ପ୍ରମୁଖ ଖବର

ବିଜେପିରେ ଯୋଗ ଦେଲେ ଭର୍ତ୍ତୃହରି ମହତାବ
ଶିବସେନା ସିନ୍ଦେ ଗୋଷ୍ଠୀରେ ସାମିଲ ହେଲେ ବଲିଉଡ୍ ତାରକା ଗୋବିନ୍ଦା
ପଦ୍ମ ଧରିଲେ ଅଭିନେତା ତଥା ବ୍ରହ୍ମପୁରର ପୂର୍ବତନ ସାଂସଦ ସିଦ୍ଧାନ୍ତ ମହାପାତ୍ର

ଧିକ୍ ଏମିତିକା ପୁଅ ବୋହୂ..

0

ଜନମ କରିଥିଲେ ତିନି ତିନିଟା ପୁଅ । ବୟସର ଅପରାହ୍ନରେ ଟିକେ ସାହା ହେବେ ବୋଲି । ହେଲେ ବୃଦ୍ଧାକାଳରେ ପୁଅ,ବୋହୂ କେହି ବାସିରେ ବି ପଚାରିଲେନି । ଗୋଟିଏ କୋଠରୀରେ ବନ୍ଦ କରିଦେଲେ ବୃଦ୍ଧାଙ୍କୁ । ୭ ଦିନ ପରେ ବନ୍ଦ କୋଠରୀରୁ ୮୨ ବର୍ଷୀୟା ବୃଦ୍ଧାଙ୍କ ମୃତଦେହ ମିଳିଲା । ହେଲେ ମୃତ୍ୟୁ ପରେ ମଧ୍ୟ ମୁହଁରେ ନିଆଁ ଦେବାକୁ ବି ଆସିଲେନି ପୁଅ ।

ନବରଙ୍ଗପୁରର ଏହି ଘଟଣା ଏବେ ସ୍ଥାନୀୟ ଅଂଚଳରେ ଚର୍ଚ୍ଚାରେ ବିଷୟ ପାଲଟିଛି । ନବରଙ୍ଗପୁର ଜିଲ୍ଲା ଉମରକୋଟ ଶିବାଜୀନଗରର ବୃଦ୍ଧା କୁସୁମ ନାୟକଙ୍କର ୩ ପୁଅ । ୨୦୦୨ ମସିହାରେ ସ୍ୱାମୀ ଭାଗିରଥୀ ନାୟକଙ୍କର ମୃତ୍ୟୁ ହୋଇଥିଲା । ଏହା ପରେ କୁସୁମ ବଡ଼ ପୁଅ ପାଖରେ ରହିଥିଲେ । ୩ ପୁଅ ମଧ୍ୟରୁ ବଡ଼ ପୁଅର କିଛି ରୋଜଗାର ନଥିଲ । ଆଉ ୨ ପୁଅଙ୍କ ମଧ୍ୟରୁ ଜଣେ ନିର୍ବାହୀ ଯନ୍ତ୍ରୀ ଥିବା ବେଳେ ଆଉ ଜଣେ ନବରଙ୍ଗପୁର ଜିଲ୍ଲାରେ ବରିଷ୍ଠ କିରାଣୀ ଭାବେ କାର୍ଯ୍ୟରତ । କୁସୁମଙ୍କ ସ୍ୱାମୀ ଭାଗିରଥୀ ପୋଷ୍ଟାଲ ବିଭାଗରେ କାମ କରୁଥିଲେ । ତେଣୁ ତାଙ୍କ ମୃତ୍ୟୁ ପରେ କୁସୁମଙ୍କୁ ମିଳୁଥିଲା ପେନସନ ଟଙ୍କା । ଆଉ ପେନସନ ଟଙ୍କା ସେ ନିଜ ପାଖରେ ନରଖି ବଡ଼ ପୁଅର ଘର ଚଳାଇବା ପାଇଁ ଦେଉଥିଲେ ।

ବଡ଼ ପୁଅ , ବୋହୁ ମଧ୍ୟ ମାଙ୍କ ଯତ୍ନ ନେଉଥିଲେ । ହେଲେ ୬ ମାସ ହେବ ବଡ଼ ପୁଅର ମୃତ୍ୟୁ ହୋଇଥିଲା । ଏହା ପରେ ବୋହୂର ଆରମ୍ଭ ହୋଇଯାଇଥିଲା ନିର୍ଯାତନା । ପ୍ରତିଦିନ ବୃଦ୍ଧା ମାଆଙ୍କୁ ନିର୍ଯାତନା ଦେଉଥିଲେ ବୋହୂ । ମାଆଙ୍କ ଭଲ ମନ୍ଦ ବୁଝିବା ତ ଦୂରର କଥା ଦିନକୁ ଦୁଇ ଓଳି ଖାଇବାକୁ ବି ଦେଉନଥିଲେ । ଶେଷରେ ଗୋଟିଏ ଘର ଭିତରେ ବୃଦ୍ଧାଙ୍କୁ ବନ୍ଦ କରି ଛାଡିଦେଇଥିଲେ । ୭ ଦିନ ପରେ ଯେତେବେଳେ ବନ୍ଦ ଘରୁ ଦୁର୍ଗନ୍ଧ ବାହାରିଥିଲା, ମଝିଆ ଓ ସାନ ପୁଅ ବୋହୂ ଖବର ପାଇ ଆସି ପହଞ୍ଚିଥିଲେ । କିନ୍ତୁ ତାଙ୍କୁ ଦେଖାକରିବାକୁ ମନା କରିଦେଇଥିଲୋ ଶେଷରେ ଗାଁ ଲୋକଙ୍କ ଉପସ୍ଥିତିରେ ଘରର କବାଟ ଖୋଲା ହେବା ପରେ ମିଳିଥିଲା ବୃଦ୍ଧା ମାର ମୃତଦେହ ।

ଉମରକୋଟ ପୁଲିସ ପହଞ୍ଚି ବୃଦ୍ଧାଙ୍କ ମୃତଦେହ ଉଦ୍ଧାର କରି ଶବବ୍ୟବଚ୍ଛେଦ ପାଇଁ ପଠାଇଥିଲା । ହେଲେ ମାର ମୃତଦେହ ମିଳିବା ପରେ ଦୁଇ ପୁଅ ନିଜ ନିଜ ଘରକୁ ପଳାଇଥିଲେ । ସରକାରୀ ଚାକିରି କରିଥିବା ଦୁଇ ପୁଅ ମାର ଶବଦାହ କରିବାକୁ ମଧ୍ୟ ଆସିନଥିଲେ । ଯେଉଁ ମା ଜନ୍ମ କରି ଏତେ ବଡ଼ କରିଥିଲା ତା ମୁହଁରେ ନିଆଁ ମଧ୍ୟ ଦେଲେନି । ତେବେ ବୃଦ୍ଧାଙ୍କ ମୃତ୍ୟୁ ପାଇଁ ଯେଉଁମାନେ ଦାୟୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଛି ।

Leave A Reply

Your email address will not be published.