ଶିକ୍ଷା ବ୍ୟବସ୍ଥା ଉପରେ ପ୍ରତବନ୍ଧକ ସାଜିଲା ତାଲିବାନ । ଆଫଗାନିସ୍ତାନକୁ ତାଲିବାନ ନିୟନ୍ତ୍ରଣ କଲା ପରେ ତାଲିବାନୀ ଉଚ୍ଚ ଶିକ୍ଷା ମନ୍ତ୍ରାଳୟ ପକ୍ଷରୁ ଏକ ନିର୍ଦ୍ଦେଶନାମା ଜାରି କରାଯାଇଥିଲା । ଯେଉଁଥିରେ କୁହାଯାଇଥିଲା ୟୁନିଭର୍ସିଟିରେ ପୁଅ ଓ ଝିଅଙ୍କ କ୍ଲାସ ଅଲଗା ହେବ । ଏବଂ ଏହା ଯଦି ସମ୍ଭବ ନହେବ ତାହେଲେ କ୍ଲାସରେ ପୁଅ ଓ ଝିଅଙ୍କ ପରଦା ଟଣାଯିବ । ତାଲିବାନର ଏହି ନିର୍ଦ୍ଦେଶନାମା ପରେ ଆଫାଗାନିସ୍ତାନର ଏକ କଲେଜର ଭିଡ଼ିଓ ଭାଇରାଲ ହୋଇଛି। ଯେଉଁଥିରେ ଗୋଟିଏ କ୍ଲାସରେ ପୁଅ ଓ ଝିଅ ବସିଛନ୍ତି ।ସେମାନଙ୍କର ପାଠପଢା ଚାଲିଛି । କିନ୍ତୁ ସେମାନଙ୍କ ମଧ୍ୟରେ ପରଦା ଟଣାଯାଇଛି । ଏହି ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।
ତାଲିବାନ ପକ୍ଷରୁ ନିର୍ଦ୍ଦେଶାନାମାରେ ଏହା ବି କୁହାଯାଇଥିଲା ଯେ, କଲେଜ ପକ୍ଷରୁ ଛାତ୍ରୀଙ୍କ ପାଇଁ ମହିଳା ଶିକ୍ଷକ ରଖିବା ଜରୁରୀ ଅଟେ । ପୁରୁଷ ଶିକ୍ଷକ ଛାତ୍ରୀଙ୍କୁ ପଢାଇପାରିବେନି । ଏହା ଯଦି ସମ୍ଭବ ନହେବ ତେବେ ବୟସ୍କ ପ୍ରଫେସରଙ୍କୁ ରଖାଯାଇପାରିବ ବୋଲି କୁହାଯାଇଥିଲା । ଭାଇରାଲ ହୋଇଥିବା ଫଟୋରେ ଏକ ପ୍ରଫେସର ପଢାଉଥିବାର ଦେଖିବାକୁ ମିଳିଛି । ଏହା ସହ କଲେଜ ଓ ୟୁନିଭର୍ସିଟିରେ ଛାତ୍ର ଓ ଛାତ୍ରୀଙ୍କ ପାଇଁ ଅଲଗା ଅଲଗା ପ୍ରବେଶ ଓ ବାହାରିବା ପାଇଁ ରାସ୍ତା ରଖିବା ଜରୁରୀ । ଏହା ସହ ଯେପର୍ଯ୍ୟନ୍ତ ଛାତ୍ର ମାନେ କ୍ୟାମ୍ପସରୁ ବାହାରିନାହାନ୍ତି ସେ ପର୍ଯ୍ୟନ୍ତ ଛାତ୍ରୀମାନେ ୱେଟିଂ ରୁମରେ ରହିବେ । ତାଲିବାନ ନିଜର ପୂର୍ବ କାର୍ଯ୍ୟକାଳରେ ମଧ୍ୟ ମହିଳାଙ୍କ ପାଠପଢା ଓ ଚାକିରି ଉପରେ ପ୍ରତିବନ୍ଧକ ଲଗାଇଦେଇଥିଲା । ତେବେ ଜଣେ ପ୍ରଫେସରଙ୍କ କହିବା ଅନୁସାରେ ତାଲିବାଦୀ ମାନେ ଛାତ୍ରୀମାନଙ୍କୁ କଲେଜ ଓ ସ୍କୁଲ ପଢିବାକୁ ଛାଡୁଛନ୍ତି, ତାହା ଏକ ସକରାତ୍ମକ ପଦକ୍ଷେପ ।
ତାଲିବାନୀ ମାନେ ୧୯୯୬ରୁ ୨୦୦୧ ଯାଏଁ ଆଫଗାନିସ୍ତାନରେ ରାଜ କରୁଥିଲେ । ସେହି ସମୟରେ ମହିଳାଙ୍କ ସ୍ୱାଧୀନତା ଛଡାଇନିଆଯାଇଥିଲା । ମହିଳାଙ୍କ ଉପରେ ବହୁ ନିର୍ଯାତନା ହେଉଥିଲା । ସେଥିପାଇଁ ଏବେ ପୁଣି ତାଲିବାନୀ ମାନେ ଆଫଗାନିସ୍ତାକୁ କବଜା କରିବା ପରେ ମହିଳା ମାନେ ଅଧିକ ଭୟଭୀତ ଅଛନ୍ତି।