାର ନା ରାଜ୍ୟ ସରକାର ଖସଡା ପ୍ରସ୍ତୁତ କରିପାରୁନାହାନ୍ତି । ବରଂ ବିଭିନ୍ନ ପ୍ରସଙ୍ଗକୁ ନେଇ ଗାନ୍ଧୀବାଦୀ ନେତା ଓ ବିଜେପି ମଧ୍ୟରେ ବିତର୍କ ମୁଣ୍ଡ ଟେକିବାରେ ଲାଗିଲାଣି । ଠିକ୍ ଏମିତି ସମୟରେ ଆଜି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମନ କି ବାତ୍ କାର୍ଯ୍ୟକ୍ରମରେ ଦେଶ ସମ୍ମୁଖରେ ଏକ ବଡ଼ ଆହ୍ୱାନ ରଖିଛନ୍ତି । କହିଛନ୍ତି, ଆମେ ବାପୁଙ୍କ ଆଦର୍ଶକୁ ଜୀବନର ମନ୍ତ୍ର କରିବାକୁ ସଂକଳ୍ପ ନେବାଆବଶ୍ୟକ ।
ପରଧାନମନ୍ତ୍ରୀଙ୍କ ଏଭଳି ମନ୍ତବ୍ୟ ପରେ ଏବେ ଉଭୟ କେନ୍ଦ୍ର ଓ ରାଜ୍ୟ ସରକାର ପରବର୍ତୀ କି ଆଭିମୁଖ୍ୟ ନେବେ ତାହା ଉପରେ ସମସ୍ତଙ୍କ ଲକ୍ଷ୍ୟ ରହିଛି । ବୁଦ୍ଧିଜୀବୀମାନଙ୍କର କହିବାନୁସାରେ, ଦୁର୍ନୀତି ମୁକ୍ତ ଭାରତ ଗଠନ କରିବାକୁ ହେଲେ ପିଲାଟି ବେଳୁ ମହାତ୍ମାଗାନ୍ଧୀଙ୍କ ଜୀବନାଦର୍ଶରେ ସମସ୍ତଙ୍କୁ ବାନ୍ଧି ରଖିବାକୁ ହେବ । ଅତିକମରେ ତୃତୀୟ ଶ୍ରେଣୀରୁ ଦଶମ ଶ୍ରେଣୀ ଯାଏ ମହାତ୍ମାଗାନ୍ଧୀଙ୍କୁ ପାଠ୍ୟପୁସ୍ତକରେ ସାମିଲ କଲେ ଏହାର ଏକ ବଡ଼ ପ୍ରଭାବ ଛାତ୍ରଛାତ୍ରୀମାନଙ୍କ ଉପରେ ପଡିବ ଓ ପରବର୍ତୀ ପିଢୀର ଯୁବ ସମାଜ ଆଦର୍ଶବାଦର ପ୍ରତୀକ ହେବେ, ଏଥିରେ ସନ୍ଦେହ ନାହିଁ ।
କୌତୂହଳର କଥା ହେଲା, ଭାରତ ସରକାର ୧୫୦ ତମ ଜୟନ୍ତୀ ଉତ୍ସବକୁ ବର୍ଷେ ପାଇଁ ପାଳନ କରିବାକୁ ସ୍ଥିର କରିଛନ୍ତି । ଓଡ଼ିଶା କ୍ଷେତ୍ରରେ ଏ କ୍ଷେତ୍ରରେ ଆଉ ଦୁଇ ପାଦ ଆଗକୁ ଯାଇଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅହିଂସା ଶଦ୍ଦକୁ ସମ୍ୱିଧାନରେ ମୁଖବନ୍ଧରେ ଯୋଡିବା ଲାଗି ପ୍ରସ୍ତାବ ଦେଇଛନ୍ତି, ଏପଟେ ଦୁଇ ବର୍ଷ ଧରି ଏହି ଉତ୍ସବ ପାଳନ ନିଷ୍ପତ୍ତି ହୋଇଛି । ହେଲେ ସରକାରଙ୍କ ଆନ୍ତରିକତା କାର୍ଯ୍ୟାନ୍ୱୟନ ମଧ୍ୟରେ ଅନ୍ତର ଦେଖାଦେଉଥିବା କାରଣରୁ ଏସବୁ ଏବେ ବି କାଗଜପତ୍ରରେ ରହିଛି । ସରକାରଙ୍କ ଆଭିମୁଖ୍ୟ ବାସ୍ତବ ରୂପ ନେଇପାରୁନାହିଁ ।
ଉଲ୍ଲେଖଥାଉକି, ମହାତ୍ମାଗାନ୍ଧୀଙ୍କୁ ନେଇ ଗତ ବିଧାନସଭାରେ ବିଜେପି-ବିଜେଡି ମୁହାଁମୁହିଁ ହୋଇଥିଲେ । ନାଥୁରାମ୍ ଗଡ୍ସେଙ୍କୁ ନେଇ ମଧ୍ୟ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଓ ବିରୋଧୀ ଦଳ ଉପନେତା ବିଷ୍ଣୁ ସେଠୀଙ୍କ ମଧ୍ୟରେ କଥା କଟାକଟି ହୋଇଥିଲା । ରାଜ୍ୟ ସରକାର ଇତିମଧ୍ୟରେ ମହାତ୍ମାଗାନ୍ଧୀଙ୍କ ପରଶମଣି ଲୋକସେବା ଭବନରେ ସ୍ଥାପିତ କରିଛନ୍ତି । ଏପଟେ କିନ୍ତୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ମନ କି ବାତ୍ରେ ମହାତ୍ମାଗାନ୍ଧୀଙ୍କୁ ନେଇ ଅନେକ ମତ ରଖିଛନ୍ତି, ଯାହା ଆଲୋଡନ ସୃଷ୍ଟି କଲାଭଳି ।
ପ୍ରଧାନମନ୍ତ୍ରୀ ଶ୍ରୀ ମୋଦୀ ଆଜି ଅତ୍ୟନ୍ତ ସ୍ପଷ୍ଟ ଭାଷାରେ କହିଛନ୍ତି, ଶ୍ରୀକୃଷ୍ଣ ଯେପରି ସୁଦର୍ଶନ ଚକ୍ର ଧାରଣ କରୁଥିଲେ, ମହାତ୍ମାଙ୍କ ହାତରେ ସେହିଭଳି ଚରଖା ଥିଲା । ମହାତ୍ମାଗାନ୍ଧୀଙ୍କ ପାଇଁ ସେବା ପରମ ଧର୍ମ ଥିଲା । ସେ ସେବା ଶଦ୍ଦକୁ ସେ ସାର୍ଥକ କରିଛନ୍ତି । ସମ୍ଭବତଃ ପ୍ରଧାନମନ୍ତ୍ରୀଙ୍କର ଏଭଳି ବକକ୍ତ୍ୟ ପରେ ମହାତ୍ମାଗାନ୍ଧୀଙ୍କୁ ନେଇ ବିତର୍କରେ ପୂର୍ଣ୍ଣଛେଦ ପଡିବା ଉଚିତ୍ ବୋଲି ରାଜନୈତିକ ମହଲ ମତ ରଖୁଛନ୍ତି ।