କାଏରୋ: ମଧ୍ୟପୂର୍ବ ରାଷ୍ଟ୍ରରେ କୋଭିଡ୍-୧୯ ଡେଲ୍ଟା ଭାରିଆଣ୍ଟର ଚତୁର୍ଥ ତରଙ୍ଗ ଛୁଇଁଲାଣି। ବିଶ୍ବ ସ୍ବାସ୍ଥ୍ୟ ସଂଗଠନ ଏ ସଂପର୍କରେ ସତର୍କ କରାଇଛି। ଏସବୁ ରାଷ୍ଟ୍ରରେ କରୋନା ଭୁତାଣୁ ପୁଣି ଥରେ ନୂଆ ରୂପରେ ସେମାନଙ୍କର କାୟା ମେଲାଇଲେଣି।
ଗୁରୁବାର ଦିନ ବିଶ୍ବ ସ୍ବାସ୍ଥ୍ୟ ସଂଗଠନ କହିଛି, ଦିନକୁ ଦିନ ଡେଲ୍ଟା ଭାରିଆଣ୍ଟ ସଶକ୍ତ ହେଉଛି ଓ ଅଧିକରୁ ଅଧିକ ସଂକ୍ରମିତ ଘଟୁଛି। ପୂର୍ବ ଭୂମଧ୍ୟସାଗରୀୟ ଦେଶରେ ତାର ଉପସ୍ଥିତି ଜଣାପଡିଲାଣି।
ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) କହିଛି ଯେ ଡେଲଟା ପ୍ରକାରରେ ମଧ୍ୟ ପୂର୍ବରେ ଏକ ଚତୁର୍ଥ ତରଙ୍ଗ ସୃଷ୍ଟି ହୋଇ କରୋନାଭାଇରସ୍ ରୋଗରେ ବୃଦ୍ଧି ଘଟିଛି। ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଇଛି। ଏହି ଅଞ୍ଚଳ ଅନ୍ତର୍ଗତ ୨୨ଟି ଦେଶ ମଧ୍ୟରୁ ୧୫ଟି ଦେଶରେ କରୋନା କାୟା ମେଲାଉଛି।
ଏହି ଦେଶମାନଙ୍କରେ ଡେଲ୍ଟା ଭାରିଆଣ୍ଟ ଜୀବାଣୁର ମୁଖ୍ୟ ଷ୍ଟ୍ରେନ୍ ପାଲଟିଛି। ଯେଉଁମାନଙ୍କୁ ଟିକାକରଣ କରାଯାଇ ନାହିଁ ସେମାନଙ୍କ ମଧ୍ୟରେ ସଂକ୍ରମଣ ପ୍ରାୟତଃ ଦେଖାଯାଉଛି। ଏହା ଅଧିକ ସଂକ୍ରମଣକାରୀ ବୋଲି ଜଣାପଡୁଛି।
“ପୂର୍ବ ଭୂମଧ୍ୟସାଗରୀୟ ଅଞ୍ଚଳ ତଥା ଅନ୍ୟାନ୍ୟ ବିଶ୍ବ ସ୍ବାସ୍ଥ୍ୟ ସଂଗଠନ ଅଞ୍ଚଳରେ ଡେଲ୍ଟା ପ୍ରକାରର ଦ୍ରୁତ ଗତିରେ ବ୍ୟାପିବା ଚିନ୍ତାର କାରଣ ପାଲଟିଛି। ଗତ ସପ୍ତାହରେ ନୂତନ ମାମଲା ଓ ମୃତ୍ୟୁ ସଂଖ୍ୟା ବୃଦ୍ଧି ପାଇଛି। ଅଧିକାଂଶ ନୂତନ ରୋଗୀ ଏବଂ ଡାକ୍ତରଖାନାରେ ଭର୍ତ୍ତି ହୋଇଥିବା ରୋଗୀମାନେ ଟୀକାକୃତ ନୁହଁନ୍ତି। ଆମେ ବର୍ତ୍ତମାନ ଚତୁର୍ଥ ତରଙ୍ଗରେ ଅଛୁ | ଏକଥା କହିଛନ୍ତି ସଂଗଠନର ଆଞ୍ଚଳିକ ନିର୍ଦେଶକ ଡ. ଅହମ୍ମଦ ଅଲ୍ ମଣ୍ଡାରୀ।
ସେ କହିଛନ୍ତି ଯେ ପୂର୍ବ ମାସ ତୁଳନାରେ ଗତ ମାସରେ ସଂକ୍ରମଣ ୫୫ ପ୍ରତିଶତ ଏବଂ ମୃତ୍ୟୁ ୧୫ ପ୍ରତିଶତ ବୃଦ୍ଧି ପାଇଛି। ଗୋଟିଏ ସପ୍ତାହରେ ୩ଲକ୍ଷ ୧୦ ହଜାର ସଂକ୍ରମିତ ଓ ୩୫୦୦ ଲୋକଙ୍କର ମୃତ୍ୟୁ ରେକର୍ଡ କରାଯାଇଛି।
ଉତ୍ତର ଆଫ୍ରିକାରେ ସର୍ବାଧିକ ସଂଖ୍ୟକ କୋଭିଡ -୧୯ ମୃତ୍ୟୁ ଘଟିଥିବା ବେଳେ ଟ୍ୟୁନିସିଆ ଭଳି ଦେଶ ଏହି ରୋଗକୁ ରୋକିବା ପାଇଁ ସଂଘର୍ଷ କରୁଛନ୍ତି। ପରିସ୍ଥିତିକୁ ନିୟନ୍ତ୍ରଣକୁ ଆଣିବା ଲାଗି ଅମ୍ଳଜାନ ଟ୍ୟାଙ୍କର ଏବଂ ଶଯ୍ୟାର ଗୁରୁତର ଅଭାବ ଦୂର ପାଇଁ ଜୋରଦାର ଉଦ୍ୟମ ଚାଲିଛି। ବିଶ୍ବ ସ୍ବାସ୍ଥ୍ୟ ସଂଗଠନ ଆହୁରି କହୁଛି ଯେ ଡେଲଟା ଭାରିଆଣ୍ଟର ଦ୍ରୁତ ବିସ୍ତାର କାରଣରୁ ଏହି ଅଞ୍ଚଳରେ ଭୀଷଣ ପ୍ରଭାବ ପଡୁଛି।
ଏକ ପତ୍ରିକାରେ ନିକଟରେ ପ୍ରକାଶିତ ଏକ ତଥ୍ୟ ଅନୁଯାୟୀ, ଡେଲଟା ଭାରିଆଣ୍ଟ ରୋଗୀଙ୍କ ପ୍ରଥମ ପରୀକ୍ଷଣରେ ମିଳିଥିବା ଜୀବାଣୁଙ୍କ ପରିମାଣ ୨୦୨୦ ମସିହାରେ ଭାଇରସର ପ୍ରଥମ ତରଙ୍ଗରେ ରୋଗୀଙ୍କ ତୁଳନାରେ ୧୦୦୦ ଗୁଣ ଅଧିକ ଏବଂ ଏହାର ସଂକ୍ରମଣ କ୍ଷମତା ବହୁ ମାତ୍ରାରେ ବଢିଯାଇଛି।