ହସ୍ପିଟାଲ ବେଡ଼ରୁ ଉଠି ସୁସ୍ଥ ହୋଇ ଫେରିବେ ଅମ୍ରିତ । ପୁଣି ପୂର୍ବ ପରି ଆରମ୍ଭ କରିବେ ଜୀବନ । ଅପରସେନ ପରେ ଅମ୍ରିତ ପ୍ରଧାନଙ୍କ ଜୀବନ ଜୀଇଁବାର ଆଶା ଉଇଁଛି । ଚେନ୍ନାଇରେ ଏକମୋ ଚିକିତ୍ସାରେ ଚିକିତ୍ସିତ ହେଉଥିବା ଅମ୍ରିତଙ୍କ କରାଯାଇଛି ଫୁସପୁସ ପ୍ରତିରୋପଣ । ଦୀର୍ଘ ୧୯ ଘଣ୍ଟା ଧରି ସଫଳ ଅସ୍ତ୍ରୋପଚାର ପରେ ଅମ୍ରିତଙ୍କ ଦେହରେ ଲାଗିଛି ଫୁସଫୁସ ।
କୋଭିଡ ସଂକ୍ରମିତ ହେବା ପରେ ଅମ୍ରିତଙ୍କ ଫୁସ୍ଫୁ୍ସ ସଂକ୍ରମିତ ହୋଇଥିଲା । ଏହା ପରେ ୧୪୧ ଦିନ ହେବ ଏକମୋରେ ରହିବା ପରେ ମଧ୍ୟ ସ୍ୱାସ୍ଥ୍ୟରେ କୌଣସି ସୁଧାର ଆସିନଥିଲା । ଏହା ପରେ ଡାକ୍ତର ଫୁସ୍ଫୁସ୍ ପ୍ରତିରୋପଣ କରିବା ପାଇଁ ପରାମର୍ଶ ଦେଇଥିଲେ । ଅମ୍ରିତଙ୍କ ଫୁସଫୁସ ପ୍ରତିରୋପଣ କରିବା ଆବଶ୍ୟକ ଥିବା ବେଳେ ଫୁସଫୁସ ଯୋଗାଡ଼ ମଧ୍ୟ ହୋଇଯାଇଥିଲା।
ସୂଚନା ଅନୁସାରେ ସ୍ଥାନୀୟ ଅଞ୍ଚଳରେ ଜଣେ ଯୁବକ ଛାତରୁ ପଡ଼ି ଗୁରୁତର ହୋଇପଡିଥିଲେ । ଭେଂଟିଲେଟରରେ ରହିବା ପରେ ଯୁବକଙ୍କ ମୃତ୍ୟୁ ହୋଇଥିଲା । ଏହା ପରେ ତାଙ୍କ ଫୁସଫୁସକୁ ନେଇ ଅମ୍ରିତଙ୍କ ଦେହରେ ପ୍ରତିରୋପଣ କରାଯାଇଛି । କରୋନାରେ ପୀଡିତ ହୋଇ ଫୁସଫୁସ ସଂକ୍ରମିତ ହେବା ପରେ ଅମ୍ରିତଙ୍କ ଏକମୋ ଚିକିତ୍ସା ଜରୁରୀ ହୋଇପଡ଼ିଥିଲା । ରାଜ୍ୟ ବାହାରକୁ ନେଇ ଚିକିତ୍ସା କରିବା ପାଇଁ ଅର୍ଥ ମଧ୍ୟ ଦରକାର ଥିଲା । ସୋସିଆଲ ମିଡଆରେ ପରିବାର ଲୋକଙ୍କ ଅନୁରୋଧ ପରେ ସବୁଆଡୁ ଛୁଟିଥିଲା ସହାୟତାର ସୁଅ । ମିଲାପ ଫଣ୍ଡ ଜରିଆରେ ଅର୍ଥ ଯୋଗାଡ ହୋଇଯାଇଥିଲା । ଏହା ପରେ ଜୁନ୍ ୩ରେ ଭୁବନେଶ୍ୱରରୁ ଅମ୍ରିତଙ୍କୁ ଏୟାରଲିଫ୍ଟ କରି ଚେନ୍ନାଇ ନିଆଯାଇଥିଲା । ଅମ୍ରିତଙ୍କ ଚିକିତ୍ସା ପାଇଁ କୋଟି କୋଟି ଟଙ୍କା ଖର୍ଚ୍ଚ ହୋଇସାରିଲାଣି । ପାଖାପଖି ଅଢେଇ କୋଟି ଟଙ୍କା ଖର୍ଚ୍ଚ ହୋଇସାରିଥିବା ବେଳେ ଅନଲାଇନ ପେମେଂଟ ମାଧ୍ୟମରେ ଦେଢ କୋଟି ଟଙ୍କା ମିଳିଥିଲା । ତେଣୁ ଅମ୍ରିତଙ୍କ ପରିବାର ଲୋକ ଆର୍ଥିକ ସହାୟତା ପାଇଁ ଏବେ ନିବେଦନ କରିଛନ୍ତି ।