ନୂଆଦିଲ୍ଲୀ: କରୋନା ବିପତ୍ତିକୁ ନେଇ ଚାଷୀକୁଳ ଚିନ୍ତାରେ ପଡିଥିବା ବେଳେ ଭାରତର ପାଣିପାଗ ବିଜ୍ଞାନ କେନ୍ଦ୍ର ଏବେ ସେମାନଙ୍କ ପାଇଁ ଏକ ଭଲ ଖବର ଆଣିଛି। ଚଳିତବର୍ଷ ଦକ୍ଷିଣ ପଶ୍ଚିମ ମୌସୁମୀ ବାୟୁ ଜନିତ ବର୍ଷା ସ୍ବାଭାବିକ (୯୬%-୧୦୪%) ରହିବ।
ତେବେ ଓଡ଼ିଶାକୁ ନିର୍ଧାରିତ ସମୟ ଠାରୁ ସାମାନ୍ୟ ବିଳମ୍ବରେ ଆସିବ ମୌସୁମୀ। କେରଳରେ ଜୁନ ୧ରେ ପହଞ୍ଚିବ। କିନ୍ତୁ ଓଡ଼ିଶାରେ ପହଞ୍ଚିବା ବେଳକୁ ଏହା ଜୁନ୍ ଦ୍ବିତୀୟ ସପ୍ତାହ ଶେଷ ବା ୧୩ରୁ ୧୫ ତାରିଖ ହୋଇଯାଇପାରେ। ଉତ୍ତର ଭାରତକୁ ମଧ୍ୟ ସାମାନ୍ୟ ବିଳମ୍ବରେ ମୌସୁମୀ ଆସିବ ବୋଲି ଜଣାପଡ଼ିଛି।
ଅନ୍ୟପକ୍ଷରେ ଉତ୍ତର ପୂର୍ବାଞ୍ଚଳରେ ଧାର୍ଯ୍ୟ ସମୟ ଠାରୁ ଆଗୁଆ ମୌସୁମୀ ପଦାର୍ପଣ କରିବ। ଏମିତିକି ଜୁଲାଇ ୧୫ ବଦଳରେ ଜୁଲାଇ ୮କୁ ଛୁଇଁସାରିଥିବ। ପାଣିପାଗ ବିଜ୍ଞାନ କେନ୍ଦ୍ରର ନିର୍ଦେଶକ ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଓଡ଼ିଶାରେ ମୌସୁମୀ ଜୁନ୍ ୧୩ ତାରିଖ ବେଳକୁ ଛୁଇଁବା ସମ୍ଭାବନା ଅଧିକ। ଆଇଏମଡି ଆକଳନ ଯଦି ସତ ହୁଏ, ତେବେ ଏବର୍ଷ ଭଲ ବର୍ଷା ହେବ ଓ ଚାଷ ପାଇଁ ପାଗ ସମ୍ପୂର୍ଣ୍ଣ ଅନୂକଳ ରହିବ।