ପ୍ରମୁଖ ଖବର

ବିଜେପିରେ ଯୋଗ ଦେଲେ ଭର୍ତ୍ତୃହରି ମହତାବ
ଶିବସେନା ସିନ୍ଦେ ଗୋଷ୍ଠୀରେ ସାମିଲ ହେଲେ ବଲିଉଡ୍ ତାରକା ଗୋବିନ୍ଦା
ପଦ୍ମ ଧରିଲେ ଅଭିନେତା ତଥା ବ୍ରହ୍ମପୁରର ପୂର୍ବତନ ସାଂସଦ ସିଦ୍ଧାନ୍ତ ମହାପାତ୍ର

ଓଡ଼ିଶା ପାଣିପାଗ ବଦଳୁଛି: କିଏ ପ୍ରଭାବୀ ବିଜୁ ନା ନବୀନ ଅନୁଗତ

0

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୭୪ତମ ଜନ୍ମ ଦିନରେ ଡାକ୍ତର ଦାମୋଦର ରାଉତ ଗତକାଲି ବିଜେପି ଛାଡିବା ସହିତ ପ୍ରତ୍ୟକ୍ଷ ରାଜନୀତିରୁ ଦୂରେଇ ଯିବା ଘୋଷଣା ରାଜ୍ୟ ରାଜନୀତି ପାଇଁ ଭିନ୍ନ କାରଣରୁ ଗୁରୁତ୍ୱ ରଖୁଛି । ପାଟକୁରା ଆସନରେ ବିଜୟ ମହାପାତ୍ରଙ୍କ ପରାଜୟ ଓ ଡାକ୍ତର ଦାମୋଦର ରାଉତଙ୍କ ଏଭଳି ଘୋଷଣା ପରେ ଓଡ଼ିଶା ରାଜନୀତିରେ ବିଜୁ ସହଯୋଗୀଙ୍କ ପ୍ରତ୍ୟକ୍ଷ ଯୋଗଦାନ ଆସନ୍ତା ନିର୍ବାଚନ ବେଳକୁ ଶେଷ ହୋଇସାରିଥିବ ବୋଲି କୁହାଯାଉଛି । କାରଣ ପାଟକୁରାରେ ଆସନ୍ତା ନିର୍ବାଚନ ବିଜୟ ମହାପାତ୍ର ଲଢିବା ସମ୍ଭାବନା କ୍ଷୀଣ । ତାଙ୍କ ସ୍ଥାନରେ ତାଙ୍କ ପୁଅ ନିର୍ବାଚନକୁ ଓହ୍ଲାଇବେ ବୋଲି ସୂଚନା ମିଳୁଛି । ଏଥର ନିର୍ବାଚନରେ ଜୁନିୟର ମହାପାତ୍ର ପାଟକୁରା ମାଟିରେ ପଦାର୍ପଣ କରିସାରିଛନ୍ତି । ସେହିଭଳି ବିଜୁଙ୍କ ଅନ୍ୟତମ ସହଯୋଗୀ ତଥା କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କର ଏହା ସମ୍ଭବତଃ ଶେଷ ନିର୍ବାଚନ । ବୟସାଧିକ କାରଣରୁ ସେ ଏଥର ବି ନିର୍ବାଚନରୁ ଓହରିଯିବେ ବୋଲି ଘୋଷଣା କରିଥିଲେ, କର୍ମୀ ବାଧ୍ୟ କରିବାରୁ ସେ ମଇଦାନକୁ ଓହ୍ଲାଇଛନ୍ତି । ବିଜୁଙ୍କ ଅନ୍ୟତମ ସହଯୋଗୀ ସୁରେନ୍ଦ୍ର ନାୟକ ଏବେ ଆଉ ପ୍ରତ୍ୟକ୍ଷ ରାଜନୀତିରେ ନାହାନ୍ତି । ଅସୁସ୍ଥତା ଯୋଗୁଁ ସେ ଏବେ ଘରେ ବିଶ୍ରାମ ନେଉଛନ୍ତି । ଗଞ୍ଜାମ ଟାଇଗର ରାମକୃଷ୍ଣ ପଟ୍ଟନାୟକ ତାଙ୍କ ଝିଅକୁ ଆସନ ଛାଡିସାରିଲେଣି । ପୂର୍ବତନ ସାଂସଦ ପ୍ରସନ୍ନ ପାଟ୍ଟଶାଣୀଙ୍କୁ ନବୀନ ବ୍ରେକ୍‍ ଦେଇଛନ୍ତି । ପୂର୍ବତନ ମନ୍ତ୍ରୀ ପ୍ରଫୁଲ୍ଲ ଘଡେଇ ଏବେ ଆଉ ସକ୍ରିୟ ନାହାନ୍ତି, ଯଦିଓ ବିଜେଡି ତାଙ୍କୁ ସାଂଗଠନିକ ପ୍ରକ୍ରିୟା ଭିତରେ ରଖିଛି । ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ତାଙ୍କ ପୁଅ ପାଇଁ ସୁଯୋଗ ଖୋଜୁଛନ୍ତି । ସମ୍ଭବତଃ ଏହି ନିର୍ବାଚନ ପରେ ତାଙ୍କ ପୁଅ ସଂପର୍କରେ ସେ ଅଧିକ ବିଚାର କରିପାରନ୍ତି । ଏଣୁ କେଇ ବର୍ଷ ମଧ୍ୟରେ ନବୀନ ସାମ୍ରାଜ୍ୟ ଓ ବିରୋଧୀ ଶିବିରରେ ବିଜୁଙ୍କ ସହଯୋଗୀ ପୂରା ନିଷ୍ପ୍ରଭ ହୋଇଯିବେ ।

