ଡାକ୍ତର ମୃତ ଘୋଷଣା କରିବାର ୭ ଘଣ୍ଟା ବିତିଯାଇଥିଲା । ଘରେ କାନ୍ଦବୋବାଳି ପଡିଥିଲା । ମୃତ ଘୋଷଣା ପରେ ମୃତଦେହକୁ ନେଇ ହସ୍ପିଟାଲର ଶବ ଗୃହରେ ରଖାଯାଇଥିଲା । କିନ୍ତୁ ଶବ ବ୍ୟବଚ୍ଛେଦ ହେବା ଆଗରୁ ହଠାତ ଫେରିଲା ଜୀବନ । ଏ ଘଟଣା ହୁଏତ ଆପଣଙ୍କୁ ଆଶ୍ଚର୍ଯ୍ୟ କରିପାରେ । କିଭଳି ଜଣେ ମୃତ ଘୋଷଣା ବ୍ୟକ୍ତି ପୁଣି ଥରେ ଜୀବନ ଫେରିପାଇଲେ ମନରେ ପ୍ରଶ୍ନ ଉଠିପାରେ । କିନ୍ତୁ ଏହା ସତ୍ୟ ।
ଉତ୍ତରପ୍ରଦେଶ ମୁରଦାବାଦ ଅଞ୍ଚଳ ର ଶ୍ରୀକେଶ କ୍ଷୀର ଆଣିବାକୁ ରାତିରେ ଯାଉଥିବା ବେଳେ ଦୁର୍ଘଟଣାର ଶିକାର ହୋଇଥିଲେ । ରାସ୍ତା ପାର କରୁଥିବା ସମୟରେ ତାଙ୍କୁ ଏକ ଗାଡି ଧକ୍କା ଦେବାରୁ ସେ ଗୁରୁତର ହୋଇପଡିଥିଲେ ।ଏହା ପରେ ପରିବାର ଲୋକ ତାଙ୍କୁ ଏଇ ମେଡିକାଲରୁ ସେଇ ମେଡିକାଲ ଏମିତି ୩ଟି ହସ୍ପିଟାଲ ଧରି ବୁଲିଥିଲେ । କିନ୍ତୁ କେଉଁଠି ଚିକିତ୍ସା ସୁବିଧା ମିଳିପାରିନଥିଲା । ଆଉ ଶେଷରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଶ୍ରୀକେଶଙ୍କୁ ହରାଇବା ପରେ ପରିବାର ଲୋକ ଭାଙ୍ଗିପଡିଥଲେ । ଘରେ ଶୋକାକୁଳ ପରିସ୍ଥିତି ଉପୁଜିଥିଲା । ଡାକ୍ତରଙ୍କ ମୃତ ଘୋଷଣା ପରେ ସରକାରୀ ହସ୍ପିଟାଲରେ ଥିବା ଶବଗୃହରେ ତାଙ୍କୁ ରଖାଯାଇଥିଲା । ଏହା ପରେ ପାଖାପାଖି ୭ ଘଣ୍ଟା ପରେ ଯେତେବେଳେ ପୋଷ୍ଟମର୍ଟମ ପାଇଁ ନିଆଯାଇଥିଲା ସେତେବେଳେ ଶ୍ରୀକେଶ ଜୀବିତ ଥିବା ଜଣାପଡିଥିଲା । ଶବ ବ୍ୟବଚ୍ଛେଦ କରୁଥିବା ଡାକ୍ତର ଚେକ ଅପ ପରେ ସେ ଜୀବିତ ଥିବା ନିଶ୍ଚିତ କରିଥିଲେ । ଏହା ପରେ ପରିବାରରେ ଖୁସିର ଲହରୀ ଖେଳିଯାଇଥିଲା ।
ତେବେ ଏହି ଘଟଣାକୁ ନେଇ ସ୍ଥାନୀୟ ଅଂଚଳରେ ଚର୍ଚ୍ଚା ହେଉଥିବା ବେଳେ ଡାକ୍ତରଙ୍କ ଦାୟିତ୍ୱହୀନତା ନେଇ ପ୍ରଶ୍ନ ଉଠିଛି । ଅନ୍ୟପଟେ ଡାକ୍ତରଙ୍କ କହିବା କଥା, କିଛି କେସରେ ଏମିତି ହୋଇଥାଏ । ଯେତେବେଳେ ଜଣେ ବ୍ୟକ୍ତି ଗୁରୁତର ଥାଏ, ତାଙ୍କୁ କିଛି ମେଡିସିନ ଦିଆଯାଇଥାଏ । ସେତେବେଳେ ବହୁ ସମୟ ପର୍ଯ୍ୟନ୍ତ କିଛି ଜଣଙ୍କ ଶରୀରରେକୌଣସି ପ୍ରଭାବ ଦେଖିବାକୁ ମିଳିନଥାଏ । ଫଳରେ ସେ ମୃତ କି ଜୀବିତ ଜାଣିବା କଷ୍ଟକର ହୋଇଥାଏ ।