ଗୃହ ଭିତରେ , ଗୃହ ବାହାରେ ସବୁଠୁ ମମିତା ପ୍ରସଙ୍ଗକୁ ନେଇ ଝଡ଼ । ଗତକାଲି ବିଜେପିର ଋଣହୁଙ୍କାର ପରେ ଆଜି ରାଜଧାନୀ ରାଜରାସ୍ତାରେ ତାତିଲା କଂଗ୍ରେସ । ବିଧାନସଭା ଆଗରେ ଛାତ୍ର କଂଗ୍ରେସର ହାଇଡ୍ରାମା ଦେଖିବାକୁ ମିଳିଛି । ବିଧାନସଭା ଫାଟକ ଭାଙ୍ଗି ଭିତରକୁ ପ୍ରବେଶ ପାଇଁ ଉଦ୍ୟମ ବେଳେ ମୁହାଁମୁହିଁ ହୋଇଛନ୍ତି ଛାତ୍ର କଂଗ୍ରେସ ଓ ପୁଲିସ । ଫଳରେ ଋଣକ୍ଷେତ୍ର ପାଲଟିଛି ରାଜଧାନୀ ରାଜରାସ୍ତା ।
ମମିତାଙ୍କୁ ନ୍ୟାୟ ଓ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବିରେ ପ୍ରତିବାଦ କରିଛି ଛାତ୍ର କଂଗ୍ରେସ । ସରକାର ବଳପ୍ରୟୋଗ କରି ଏହି ପ୍ରସଙ୍ଗକୁ ଚପାଇବାକୁ ଉଦ୍ୟମ କରୁଥିବା କହିଛି କଂଗ୍ରେସ । ଆଜି ବିଧାନସଭା ଫାଟକ ଭିତରେ ଧସେଇ ପଶିବାକୁ ଉଦ୍ୟମ କରିଥିଲା । ସୁରକ୍ଷା ବଳୟ ଟପି ବିଧାନସଭା ମୁଖ୍ୟ ଫାଟକ ଯାଏ ଚାଲିଯାଇଥିଲେ କଂଗ୍ରେସ କର୍ମୀ । ଫଳରେ ପୁଲିସ ଓ ଛାତ୍ର କଂଗ୍ରେସ କର୍ମୀ ମୁହାଁମୁହିଁ ହୋଇଥିଲେ ।
ଛାତ୍ର କଂଗ୍ରେସ ପକ୍ଷରୁ ପୁଲିସ ଉପରକୁ ଅଣ୍ଡା ମାଡ଼,ଟମାଟୋ ମାଡ଼, ପଥର ମାଡ କରାଯାଇଥିଲା । ଏହାର ଜବାବରେ ଛାତ୍ର କଂଗ୍ରେସ କର୍ମୀଙ୍କୁ ଘଉଡାଇବାକୁ ଯାଇ ପୁଲିସ ପକ୍ଷରୁ ଲାଠିମାଡ଼ କରାଯାଇଥିଲା । ଫଳରେ ଘଟଣା ସ୍ଥଳରେ ଉେ ଜନାମୂଳକ ସ୍ଥିତି ଦେଖାଦେଇଥିଲା । ଲାଠିମାଡ଼ରେ ଜଣକ ମୁଣ୍ଡ ମଧ୍ୟ ଫାଟିଯାଇଛି । କଂଗ୍ରେସ ଭବନରେ ମଧ୍ୟ ପଶି ପୁଲିସ ଲାଠିମାଡ଼ କରିଥିଲା । କିଛି କର୍ମୀଙ୍କୁ ପୁଲିସ ଉଡାଇ ନେଇଛି । ଗତକାଲି ବିଜେପି ମଧ୍ୟ ସମାନ ପ୍ରସଙ୍ଗରେ ବିଧାନସଭା ଘେରାଉ ବେଳେ ଏଭଳି ପରିସ୍ଥିତି ଉପୁଜିଥିଲା ।
ଲୋୟର ପିଏମଜିରେ ବିଜେପି ଯୁବ ମୋର୍ଚ୍ଚା ଓ ପୁଲିସ ମୁହାଁମୁହିଁ,ଧସ୍ତାଧସ୍ତି ହୋଇଥିଲେ । ବିଜେପି କର୍ମୀ ପୁଲିସ ଉପରକୁ ପଥର ମାଡ଼ କରିଥିଲେ । ଏହା ପରେ ପୁଲିସ , ବିଜେପି କର୍ମୀଙ୍କୁ ଘଉଡାଇବାକୁ ଯାଇ ଲାଠିମାଡ଼ କରିଥିଲା । ଗତକାଲି ଭଳି ଆଜି ମଧ୍ୟ ବିଧାନସଭା ଆଗରେ ରକ୍ତାକ୍ତ ସଂଘର୍ଷ ଦେଖିବାକୁ ମିଳିଛି ।