ଆସନ୍ତା ୨ ମାସ ଭିତରେ ସ୍କୁଲ ଖୋଲ । ୨ ମାସ ଭିତରେ ସ୍କୁଲ ଖୋଲିବାକୁ ରାଜ୍ୟସରକାରଙ୍କୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । କୋଭିଡ କଟକଣା ଭିତରେ କିଭଳି ସ୍କୁଲ ଖୋଲାଯାଇ ପିଲାଙ୍କ ପାଠପଢା ହୋଇପାରିବ ସେ ନେଇ ରାଜ୍ୟ ସରକାର କୋର୍ଟଙ୍କୁ ଜଣାଇବେ । କୋଭିଡ କଟକଣାରେ ସ୍କୁଲ ଖୋଲିବା ନେଇ ହାଇକୋର୍ଟରେ ଆବେଦନ ହୋଇଥିଲା । ଆବେଦନ ଆଧାରରେ ନିଷ୍ପତ୍ତି ନେବାକୁ ରାଜ୍ୟ ସରକାରଙ୍କୁ କୋର୍ଟ ନିର୍ଦ୍ଦେଶ ଦେଇଛନ୍ତି ।
ରାଜ୍ୟରେ ଏବେ କରୋନା ଦୈନିକ ସଂକ୍ରମଣ ଖସିବାରେ ଲାଗିଛି । ଧିରେ ଧିରେ କଟକଣା କୋହଳ କରାଯାଉଛି । ସିନେମା ହଲ, ସପିଂ ମଲ,ବଜାର ଖୋଲିଲାଣି । କିନ୍ତୁ ସ୍କୁଲ ଖୋଲିବା ନିଷ୍ପତ୍ତି ଏଯାଏ ନିଆଯାଇନି । ପ୍ରଥମରୁ ପଞ୍ଚମ ଶ୍ରେଣୀ ପିଲା ଦୁଇ ବର୍ଷ ହେଲା ସ୍କୁଲ ଯାଇନାହାନ୍ତି । ଦୁଇ ବର୍ଷ ହେଲା ପିଲାଙ୍କ ପାଠପଢାରେ ମଧ୍ୟ ଡୋରି ଲାଗିଛି । ଆଗକୁ ମାଟ୍ରିକ ଓ ଯୁକ୍ତ ଦୁଇ ପରୀକ୍ଷା ମଧ୍ୟ ରହିଛି । ହାତରେ କମ ସମୟ ଥିବାରୁ ସିଲାବସ ମଧ୍ୟ ସରିନାହିଁ । ସିଲାବସ ପାଠ କେବେ ସରିବ, ପିଲାମାନେ କିଭଳି ପରୀକ୍ଷା ଦେବେ ସେ ନେଇ ଚିନ୍ତାରେ ଅଭିଭାବକ ଅଛନ୍ତି । ତେଣୁ ତୁରନ୍ତ ସ୍କୁଲ ଖୋଲିବା ନେଇ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ ।