ବାଙ୍ଗାଲୁର: ଜୁଲାଇ ୨୬ ତାରିଖରେ କର୍ଣ୍ଣାଟକ ମୁଖ୍ୟମନ୍ତ୍ରୀ ପଦ ଛାଡିପାରନ୍ତି ବି ଏସ୍ ୟେଦୁରପ୍ପା। ସିଧାସଳଖ ନ କହିଲେ ବି ବୁଲେଇ ବଙ୍କେଇ ଆଜି ସେ ଏହି ସତ ଜଣାଇଛନ୍ତି। ଗଣମାଧ୍ୟମକୁ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଅମିତ ଶାହା ଏବଂ ଆମର ରାଷ୍ଟ୍ରୀୟ ରାଷ୍ଟ୍ରପତି ଜେପି ନାଡା ମୋ ପ୍ରତି ବିଶେଷ ଭଲପାଇବା ଏବଂ ବିଶ୍ୱାସ ରଖିଛନ୍ତି। ସମସ୍ତେ ଜାଣିବା ଉଚିତ ଯେ ଯେଉଁମାନେ ପାର୍ଟିରେ ୭୫ ବର୍ଷ ବୟସ ଅତିକ୍ରମ କରିଛନ୍ତି ସେମାନଙ୍କୁ କୌଣସି ପଦବି ଦିଆଯାଉ ନାହିଁ। କିନ୍ତୁ ମୋର କାର୍ଯ୍ୟକୁ ପ୍ରଶଂସା କରି ସେମାନେ ମୋତେ ୭୮ ବର୍ଷ ବୟସ ସତ୍ତ୍ବେ ମୋତେ ଏକ ସୁଯୋଗ ଦେଇଛନ୍ତି। ମୁଁ ଜୁଲାଇ ୨୫ ପରେ କେବଳ ହାଇକମାଣ୍ଡଙ୍କ ପରବର୍ତ୍ତୀ ପଦକ୍ଷେପ ଜାଣିବି ଏବଂ ବିଜେପି ହାଇକମାଣ୍ଡଙ୍କ ନିଷ୍ପତ୍ତିକୁ ପାଳନ କରିବି। ଦଳକୁ ମଜବୁତ କରିବା ଏବଂ କର୍ଣ୍ଣାଟକରେ ଦଳକୁ କ୍ଷମତାକୁ ଆଣିବା ପାଇଁ ମୁଁ କାର୍ଯ୍ୟ କରିବି ବୋଲି ୟେଦୁରପ୍ପା କହିଛନ୍ତି।
ଯେଦୁରପ୍ପାଙ୍କର ଏଭଳି ମନ୍ତବ୍ୟ ରାଜନୈତିକ ମହଲକୁ କ ତର୍ଜମା ପାଇଁ ଅନେକ ଖୋରାକ ଯୋଗାଇଛି। ଏହି ଚର୍ଚ୍ଚା ଆହୁରି ବଢିବାର କାରଣ ହେଉଛି, ସରକାରର ଦୁଇ ବର୍ଷ ଅବସରରେ ୟେଦୁରପ୍ପା ଯେଉଁ ସବୁ କାର୍ଯ୍ୟକ୍ରମ କରିବ ବୋଲି ନିଷ୍ପତ୍ତି ନେଇଥିଲେ, ସେଥିରେ ପରିବର୍ତ୍ତନ କରିଦେଇଛନ୍ତି। ଜୁଲାଇ ୨୬ ତାରିଖରେ ବିଧାୟକ ଦଳର ଏକ ବୈଠକ ରଖାଯାଇଥିଲା। ଜୁଲାଇ ୨୫ ତାରିଖ ଦିନ ଏକ ମଧ୍ୟାହ୍ନ ଭୋଜନ କାର୍ଯ୍ୟକ୍ରମ ଥିଲା। ଏସବୁ କିନ୍ତୁ ସ୍ଥଗିତ ରହିଛି।
ଏସବୁରୁ ଅନୁମାନ କରାଯାଉଛି ଯେ କର୍ଣ୍ଣାଟକରେ ୨୬ ତାରିଖରେ ସରକାରର ଦୁଇ ବର୍ଷ ପୂର୍ତ୍ତି ଅବସରରେ ୟେଦୁରପ୍ପା ଇସ୍ତଫା ଦେବେ। ବାକି ସମୟ ଅନ୍ୟ ଜଣେ ବରିଷ୍ଠ ନେତା ମୁଖ୍ୟମନ୍ତ୍ରୀ ଭାବେ ଦାୟିତ୍ବ ନିର୍ବାହ କରିବେ।
ଗତ ସପ୍ତାହରେ ୟେଦୁରପ୍ପା ନୂଆଦିଲ୍ଲୀ ଯାଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହ, ରାଷ୍ଟ୍ରୀୟ ସଭାପତି ଜେପି ନଡ୍ଡା, କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପ୍ରମୁଖଙ୍କୁ ଭେଟିଥିଲେ। ଏହା ପରେ ତାଙ୍କ ପଦବି ଯିବା ସଙ୍କେତ ମିଳିଥିଲା।
ଏଠାରେ ଉଲ୍ଲେଖଥାଉକି, ଲିଙ୍ଗାୟତ ଗୋଷ୍ଠୀର ଅତି ଟାଣୁଆ ନେତା ୟେଦୁରପ୍ପା ଇତିମଧ୍ୟରେ ତାଙ୍କର ଶକ୍ତି ପ୍ରଦର୍ଶନ କରିଥିଲେ। କଂଗ୍ରେସ ବି ପରୋକ୍ଷ ସମର୍ଥନ ଦେଇଥିଲେ। ହେଲେ ଦଳ ଭିତରୁ ସେ ବିରୋଧର ଶିକାର ହୋଇଥିଲେ।
ତେବେ ୟେଦୁରପ୍ପା କ୍ଷମତାରୁ ଗଲେ ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବ, ତାହା ସ୍ଥିର ହୋଇନାହିଁ।