ଅଯୋଧ୍ୟା ବିବାଦର ସମାଧାନ ରାସ୍ତା କାଢିଲେ କୋର୍ଟ
ବିଚାରପତି ଗୋଗଇ ଓ ଚାରି ବିଚାରପତି ସହମତ
୧୦୪୫ ପୃଷ୍ଠାର ରାୟ ଶୁଣାଇଲେ ସର୍ବୋଚ୍ଚ ଅଦାଲତ
ରାମଲୀଲାଙ୍କୁ ମିଳିବ ବିବାଦୀୟ ୨.୭୭ ଏକର ଜମି
୩ ମାସ ମଧ୍ୟରେ କେନ୍ଦ୍ର ସରକାର ଟ୍ରଷ୍ଟ ଗଠନ କରିବେ
ସୁନି ଵାକଫ୍ ବୋର୍ଡକୁ ଅନ୍ୟତ୍ର ୫ ଏକର ଜମି ଦିଆଯିବ
ନୂଆଦିଲ୍ଲୀ: ଅଯୋଧ୍ୟା ମାମଲାରେ ଆଜି ସୁପ୍ରିମକୋର୍ଟ ଐତିହାସିକ ରାୟ ଶୁଣାଇଛନ୍ତି । ଭାରତର ନ୍ୟାୟିକ ଇତିହାସରେ ସବୁଠାରୁ ଦୀର୍ଘ ସମୟ ଚାଲିଥିବା ଏହି ମାମଲାରେ କୋର୍ଟ ୧୦୪୫ ପୃଷ୍ଠାର ମଧ୍ୟ ଏକ ଲମ୍ୱା ରାୟ ଦେଇଛନ୍ତି । ଅଯୋଧ୍ୟା ଅଞ୍ଚଳର ବିବାଦୀୟ ସ୍ଥଳ ଅର୍ଥାତ୍ ରାମଙ୍କ ଜନ୍ମ ସ୍ଥାନ ବୋଲି କୁହାଯାଉଥିବା ଅଞ୍ଚଳରେ ହିଁ ରାମ ମନ୍ଦିର ନିର୍ମାଣ ହେବ । କେନ୍ଦ୍ର ସରକାର ତିନିମାସ ମଧ୍ୟରେ ଏକ ଟ୍ରଷ୍ଟ ଗଠନ କରିବେ ଓ ଏହି ନ୍ୟାସକୁ ଏହି ୨.୭୭ ଏକର ଜମି ପ୍ରଦାନ କରିବା ସହିତ ମନ୍ଦିର ନିର୍ମାଣ ନେଇ ପଦକ୍ଷେପ ନେବାକୁ କୁହାଯାଇଛି । ନିଜକୁ ସେବାୟତ ବୋଲି ଦାବି କରୁଥିବା ନିମୋହି ଆଖଡା କେବଳ ଏହି ଟ୍ରଷ୍ଟର ଜଣେ ଭାବେ ପ୍ରତିନିଧିତ୍ୱ କରିବେ । ଅନ୍ୟପକ୍ଷରେ ସହରର ଅନ୍ୟତ୍ର ଓ ପ୍ରମୁଖ ସ୍ଥାନରେ ୫ ଏକର ଜମି ସୁନି ଵାକଫ୍ ବୋର୍ଡକୁ ଦେବାକୁ କୋର୍ଟ ତାଙ୍କ ରାୟରେ କହିଛନ୍ତି । ପ୍ରଧାନ ବିଚାରପତି ରଂଜନ ଗୋଗଇଙ୍କ ଅଧ୍ୟକ୍ଷତାରେ ଗଠିତ ପାଞ୍ଚଜଣିଆ ଖଣ୍ଡପୀଠ ଏହି ରାୟ ପ୍ରଦାନ କରିଥିଲେ ।
କୋର୍ଟଙ୍କ ରାୟରେ ଅଲଇଣ୍ଡିଆ ମୁସଲିମ୍ ପର୍ସନାଲ ଲ ବୋର୍ଡ ସନ୍ତୋଷ ପ୍ରକାଶ କରିନାହିଁ । ଅନ୍ୟପକ୍ଷରେ କଂଗ୍ରେସ କହିଛି, ସେମାନେ ରାମମନ୍ଦିର ନିର୍ମାଣ ସପକ୍ଷରେ ଅଛନ୍ତି । ଏହି ରାୟ ରାମ ମନ୍ଦିର ନିର୍ମାଣ ପାଇଁ କେବଳ ରାସ୍ତା ଖୋଲିଛି ତା ନୁହେଁ, ବରଂ ବିଜେପି ଓ ଅନ୍ୟ ରାଜନୈତିକ ଦଳ ପାଇଁ ଏହି ପ୍ରସଙ୍ଗର ରାଜନୀତିକରଣ ପାଇଁ ବାଟ ବନ୍ଦ କରିଦେଇଛି।
