ଟୋକିଓ: ଟୋକିଓ ଅଲିମ୍ପିକ୍ସରେ କରୋନା ଆତଙ୍କ। ଅଲିମ୍ପିକ୍ସ ଆରମ୍ଭ ହେବା ଆଗରୁ ଜଣକ ପରେ ଜଣେ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏ ଯାଏ ଜଣେ ଆଥଲେଟ୍ ସମେତ ୫ କର୍ମଚାରୀ କରୋନା ପଜିଟିଭ ଥିବା ଜଣାପଡିଛି। ଆସନ୍ତା ୨୩ ଜୁଲାଇରୁ ଆରମ୍ଭ ହେବାକୁ ଯାଉଛି ଅଲିମ୍ପିକ୍ସ-୨୦୨୦ । କରୋନା କାଳରେ ଅନେକ ପ୍ରତିବନ୍ଧକ ଭିତରେ ଜାପାନରେ ଖେଳ ଆୟୋଜନ ହେବାକୁ ଯାଉଛି। ହେଲେ ଅଲମ୍ପିକ୍ସ ଆରମ୍ଭ ହେବା ଆଗରେ ସଂକ୍ରମଣ ଯେପରି ଭାବେ ବୃଦ୍ଧି ପାଉଛି ତାକୁ ନେଇ ଭୟ ଦେଖିବାକୁ ମିଳିଲାଣି।
ଟୋକିଓରେ କରୋନା ସଂକ୍ରମଣ ବୃଦ୍ଧି ପାଉଛି । ଶୁକ୍ରବାର ପ୍ରକାଶିତ ରିପୋର୍ଟ ଅନୁସାରେ ୧,୨୭୧ ନୂଆ ପଜିଟିଭ ଚିହ୍ନଟ ହୋଇଛନ୍ତି । ଅଲିମ୍ପିକ୍ସ କ୍ୟାମ୍ପରେ ମଧ୍ୟ କରୋନା ବ୍ୟାପୁଛି। ଖେଳ ଯେତିକି ପାଖେଇ ଆସୁଛି ଖେଳାଳୀଙ୍କ ମଧ୍ୟରେ ସଂକ୍ରମଣ ସେତେ ବଢିବାରେ ଲାଗିଛି । ଅଲିମ୍ପିକ୍ସରେ ଭାଗ ନେବାକୁ ଥିବା ଜଣେ ଆଥଲେଟ୍ ଏବଂ ଅଲମ୍ପିକ୍ସର ୪ କର୍ମଚାରୀ କରୋନାରେ ଆକ୍ରାନ୍ତ ହୋଇଥିବା ସୂଚନା ମିଳିଛି । ଋଷର ଖେଳାଳିଙ୍କ ଠାରୁ ସଂକ୍ରମିତ ହୋଇଥିବା ଜଣା ପଡିଛି । ଅଲିମ୍ପିକ୍ସରେ ଭାଗ ନେବାକୁ ଆସିଥିବା ଋଷର ରକ୍ବି ଟିମ୍ ଏବଂ ଜୁଡୋ ଖେଳାଳୀଙ୍କ ମଧ୍ୟରେ କିଛି ଖେଳାଳି ପୂର୍ବରୁ ସଂକ୍ରମିତ ଥିଲେ ଏବଂ ସେମାନଙ୍କ ସଂସ୍ପର୍ଶରେ ଆସି ଆହୁରି ଅନ୍ୟ ଲୋକ ଏବଂ ଅଲିମ୍ପିକ୍ସ କର୍ମଚାରୀ କରୋନାରେ ଆକ୍ରାନ୍ତ ହୋଇଥିବା ଜଣାପଡିଛି । ପ୍ରତ୍ୟେକ ଆକ୍ରାନ୍ତଙ୍କୁ ଡାକ୍ତରଖାନାରେ ଭର୍ତି କରାଯାଇଛି।
ଅଲିମ୍ପିକ୍ସକୁ ନଜରରେ ରଖି ଟୋକିଓରେ ଅନେକ କଟକଣା ଲାଗୁ ହୋଇଛି । ଜୁଲାଇ ମାସ ଆରମ୍ଭରୁ ହିଁ ଟୋକିଓରେ ଖେଳାଳିମାନେ ପହଁଚିବା ଆରମ୍ଭ କରି ଦେଲେଣି। ଆଗକୁ ଟୋକିଓ କୋଭିଡ୍-୧୯ର ସୁପର ସ୍ପ୍ରେଡର ହୋଇପାରେ ବୋଲି ବିଶେଷଜ୍ଞମାନେ ମତ ଦେଇଛନ୍ତି।