ମଧ୍ୟପ୍ରଦେଶ ଭୋପାଳରେ ‘ଆଶ୍ରମ ଥ୍ରୀ’ ୱେବ ସିରିଜ ସୁଟିଂ ବେଳେ ହଙ୍ଗାମା । ବଜରଙ୍ଗ ଦଳର କିଛି ଲୋକ ସୁଟିଂ ସମୟରେ ଗାଡି ଭଙ୍ଗାରୁଜା କରିବା ସହ ନିର୍ଦ୍ଦେଶକ ପ୍ରକାଶ ଝାଙ୍କ ଉପରେ ଆକ୍ରମଣ କରିଛନ୍ତି । ଘଟଣା ପରେ ତୁରନ୍ତ ପୁଲିସ ପହଞ୍ଚି ବଜରଙ୍ଗ ଦଳର କର୍ମୀଙ୍କୁ ଘଉଡାଇଥିଲା । ବଜରଙ୍ଗ ଦଳର କର୍ମୀମାନେ ଭୋପାଳ ଅରେରା ହିଲ୍ସର ପୁରୁଣା ଜେଲ ରାସ୍ତାରେ ସୁଟିଂକୁ ଅଟକାଇ ଗାଡି ଭଙ୍ଗାରୁଜା କରିଛନ୍ତି । ଗତ ୩ ଦିନ ଧରି ଆଶ୍ରମ ଥ୍ରୀ ୱେବ
ସିରିଜର ସୁଟିଂ ଚାଲିଛି । ଅଭିନେତା ବବି ଦେଓଲ ମଧ୍ୟ ସୁଟିଂ ସମୟରେ ସେଠାରେ ଥିଲେ ।
ବଜରଙ୍ଗ ଦଳର ସ୍ଥାନୀୟ ସଂଯୋଜକ ସୁଶୀଲ ଚେତାବନୀ ଦେଇଛନ୍ତି ଯେ, ପ୍ରକାଶ ଝାଙ୍କୁ ଫିଲ୍ମର ନାମ ବଦଳାଇବାକୁ ପଡିବ । ଯଦି ଫିଲ୍ମର ନାଁ ନବଦଳିଲା ସେ ସୁଟିଂ ହେବାକୁ ଦେବେନାହିଁ । କେବେଳ ଏତିକି ନୁହେଁ ଫିଲ୍ମ ରିଲିଜ ବି ହେବାକୁ ଦେବେନି ବୋଲି କହିଛନ୍ତି । ବଜରଙ୍ଗ ଦଳର ସ୍ଥାନୀୟ ସଂଯୋଜକ ସୁଶୀଲ ଅଭିଯୋଗ କରିଛନ୍ତି ଯେ, ପ୍ରକାଶ ଝା ହିନ୍ଦୁ ଧର୍ମକୁ ବଦନାମ କରୁଛନ୍ତି । ସେ କହିଛନ୍ତି , ଆଶ୍ରମ ପରମ୍ପରା ଆମ ପରିଚୟ। ଯଦି କେଉଁ ଆଶ୍ରମରେ ଅପରାଧ ହୋଇଛି , ତେବେ ସେହି ଆଶ୍ରମ ନାଁରେ ସେ ଫିଲ୍ମ ନିର୍ମାଣ କରନ୍ତୁ । କିନ୍ତୁ ସମସ୍ତ ଆଶ୍ରମକୁ ବଦନାମ ନକରନ୍ତୁ । ସେପଟେ ହଙ୍ଗାମା କରିଥିବା ଲୋକଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଡିଆଇଜି ।