କାବୁଲ: ଆଫଗାନିସ୍ତାନର ପଞ୍ଜଶୀର ଘାଟିକୁ କବଜା ନେଇ:ଛନ୍ତି ବୋଲି ତାଲିବାନ ମାନେ ଦାବି କରୁଥିଲେ ମଧ୍ୟ ଏଯାଏ ଲଢେଇ ଶେଷ ହୋଇନାହିଁ। ବରଂ ପଞ୍ଜଶୀର ଘାଟିରେ ଜୋରଦାର ଲଢେଇ ଚାଲିଛି। ପଞ୍ଜଶୀର ଘାଟିରେ କିଛି ଅଜଣା ସୈନ୍ୟ ବିମାନ ଦ୍ୱାରା ଆକ୍ରମଣ କରାଯାଉଥିବାର ଖବର ଆସିଛି। ଏହି ଆକ୍ରମଣ ତାଲିବାନୀଙ୍କ ରହୁଥିବା ସ୍ଥାନକୁ ଟାର୍ଗେଟ କରି ଆକାଶ ମାର୍ଗରୁ କରାଯାଇଛି।
ପଞ୍ଜଶୀରକୁ ଦଖଲ କରିଥିବା ବାରମ୍ବାର ଦାବି କରିଆସୁଛି ତାଲିବାନ। ସୋମବାର ପଞ୍ଜଶୀର ଘାଟିରେ ତାଲିବାନୀ ଆତଙ୍କୀ ପ୍ରବେଶ କରିଥିଲେ । ସେଠାରେ ତାଲିବାନୀ ମାନେ ପଞ୍ଜଶୀରକୁ କବଜା କରିଥିବା ଦାବି କରି ପତାକା ବି ଉଡାଇଥିଲେ । ଗଭର୍ଣ୍ଣର ଅଫିସ ବାହାରେ ଧଳା ରଙ୍ଗର ପତାକା ଉଡାଇ ଏହାର ଫଟୋ ଛାଡିଥିଲେ।
ପଞ୍ଜଶୀର ଆଫଗାନିସ୍ତାନର ଶେଷ ପ୍ରାନ୍ତ। ଯେଉଁଠି ତାଲିବାନୀ ମାନେ ସଂପୂର୍ଣ୍ଣ ଭାବେ କବଜା କରିପାରିନଥିବା କୁହାଯାଇପାରିବ। ହେଲେ ତାଲିବାନ ପ୍ରବକ୍ତା ଜବହୁଲ୍ଲା ମୁଜାହିଦ ସୋମବାର ଦାବି କରିଥିଲେ ଯେ , ପଞ୍ଜଶୀର ଏବେ ତାଲିବାନର ସଂପୂର୍ଣ୍ଣ ନିୟନ୍ତ୍ରଣରେ । କିଛି ଚରମବାଦୀ ମାନେ ମଧ୍ୟ ମାନିଥିଲେ ଯେ , ତାଲିବାନୀ ମାନେ ରାତାରାତି ପଞ୍ଜଶୀରର ଆଠଟି ଜିଲ୍ଲାକୁ କବଜା କରିନେଇଛନ୍ତି।
ପଞ୍ଜଶୀର ଘାଟିରେ ଥିବା ନର୍ଦ୍ଦାନ ଆଲିୟାନ୍ସ ପକ୍ଷରୁ ତାଲିବାନୀଙ୍କୁ ଗରିଲା ଯୁଦ୍ଧ ମାଧ୍ୟମରେ ଟକ୍କର ଦେଉଛନ୍ତି । ଏଯାଏ ସେମାନେ ହାର ମାନିନାହାନ୍ତି । ନର୍ଦର୍ଣ୍ଣ ଆଲାଏନ୍ସର ନେତୃତ୍ୱ ଆଫଗାନିସ୍ତାନର ପୂର୍ବତନ ଉପରାଷ୍ଟ୍ରପତି ଅମରୁଲ୍ଲା ସାଲେହ ଓ ତାଲିବାନ ବିରୋଧୀ ଅହମ୍ମଦ ସାହ ମାସୁଦଙ୍କ ପୁଅ ଅହମ୍ମଦ ମାସୁଦ ନେଉଛନ୍ତି। ସେପଟେ ପଞ୍ଜଶୀରେରେ ଲଢେଇ ଚାଲିଥିଲେ ମଧ୍ୟ ଆଫଗାନିସ୍ତାନରେ ସରକାର ଗଠନ ପାଇଁ ତାଲିବାନ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି। ସରକାର ଗଠନରେ ସାମିଲ ପାଇଁ ୬ ମିତ୍ର ଦେଶକୁ ମଧ୍ୟ ତାଲିବାନ ନିମନ୍ତ୍ରଣ କରିଛି । ଯେଉଁ ୬ଟି ଦେଶକୁ ନିମନ୍ତ୍ରଣ କରାଯାଇଛି ସେହି ସମସ୍ତ ଦେଶ ସହିତ ଆମେରିକାର ଶତ୍ରୁତା ଲାଗି ରହିଛି ।