ସୁନା ପୁଅ ଉପରେ ଧନ ବର୍ଷା

ଟୋକିଓ ଅଲିମ୍ପିକ୍ସରେ ନିରଜ ଚୋପ୍ରା ସ୍ୱର୍ଣ୍ଣପଦକ ଜିତିବା ପରେ ଏବେ ସବୁଆଡୁ ଛୁଟୁଛି ପ୍ରଶଂସାର ସୁଅ । ପ୍ରଶଂସା ସହ ସୁନା ପୁଅ ଉପରେ ହେଉଛି ଟଙ୍କା ବର୍ଷା ।
ବିଭିନ୍ନ ରାଜ୍ୟ ଓ ସଂସ୍ଥା ନିରଜଙ୍କ ଉପରେ ଧନ ବର୍ଷା କରିଛନ୍ତି । ନିଜ ଘରୋଇ ରାଜ୍ୟ ହରିଆଣା ସରକାର ୬ କୋଟି ଦେବାକୁ ଘାଷଣା କରିଥିବା ବେଳେ ଏକ କ୍ଲାସ ୱାନ ଚାକିରି ପାଇଁ ମଧ୍ୟ ଘୋଷଣା କରିଛନ୍ତି । ସେହିପରି ପଞ୍ଜାବ ସରକାର ୨ କୋଟି ଦେବାକୁ ଘୋଷଣା କରିଛନ୍ତି । ନିରଜ ତାଙ୍କ ଜୀବନର ଅଧିକାଂଶ ତାଲିମ ପଞ୍ଜାବର ପଟିଆଲାରେ ନେଇଛନ୍ତି । ମଣିପୁର ସରକାର ଏକ କୋଟି,ବିସିସିଆଇ ଏକ କୋଟି,ଚେନ୍ନାଇ ସୁପରକିଙ୍ଗସ ଏକ କୋଟି ଏବଂ ଲର୍ଣ୍ଣିଂ ଆପ ବାଇଜୁସ ଦୁଇ କୋଟି ଦେବାକୁ ଘୋଷଣା କରିଛନ୍ତି ।
ବିମାନ ଚଳାଚଳ ସଂସ୍ଥା ଇଣ୍ଡିଗୋ ମଧ୍ୟ ନିରଜଙ୍କୁ ଏକ ବର୍ଷ ପାଇଁ ବିମାନ ଚଳାଚଳ ଯାତ୍ରା ମାଗଣାରେ ଦେବାକୁ ଘୋଷଣା କରିଛି । ଚଳିତ ବର୍ଷ ଅଗଷ୍ଟ ୮ରୁ ଆସନ୍ତା ବର୍ଷ ୭ ଅଗଷ୍‌ଟ ଯାଏଁ ନିରଜଙ୍କ ପାଇଁ ସ୍ପେଶାଲ ସ୍କିମ କରିବ ଇଣ୍ଡିଗୋ । ମହିନ୍ଦ୍ରା ଗ୍ରୁପ ଅଧ୍ୟକ୍ଷ ଆନନ୍ଦ ମହିନ୍ଦ୍ରା ମଧ୍ୟ ମହିନ୍ଦ୍ରା ଏକ୍ସୟୁଭି ୭୦୦ ଦେବାକୁ ଘୋଷଣା କରିଛନ୍ତି । ଜଣେ ୟୁଜର ମହିନ୍ଦ୍ରା ଚେୟାରମ୍ୟାନଙ୍କୁ ଏକ୍ସୟୁଭି ୭୦୦ କାର ଦିଅନ୍ତୁ ବୋଲି ଟ୍ୟାଗ କରିଥିଲେ । ଯାହାର ଉତରରେ ଆନନ୍ଦ ଲେଖିଥିଲେ ଏହା ମୋ ସୌଭାଗ୍ୟ ଓ ସମ୍ମାନ ହେବ ।
ନିରଜ ଚୋପ୍ରା ଟୋକିଓ ଅଲିମ୍ପିକ୍ସରେ ଜାଭେଲିନ ଥ୍ରୋରେ ସ୍ୱର୍ଣ୍ଣ ଜିତି ଭାରତ ପାଇଁ ଇତିହାସ ରିଚିଛନ୍ତି । ନିଜର ସର୍ବଶ୍ରେଷ୍ଠ୍ର ପ୍ରଦର୍ଶନ ଦେଇ ସୁନା ଜିତି ସେ ଭାରତର
ନାଁକୁ ଶୀର୍ଷରେ ପହଞ୍ଚାଇ ଦେଇଛନ୍ତି ।