ନୂଆଦିଲ୍ଲୀ: ଭାରତର କରୋନା ଭ୍ୟାକ୍ସିନ କୋଭାକ୍ସିନ ଓ କୋଭିସିଲ୍ଡକୁ ୯୬ଟି ରାଷ୍ଟ୍ରର ମାନ୍ୟତା ମିଳିଛି। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ କହିଛନ୍ତି ଯେ, ୯୬ଟି ଦେଶ ଭାରତ ସହିତ କୋଭିଡ ଟିକାକରଣ ପ୍ରମାଣପତ୍ରକୁ ପାରସ୍ପରିକ ସ୍ୱୀକୃତି ଦେବାକୁ ରାଜି ହୋଇଛନ୍ତି। ବିଶ୍ୱ ସ୍ୱାସ୍ଥ୍ୟ ସଂଗଠନ ଯେଉଁ ୮ଟି ଟିକାକୁ ଜରୁରୀକାଳୀନ ବ୍ୟବହାର ପାଇଁ ଅନୁମତି ଦେଇଛି, ସେଥିରୁ ଭାରତର ପ୍ରସ୍ତୁତ କୋଭାକ୍ସିନ ଓ କୋଭିସିଲ୍ଡ ରହିଛି।
ଯେଉଁ ୯୬ଟି ଦେଶ ଭାରତର ଦୁଇ ସ୍ୱଦେଶୀ ଟିକାକୁ ସ୍ୱୀକୃତି ଦେଇଛନ୍ତି ସେହି ଦେଶଗୁଡିକ ମଧ୍ୟରେ କାନାଡ଼ା,ଆମେରିକା, ବ୍ରିଟେନ,ଫ୍ରାନ୍ସ, ଜର୍ମାନୀ, ବେଲଜିୟମ, ନେଦରଲ୍ୟାଣ୍ଡ, ସ୍ପେନ, ବାଲାଂଦେଶ, ଫିନଲ୍ୟାଣ୍ଡ,ମାଲି,ଘାନା, ନାଇଜେରିଆ, ସର୍ବିଆ, ପୋଲାଣ୍ଡ, ବୁଲଗେରିଆ, ସୁଇଜରଲ୍ୟାଣ୍ଡ, ସ୍ୱିଡେନ,ଅଷ୍ଟ୍ରିଆ,ଋଷିଆ, କୁଏତ ,କତାର ରହିଛନ୍ତି।
ଆସନ୍ତା ୨୨ ତାରିଖରୁ ବ୍ରିଟେନ ଅନ୍ତର୍ଜାତୀୟ ଯାତ୍ରୀଙ୍କ ପାଇଁ ଏହାର ସ୍ୱୀକୃତିପ୍ରାପ୍ତ କୋଭିଡ ଟିକା ତାଲିକାରେ କୋଭାକ୍ସିନ ସାମିଲ ହେବ । ବିଶ୍ୱର ଅନ୍ୟ ଦେଶରେ ଦୁଇ ସ୍ୱଦେଶୀ ଭ୍ୟାକସିନକୁ ସ୍ୱୀକୃତି ଦେବାକୁ ସ୍ୱାସ୍ଥ୍ୟ ଓ ବିଦେଶମନ୍ତ୍ରାଳୟ ମିଶିକି କାମ କରୁଛନ୍ତି । ସମଗ୍ର ବିଶ୍ୱର ସବୁଠୁ ବଡ଼ ଟିକାକରଣ କାର୍ଯ୍ୟକ୍ରମରେ ଏବେ ସରକାର ଘରକୁ ଘର ଯାଇ ଟିକା ଦେବ ଆରମ୍ଭ କରିଛନ୍ତି। ଏଥିରେ ସ୍ୱାସ୍ଥ୍ୟକର୍ମୀମାନେ ସମସ୍ତଙ୍କ ଘରକୁ ଯାଇ ଯେଉଁମାନେ ଟିକା ନେଇନାହାଁନ୍ତି ସେମାନଙ୍କୁ ଟିକା ଦେଉଛନ୍ତି।
ଏବେ ଦେଶରେ ୧୯୦ କୋଟିରୁ ଅଧିକ ଟିକାକରଣ ସରିଲାଣି । ୭୪ କୋଟି ୨୧ ଲକ୍ଷ ୬୨ ହଜାର ୯୪୦ ଜଣ ପ୍ରଥମ ଡୋଜ, ୩୪ କୋଟି ୮୬ ଲକ୍ଷ ୫୩ ହଜାର ୪୧୬ ଜଣଙ୍କୁ ଦ୍ୱିତୀୟ ଡୋଜ ଦିଆଯାଇଛି। ଦେଶରେ ଟିକାକରଣ ସଫଳତାର ସହ ଆଗକୁ ବଢୁଛି ଏବଂ ଆଗକୁ ମଧ୍ୟ ଆହୁରି ଜୋରାଦାର କରାଯିବ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମନସୁଖ ମାଣ୍ଡଭୀୟ କହିଛନ୍ତି।