ଆଜି କୋର୍ଟ ତାଙ୍କ ରାୟରେ କହିଥିଲେ, ବାବ୍ରି ମସଜିଦ୍ ଖାଲି ଜମିରେ ତିଆରି ହୋଇନାହିଁ । ଏଏସ୍ଆଇ ରିପୋର୍ଟ କହୁଛି, ଦ୍ୱାଦଶ ଶତାଦ୍ଦୀରେ ଏଠାରେ ମନ୍ଦିର ଥିଲା । ତେବେ ମନ୍ଦିର ଭଙ୍ଗାଯାଇ ମସଜିଦ୍ କରାଯାଇଛି କି ନାହିଁ, ସେ ନେଇ କୌଣସି ପ୍ରମାଣ ମିଳୁନାହିଁ । ଜମି ଉପରେ କବଜା ନେଇ ପ୍ରମାଣ ଦେବାରେ ମଧ୍ୟ ମୁସଲିମ୍ ପକ୍ଷ ବିଫଳ ହୋଇଛନ୍ତି ।
କୋର୍ଟ ତାଙ୍କ ରାୟରେ ଆହୁରି କହିଛନ୍ତି ଯେ ହିନ୍ଦୁମାନଙ୍କର ବିଶ୍ୱାସକୁ କୌଣସି ପରିସ୍ଥିତିରେ ଅଣଦେଖା କରାଯାଇପାରିବ ନାହିଁ । ଅଯୋଧ୍ୟା ରାମଙ୍କ ଜନ୍ମଭୂମି ଏହା ସେମାନଙ୍କର ଦୃଢ ବିଶ୍ୱାସ । କିନ୍ତୁ କୌଣସି ଆସ୍ଥା ଓ ବିଶ୍ୱାସକୁ ନେଇ କୋର୍ଟ ତାଙ୍କ ରାୟ ଶୁଣାଇପାରିବେ ନାହିଁ । ବରଂ ତଥ୍ୟଗତ ପ୍ରମାଣ ରାୟ ପ୍ରକାଶର ମୂଳ ଆଧାର ହେବ । ଆଇନ ଅନୁଯାୟୀ ଦେଖାଯିବ ଯେ ମାଲିକାନାଟି କାହାର । ମୁସଲିମମାନେ ସେମାନଙ୍କର ଏକାକୀ ମାଲିକାନା ଜାହିର କରିପାରିବେ ନାହିଁ, କାରଣ ଇଂରେଜ ଆସିବା ପର୍ଯ୍ୟନ୍ତ ସେମାନେ ସେଠାରେ ନମାଜ ପାଠ କରୁଥିବା ପ୍ରମାଣ ମିଳୁନାହିଁ । ବରଂ ହିନ୍ଦୁମାନେ ରାମ ଚଉତରା ଓ ହିନ୍ଦୁ ରୋଷେଇ ସ୍ଥଳ ଭାବେ ଏହାକୁ ପୂଜା କରିଆସୁଥିଲେ । ଯାହା ସୂଚନା ମିଳୁଛି, ବାବରଙ୍କ ସମୟରେ ମୀର ବାଜି ଏହି ମସଜିଦ୍ ନିର୍ମାଣ କରିଥିଲେ । କୋର୍ଟ ଏଥିସହିତ ସେବାୟତ ବୋଲି ଦାବି କରୁଥିବା ନିମୋହି ଆଖଡା ଓ ସିହାଙ୍କ ପିଟିସନକୁ ଖାରଜ କରିଦେଇଛନ୍ତି ।
ଏଠାରେ ପ୍ରକାଶ ଥାଉକି, ଅଗଷ୍ଟ ୬ରୁ କ୍ରମାଗତ ୪୦ ଦିନ ଧରି ସୁପ୍ରିମକୋର୍ଟ ଏହି ମାମଲାର ଶୁଣାଣି କରିଥିଲେ ଓ ୯୬ ଦିନ ପରେ ରାୟ ପ୍ରକାଶ କରିଛନ୍ତି । ପୂର୍ବରୁ ଆହ୍ଲାବାଦ କୋର୍ଟ ବିବାଦୀୟ ୨.୭୭ ଏକର ଜମିକୁ ନିମୋହି ଆଖଡା, ସୁନି ଵାକଫ୍ ବୋର୍ଡ ଓ ରାମ ଜନ୍ମଭୂମି ନ୍ୟାସ କମିଟି ମଧ୍ୟରେ ୩ ଭାଗ କରି ବାଣ୍ଟିଦେବା ପାଇଁ ରାୟ ଶୁଣାଇଥିଲେ, ଯାହା ଉପରେ ଉଚ୍ଚତମ ନ୍ୟାୟାଳୟ ସ୍ଥଗନାଦେଶ ଜାରି କରିଥିଲେ ।