ସମାନ୍ତରାଳ ଭାବେ ପାଞ୍ଚଥରିଆ ମୁଖ୍ୟମନ୍ତ୍ରୀ ତଥା ନବୀନ ପଟ୍ଟନାୟକଙ୍କ ସହଯୋଗୀ ଏବେ ରାଜ୍ୟ ରାଜନୀତିର ପ୍ରମୁଖ ଭାଗକୁ ଚାଲିଆସିଲେଣି । ନବୀନଙ୍କ ସହିତ ଦଳରେ ଆହୁରି ଅନେକ ନେତା ଅଛନ୍ତି, ଯେଉଁମାନେ କ୍ରମାଗତ ଭାବେ ପାଞ୍ଚ ପାଞ୍ଚ ଥର ଜିତିଛନ୍ତି । ହେଲେ ପ୍ରଶ୍ନ ଉଠୁଛି, ବିଜୁଙ୍କୁ ନାଁକୁ ଯେମିତି ଏଯାଏ ତାଙ୍କ ସହଯୋଗୀ ଟାଣିଆଣିପାରିଲେ, ସେମିତି ଓଡ଼ିଶା ରାଜନୀତିରେ ନବୀନ ଓ ତାଙ୍କ ଅବଦାନକୁ ଲୋକଙ୍କ ପାଖକୁ ନେବାଭଳି ନେତା କିଏ । ନବୀନ ଶାସନରେ ଅଛନ୍ତି । ଏହି ନେତାଙ୍କ ମଧ୍ୟରୁ ଅନେକ ତାଙ୍କ ମନ୍ତ୍ରିମଣ୍ଡଳରେ ଅଛନ୍ତି ଓ ଥିଲେ । ହେଲେ ଆଜି ଦିନରେ ମୁଖିଆଙ୍କୁ ସୁରକ୍ଷା ଦେବାକୁ ଆସୁନଥିବା ନେତା, ଭବିଷ୍ୟତ ବିଜେଡିକୁ ମାର୍ଗଦର୍ଶନ କରିବେ, ରାଜନୈତିକ ମହଲ ଏଭଳି ବିଶ୍ୱାସ ରଖିପାରୁନାହାନ୍ତି । କେବଳ ସେତିକି ନୁହେଁ, ବିଜୁ ଲିଗାସୀ ଭଳି ନବୀନଙ୍କ ଅନୁଗତମାନେ ରାଜ୍ୟ ରାଜନୀତିରେ ନିଜର ସ୍ୱତନ୍ତ୍ର ପତିଆରା ବା ପ୍ରତିଷ୍ଠା ସୃଷ୍ଟି କରିବାରେ ଏକରକମ ବିଫଳ ହୋଇଛନ୍ତି । କ୍ଷମତା ରାଜନୀତିରେ ସେମାନଙ୍କର ଦବ୍‍ଦବା ଥାଇପାରେ,ହେଲେ ସାଧାରଣରେ ବିଜୟ, ଦାମ, ସୁର କିମ୍ୱା ନଳିନୀ ମହାନ୍ତିଙ୍କ ଭଳି ଗ୍ରହଣୀୟ ହୋଇପାରିନାହାନ୍ତି । ରାଜନୀତିରେ ବି ସେମାନଙ୍କର କରିସ୍ମା ବା ପଟୁତା ଏଯାଏ ରାଜ୍ୟବାସୀ ଉପଲବ୍ଧି କରିପାରିଲେ ନାହିଁ ।

ଏଥିପାଇଁ ଗୋଟିଏ ଗୋଷ୍ଠୀ ରାଜନୈତିକ ନେତାଙ୍କ ଅପରିପକ୍ୱତା, ଆତ୍ମ ଅଭିମାନ, ଦକ୍ଷତାକୁ ଦାୟୀ କରନ୍ତି । ଏହି କାରଣରୁ ଓଡ଼ିଶାରେ ଅମଲା ପ୍ରଭାବୀ ହୋଇଛନ୍ତି ଏମାନେ ଯୁକ୍ତି ରଖିଛନ୍ତି । ହେଲେ ଅନ୍ୟ ଗୋଷ୍ଠୀର ମତ ହେଲା ନବୀନଙ୍କ ଶାସନ ବ୍ୟବସ୍ଥାରେ ରାଜନୈତିକ ନେତାଙ୍କୁ କେବେ ବି ଗୁରୁତ୍ୱ ମିଳିନାହିଁ । ବରଂ ଓଡ଼ିଶା ଇତିହାସରେ ସବୁଠାରୁ ଅଧିକ ରାଜନେତା ନବୀନଙ୍କ ସମୟରେ ହିଁ ଦଣ୍ଡ ପାଇଛନ୍ତି । ଏଣୁ ଏହାର ପ୍ରଭାବ ରାଜ୍ୟ ରାଜନୀତିରେ ଦେଖିବାକୁ ମିଳୁଛି । ନବୀନଙ୍କ ଆସନ ସୁରକ୍ଷିତ ହୋଇପାରେ, କିନ୍ତୁ ନବୀନ ବା ତାଙ୍କ ସରକାରଙ୍କ ସବୁ ଭଲ କାମକୁ ଢେର୍‍ ସମୟ ଯାଏ ବଞ୍ଚାଇ ରଖିବାପାଇଁ ନବୀନ ଲିଗାସୀ ସମର୍ଥ ହେବେ ନାହିଁ । ବରଂ ନବୀନଙ୍କ ପରେ ସେମାନେ ବିଜେଡି ରାସ୍ତାରୁ ନିଜକୁ ଦୂରେଇ ରଖିବା ସମ୍ଭାବନା ଅଧିକ ବୋଲି କୁହାଯାଉଛି ।

Leave A Reply

Your email address will not be published.