ଭାରତରେ କରୋନା ସଂକ୍ରମଣ ହ୍ରାସ ପାଉଥିବା ବେଳେ ଏବେ ପୁଣି ଘାରିଛି ଭୟ । ଭାରତରେ ଚିହ୍ନଟ ହୋଇଛି ବ୍ରିଟେନର ଆତଙ୍କ ସୃଷ୍ଟି କରିଥିବା ଭୂତାଣୁ । ବ୍ରିଟେନ ଓ ୟୁରୋପର ଅନେକ ଦେଶରେ ହଇଚଇ ସୃଷ୍ଟି କରୁଥିବା ନୂଆ ପ୍ରକାର ଡେଲଟା ପ୍ଲସ ଏୱାଇ ୪ ପଏଣ୍ଟ ୨ ଏବେ ଭାରତରେ ମିଳିଛି ।
ସିଏସଆଇଆର ଇନଷ୍ଟିଚ୍ୟୁଟ ଅଫ ଜେନୋମିକ୍ସ ଏବଂ ଇଂଟିଗ୍ରେଟିଭ୍ ବାୟୋଲୋଜି ନିର୍ଦ୍ଦେଶକ ଡକ୍ଟର ଅନୁରାଗ ଅଗ୍ରୱାଲ କହିଛନ୍ତି ଯେ, ଏହି ନୂଆ ଭୂତାଣୁ ବ୍ରିଟେନରୁ ଆସିଥିବା ବେଳେ ଏହା ଉପରେ ବୈଜ୍ଞାନିକ ମାନେ ନଜର ରଖିଛନ୍ତି । ତେବେ ନୂଆ ଭୂତାଣୁ କୋଭିଡ ଟିକା ଦ୍ୱାରା ସୃଷ୍ଟି ହେଉଥିବା ପ୍ରତିରୋଧ ଶକ୍ତିକୁ ଦୁର୍ବଳ କରୁଛି କି ନାହିଁ ଏନେଇ କିଛି ପ୍ରମାଣ ମିଳିନାହିଁ । ଏହା ସହିତ ଏହି ନୂଆ ଭ୍ୟାରିଆଣ୍ଟ ରେ ସଂକ୍ରମିତ ଓ ମୃତ୍ୟୁ ହେବା ବହୁତ କମ ମାମଲା ସାମନାକୁ ଆସିଛି ।
ଆଇଏନଏସଏସିଓଜିର ଜଣେ ବୈଜ୍ଞାନିକ କହିଛନ୍ତି ଯେ, ଖୁବ ଶୀଘ୍ର ଏହି ଭ୍ୟାରିଆଣ୍ଟ ର ସଂକ୍ରମିତ ହେଉଥିବା ମାମଲା ଗୁଡିକ ଘୋଷଣା କରାଯିବ । ଆଇଏନଏସଏସିଓଜି ହେଉଛି, କରୋନାର ଜେନୋମିକ ସିକ୍ୱେନ୍ସ ଉପରେ କାମ କରୁଥିବା ଲ୍ୟାବ୍ସ ଗୁଡିକର ଏକ ସଂଘ । ଆଇଏନଏସଏସିଓଜି ଅନୁଯାୟୀ, ଅକ୍ଟୋବର ୧୧ ପର୍ଯ୍ୟନ୍ତ ଭାରତରେ ଏୱାଇ ଭ୍ୟାରିଆଂଟର ୪ ହଜାର ୭୩୭ ମାମଲା ସାମନାକୁ ଆସିଛି ।
ବ୍ରିଟେନରେ ଏୱାଇ ୪ପଏଂଟ ୨ ଭ୍ୟାରିଆଣ୍ଟ ସେଠାରେ ପୁଣି ସଂକ୍ରମଣ ବୃଦ୍ଧି କରିଛି। ୟୁକେର ବୈଜ୍ଞାନିକ ମାନେ ଏହି ଭ୍ୟାରିଆଣ୍ଟ କୁ ‘ଭ୍ୟାରିଆଣ୍ଟ ଅଣ୍ଡର ଇନଭେଷ୍ଟିଗେସନ’ନାଁରେ ଶ୍ରେଣୀଭୁକ୍ତ କରିଛନ୍ତି । ବ୍ରିଟେନର ସ୍ୱାସ୍ଥ୍ୟ ଅଧିକାରୀଙ୍କ ଅନୁଯାୟୀ, ଏୱାଇ ୪ପଏଂଟ ୨ର ଅଭିବୃଦ୍ଧି ହାର ଡେଲଟା ତୁଳନାରେ ୧୭ ପ୍ରତିଶତ ଅଧିକ । ଅକ୍ଟୋବର ୨୩ରେ ବ୍ରିଟେନରେ ୫୦ ହଜାରରୁ ଅଧିକ କୋଭିଡ ମାମଲା ଚିହ୍ନଟ ହୋଇଥିଲା । ଯାହା ୧୭ ଜୁଲାଇ ପରେ ସବୁଠୁ ଅଧିକ ।
ଭାରତ ପାଇଁ ଚିନ୍ତାର ବିଷୟ ଏହା ଯେ, ବିଟ୍ରେନରୁ ଆସୁଥିବା ଅନ୍ତର୍ଜାତୀୟ ବିମାନ ଚଳାଚଳ ପୁଣି ଆରମ୍ଭ ହୋଇଯାଇଛି । ଭାରତ ବ୍ରିଟେନରୁ ଆସୁଥିବା ଯାତ୍ରୀଙ୍କ ପାଇଁ ୧୪ ଦିନ କ୍ୱାରେଣ୍ଟ।ଇନ ଓ ଆରଟିପିସିଆର ଟେଷ୍ଟ ବାଧ୍ୟତାମୂଳକ ଥିବା କଟକଣା ମଧ୍ୟ ଉଠାଇଦେଇଛି । ଏବେ ନେଗେଟିଭ ରିପୋର୍ଟ ଓ ଟିକା ପ୍ରମାଣପତ୍ର ଦେଖାଇବାକୁ କୁହାଯାଇଛି । କେବେଳ ୩୦ ପ୍ରତିଶତ ଲୋକ ଦେଶରେ ଉଭୟ ଡୋଜ ଟିକା ନେଇଛନ୍ତି । ଭାରତରେ ଏବେ ପିଲାମାନଙ୍କ ପାଇଁ ଟିକାକରଣ ମଧ୍ୟ ଆରମ୍ଭ ହୋଇନାହିଁ ।