ଦକ୍ଷିଣ ଆଫ୍ରିକାରୁ ଚିହ୍ନଟ ହୋଇଥିବା କରୋନା ନୂଆ ଭ୍ୟାରିଆଣ୍ଟ ଓମିକ୍ରନ ଲୋକଙ୍କ ଭିତରେ ପୁଣି ଭୟର ବାତାବରଣ ସୃଷ୍ଟି କରିଛି । ଏହି ନୂଆ ଭ୍ୟାରିଆଣ୍ଟ ଅତ୍ୟନ୍ତ ମାରାତ୍ମକ ଏବଂ ସାବଧାନ ରହିବାକୁ ପରାମର୍ଶ ଦେଇଛନ୍ତି ମେଦାନ୍ତ ମେଡିସିଟି ଚେୟାରମ୍ୟାନ ଡାକ୍ତର ନରେଶ ତ୍ରେହନ।
ଡାକ୍ତର ତ୍ରେହନ କହିଛନ୍ତି ଯେ, ଏହି ନୂଆ ଭ୍ୟାରିଆଣ୍ଟ ଦକ୍ଷିଣ ଆଫ୍ରିକା, ବେଲଜିୟମ, ହଙ୍ଗକଙ୍ଗ, ବୋତ୍ସୱାନା ସମେତ ଅନ୍ୟ ଦେଶରେ ଦ୍ରୁତ ଗତିରେ ବ୍ୟାପୁଛି।ଓମିକ୍ରନ କରୋନାର ଡେଲଟା ଭ୍ୟାରିଆଣ୍ଟ ଠାରୁ ଅଧିକ ମାରାତ୍ମକ। ଓମିକ୍ରନ ୩୦ ଥର ମ୍ୟୁଟେସନ ହୋଇଥିବା ବେଳେ, ଡେଲଟା ଭ୍ୟାରିଆଣ୍ଟ ୧୫ ଥର ମ୍ୟୁଟେସନ ହୋଇଥିଲା। ତେଣୁ ଏହା ଅଧିକ ସଂକ୍ରାମକ। ‘ହୁ’ ଏହାକୁ ଭ୍ୟାରିଆଣ୍ଟ ଅଫ କନସର୍ନ କ୍ୟାଟାଗୋରିରେ ରଖିଛି। ଡାକ୍ତର ତ୍ରେହେନ ଲୋକଙ୍କୁ ସାବଧାନ ରହିବାକୁ ପରାମର୍ଶ ଦେଇଛନ୍ତି। ଏବଂ କହିଛନ୍ତି ଏହା ଟିକାର ରୋଗ ପ୍ରତିରୋଧକ ଶକ୍ତି ଉପରେ ନିର୍ଭର କରେ।
ତେବେ ଭଲ କଥା ହେଉଛି ଏହି ନୂଆ ଭ୍ୟାରିଆଣ୍ଟ କରୋନା ଆରଟିପିସିଆର ଟେଷ୍ଟ ମାଧ୍ୟମରେ ଜଣାପଡୁଛି। ଓମିକ୍ରନ ଭ୍ୟାରିଆଣ୍ଟ ନେଇ ଚେତାବନୀ ମିଳିବା ପରେ,ଏହାକୁ ରୋକିବା ପାଇଁ ସରକାର, ଡାକ୍ତର, ସ୍ୱାସ୍ଥ୍ୟକର୍ମ ଓ ଅନ୍ୟମାନେ ଏନେଇ ପ୍ରସ୍ତୁତ ହୋଇଯିବା ଦରକାର। ନୂଆ ଭ୍ୟାରିଆଣ୍ଟ ବ୍ୟାପୁଥିବା ଦେଶମାନଙ୍କୁ ତୁରନ୍ତ ଯାତ୍ରୀମାନଙ୍କ ଯାତାୟାତ ଉପରେ କଟକଣା ଲଗାଇବା ଜରୁରୀ ଅଟେ। ଡିସେମ୍ବର ୧୫ରୁ ହେବାକୁ ଥିବା ଅନ୍ତର୍ଜାତୀୟ ବିମାନ ଉଡାଣ ଉପରେ ପୁର୍ନ ବିଚାର କରିବା ଆବଶ୍ୟକ।
ଡାକ୍ତର ତ୍ରେହେନଙ୍କ କହିବା ଅନୁଯାୟୀ,ଦେଶରେ କରୋନା ସଂକ୍ରମଣ କମିବା ପରେ ଲୋକେ ପୁଣି ବିବାହ, ସର୍ବସାଧାରଣ ସ୍ଥାନରେ ବିନା ମାସ୍କରେ ବୁଲିବା ଆରମ୍ଭ କରିଦେଇଛନ୍ତି। କିନ୍ତୁ ଏବେ ସମସ୍ତଙ୍କୁ ସତର୍କତା ଅବଲମ୍ବନ କରିବାକୁ ପଡିବ । ଯଦି ମାସ୍କ ପିନ୍ଧିବା ସହିତ କରୋନା ନିୟମ ଠିକ ସେ ପାଳନ କରାଯାଏ,ତାହେଲେ କିଛି ମାତ୍ରାରେ ବିପଦ ଟଳିପାରେ ।ଭ୍ୟାକସିନର ଦୁଇଟି ଡୋଜ ପରେ ବୁଷ୍ଟର ଡୋଜ କେତେ ଗୁରୁତ୍ୱପୂର୍ଣ୍ଣ ପ୍ରଶ୍ନରେ ଡାକ୍ତର ତ୍ରେହେନ କହିଛନ୍ତି ଯେ, ଡାକ୍ତର,ସ୍ୱାସ୍ଥ୍ୟ କର୍ମୀ, ଓ ଆଗଧାଡିର କରୋନା ଯୋଦ୍ଧା ମାନେ କରୋନାର ଦୁଇଟି ଟିକା ନେଇସାରିଛନ୍ତି । ତେଣୁ ୮ରୁ ୯ ମାସ ପରେ ଏମାନଙ୍କ ରୋଗ ପ୍ରତିରୋଧକ ଶକ୍ତି କମିଥାଇପାରେ ,ତେଣୁ ସେମାନଙ୍କୁ ପ୍ରଥମେ ବୁଷ୍ଟର ବୋଜ ଆବଶ୍ୟକ।