ସ୍ୱାମୀଙ୍କ ଚିକିତ୍ସା ପାଇଁ ଲୋକଙ୍କଠୁ ପାଇଥିବା ଟଙ୍କାକୁ ସରକାରଙ୍କୁ ଫେରାଇ ଉଦାହରଣ ସୃଷ୍ଟି କଲେ ମୌସୁମୀ । ଆମେ କହୁଛୁ ଭଦ୍ରକ ବାସୁଦେବପୁର ମନ୍ଦାରୀ ଅଞ୍ଚଳର ଅଭିଷେକ ମହାପାତ୍ରଙ୍କ ସ୍ତ୍ରୀ ମୌସୁମୀଙ୍କ କଥା । ଅଭିଷେକଙ୍କ ସ୍ୱାସ୍ଥ୍ୟବସ୍ଥା ଖରାପ ଥିବା ବେଳେ ଇକମୋ ଚିକିତ୍ସା ପାଇଁ ଆର୍ଥିକ ସହାୟତା ପାଇଁ ନିବେଦନ କରିବା ପରେ ଲକ୍ଷ ଲକ୍ଷ ଟଙ୍କାର ସହାୟତା କରିଥିଲେ ଲୋକେ । କିନ୍ତୁ ଲକ୍ଷାଧିକ ଟଙ୍କା ମିଳିବା ପରେ ବି ଅଭିଷେକ ବଞ୍ଚିପାରିନଥିଲେ ।
ଆଉ ଏବେ ସ୍ୱାମୀଙ୍କ ମୃତ୍ୟୁ ପରେ ତାଙ୍କ ପାଖକୁ ଆସିଥିବା ୪୦ ଲକ୍ଷ ଟଙ୍କାକୁ ସରକାରଙ୍କୁ ଫେରାଇ ସମସ୍ତଙ୍କ ପାଇଁ ପ୍ରେରଣା ପାଲଟିଛନ୍ତି ମୌସୁମୀ । ମୌସୁମୀ ୩୦ ଲକ୍ଷ ଟଙ୍କା ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ଦାନ କରିଥିବା ବେଳେ ବାକି ୧୦ ଲକ୍ଷ ଟଙ୍କା ଜିଲ୍ଲା ରେଡକ୍ରସକୁ ପ୍ରଦାନ କରିଛନ୍ତି । ଗତବର୍ଷ ମେ ମାସରେ ବିବାହ କରିଥିଲେ ଅଭିଷେକ ମହାପାତ୍ର । କିନ୍ତୁ ବିବାହର ସପ୍ତାହେ ନପୁରୁଣୁ ସେ କରୋନାରେ ଆକ୍ରାନ୍ତ ହୋଇଥିଲେ ।
ଏହା ପରେ ତାଙ୍କୁ ଭୁବନେଶ୍ୱରର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ଫୁସଫୁସ ସଂକ୍ରମଣ ଯୋଗୁଁ ତାଙ୍କ ଅବସ୍ଥା ଗୁରୁତର ହୋଇପଡିଥିଲା । ଇକମୋ ଚିକିତ୍ସା ଦରକାର ପଡୁଥିବାରୁ ତାଙ୍କର ଏୟାର ଲିଫ୍ଟ କରିବା ପାଇଁ ଅଧିକ ଅର୍ଥ ଆବଶ୍ୟକ ପଡିଥିଲା । ଆଉ ସ୍ୱାମୀଙ୍କୁ ଜୀବନ ବଞ୍ଚାଇବାକୁ ହାତଯୋଡି ଗଣମାଧ୍ୟମ ଆଗରେ ଅଭିଷେକଙ୍କ ଚିକିତ୍ସା ପାଇଁ ଆର୍ଥିକ ସହାୟତା କରିବାକୁ ନିବେଦନ କରିଥିଲେ ମୌସୁମୀ ।ଏହା ପରେ ବିଭିନ୍ନ ଯାଗାରୁ ତାଙ୍କୁ ଆର୍ଥିକ ସହାୟତା କରିବାକୁ ଲୋକ ଆଗକୁ ଆସିଥିଲେ । ଶେଷରେ ଅଭିଷେକଙ୍କ ଚିକିତ୍ସା ପାଇଁ ଟଙ୍କାର ଅଭାବ ତ ପୂରଣ ହୋଇଯାଇଥିଲା କିନ୍ତୁ ଅଭିଷେକ ଆରପାରିକୁ ଚାଲିଯାଇଥିଲେ ।
ସେପ୍ଟେମ୍ବର ୩ରେ ସେ ଆଖିବୁଜିଦେଇଥିଲେ । ସ୍ୱାମୀର ମୃତ୍ୟୁ ପରେ ଭାଙ୍ଗିପଡିଥିଲେ ସ୍ତ୍ରୀ । ସଂସାର ଗଢିବା ଆଗରୁ ତାଙ୍କ ସଂସାର ଭାଙ୍ଗିଯାଇଥିଲା । ସିନ୍ଦୁର ପାଇଁ ଲଢେଇ କରି କରି ଶେଷରେ ସିନ୍ଦୁରକୁ ବଞ୍ଚାଇପାରିନଥିଲେ । ଆଉ ଏବେ ସ୍ୱାମୀଙ୍କ ଚିକିତ୍ସା ପାଇଁ ମିଳିଥିବା ଟଙ୍କାକୁ ସମାଜର କଲ୍ୟାଣ ପାଇଁ ଜିଲ୍ଲାପାଳଙ୍କ ଜରିଆରେ ସେ ୪୦ ଲକ୍ଷ ଟଙ୍କା ପ୍ରଦାନ କରିଛନ୍ତି ।