କରୋନାର ନୂଆ ଭ୍ୟାରିଆଣ୍ଟ ଓମିକ୍ରନ ଦ୍ରୁତ ଗତିରେ ବ୍ୟାପୁଥିବା ବେଳେ ସାରା ଦେଶରେ ଏହାକୁ ନେଇ ତର୍କ ବିତର୍କ ଓ ଗବେଷଣା ଚାଲିଛି । ବୁଷ୍ଟର ଡୋଜ ନେବା କେତେ ଆବଶ୍ୟକ ସେ ନେଇ ଆଲୋଚନା ହେଉଛି । କରୋନାରୁ ବର୍ତ୍ତିବା ପାଇଁ ବୁଷ୍ଟର ଡୋଜ ଦେବାକୁ ଦାବି ହେଉଛି । ତେବେ ଭାରତରେ ବୁ୍ଷ୍ଟର ଡୋଜ ଦିଆଯିବ କି ନାହିଁ ସେ ନେଇ ଆଜି ନିଷ୍ପତ୍ତି ନିଆଯାଇପାରେ ।
ବୁଷ୍ଟର ଡୋଜର ଆବଶ୍ୟକତା ରହିଛି କି ନାହିଁ ସେ ନେଇ ବିଶେଷଜ୍ଞ କମିଟିର ବୈଠକ ବସିବ ଡ୍ରଗ୍ସ କଣ୍ଟ୍ରୋଲର ଅଫ ଇଣ୍ଡିଆ ଅଧିନରେ ଥିବା ବିଶେଷଜ୍ଞ କମିଟି ବୁଷ୍ଟର ଡୋଜ ସମ୍ବନ୍ଧରେ ବୈଠକ କରିବ । ନିକଟରେ କୋଭିସିଲ୍ଡ ବୁଷ୍ଟର ଡୋଜକୁ ଅନୁମୋଦନ ପାଇଁ ଆବେଦନ କରିଛି ସିରମ ଇନଷ୍ଟିଚ୍ୟୁଟ ଅଫ ଇଣ୍ଡିଆ । ଦେଶ ପାଇଁ ଆବଶ୍ୟକ ଥିବା ଟିକା ଏବେ ମହଜୁଦ ରହିଛି । ୟୁକେରେ ଆଷ୍ଟ୍ରାଜେନେକା ଟିକାକୁ ବୁଷ୍ଟର ଡୋଜ ପାଇଁ ଅନୁମତି ମିଳିଥିବାରୁ ଭାରତରେ ମଧ୍ୟ ଅନୁମତି ଦେବାକୁ ଅନୁରୋଧ କରାଯାଇଛି ।
ବୁଷ୍ଟର ଡୋଜ ଦେବା ଦାବିକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଖାରଜ କରିଛି । ମନ୍ତ୍ରାଳୟ କହିଛି,ଦ୍ୱିତୀୟ ଡୋଜ ନେବାର ୯ ମାସ ମଧ୍ୟରେ ତୃତୀୟ ଡୋଜ ନେବାର ଆବଶ୍ୟକତା ନାହିଁ । ସେହିପରି ବୁଷ୍ଟର ଡୋଜ ପରିବର୍ତ୍ତେ ଏହାକୁ ତୃତୀୟ ଡୋଜ କହିବାକୁ କହିବାକୁ କହିଛି ମନ୍ତ୍ରାଳୟ ।
ତେବେ ଦକ୍ଷିଣ ଆଫ୍ରିକାରୁ କରୋନା ନୂଆ ଭ୍ୟାରିଆଣ୍ଟ ଓମିକ୍ରନ ଚିହ୍ଟ ପରେ ଏହା ଗୋଟେ ପରେ ଗୋଟେ ଦେଶକୁ ଯେଉଁଭଳି ଡେଇଁବାରେ ଲାଗିଛି ଲୋକଙ୍କ ମଧ୍ୟରେ ପୁଣି ଭୟର ବାତାବରଣ ଖେଳିଯାଇଛି । ଭାରତରେ ମଧ୍ୟ ଓମିକ୍ରନରୁ ବର୍ତ୍ତିବା ପାଇଁ ବିଭିନ୍ନ ସତର୍କତା ମୂଳକ ପଦକ୍ଷେପ ଅବଲମ୍ବନ କରାଯାଇଛି । ବିଦେଶ ଫେରନ୍ତାଙ୍କ ଉପରେ କଡା ନଜର ରଖାଯାଇଛି । ତେବେ ଓମିକ୍ରନ ଦେଶରେ ଆଗକୁ ତୃତୀୟ ଲହର ଆଣିବାର ସମ୍ଭାବନା ଥିବା ବେଳେ ବୁଷ୍ଟର ଡୋଜ ନେଇ ଦାବି ହୋଇଛି।