ଭାରତକୁ ମିଳିଛି କରୋନା ବିରୋଧୀ ସିଙ୍ଗଲ ଡୋଜ ଟିକା । ସ୍ପୁଟନିକ ଲାଇଟ ଟିକାକୁ ଜରୁରୀକାଳୀନ ବ୍ୟବହାର ପାଇଁ ଅନୁମିତ ମିଳିଛି । ଡିସିଜିଆଇ ଏହି ଟିକାର ଜରୁରୀକାଳୀନ ବ୍ୟବହାର ପାଇଁ ଅନୁମତି ଦେଇଛି ବୋଲି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ ଟୁଇଟ କରି ସୂଚନା ଦେଇଛନ୍ତି । କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ ଟୁଇଟ କରି କହିଛନ୍ତି, ଏହା ନବମ କରୋନା ବିରୋଧୀ ଟିକା ଭାବେ ଦେଶରେ ବ୍ୟବହାର ପାଇଁ ଡିସିଜିଆଇ ଅନୁମତି ଦେଇଛି । ମହାମାରୀ ବିରୋଧରେ ଦେଶରେ ଚାଲିଥିବା ସାମୂହିକ ଲଢେଇକୁ ଏହା ଆହୁରି ବଳ ଦେବ ।
ଶନିବାର ସବଜେକ୍ଟ ଏକ୍ସପର୍ଟ କମିଟି ଋଷ ନିର୍ମିତ ସ୍ପୁଟନିକ ଲାଇଟର ବ୍ୟବହାର ସପକ୍ଷରେ ମତ ରଖିଥିଲା । ଦେଶରେ ଏହାର ବ୍ୟବହାର ଆରମ୍ଭ କରିବା ପାଇଁ ଅନୁମତି ଦେବାକୁ ଡିସିଜିଆଇ ଆଗରେ ପ୍ରସ୍ତାବ ବି ରଖିଥିଲା । ଏହି ପ୍ରସ୍ତାବକୁ ଗ୍ରହଣ କରି ଡିସିଜିଆଇ ସ୍ପୁଟନିକ ଲାଇଟକୁ ଗ୍ରୀନ ସିଗନାଲ ଦେଇଛି । ଭାରତରେ ଏହାର ୩ଟି ପର୍ଯ୍ୟାୟର ଟ୍ରାଏଲ ହାଇଦ୍ରାବାଦ ସ୍ଥିତ ଡା.ରେଡ୍ଡୀ ଲ୍ୟାବ ନେତୃତ୍ୱରେ କରାଯାଇଥିଲା । ଟ୍ରାଏଲ ବେଳେ ସଫଳତା ମିଳିବାରୁ ଏହି ଟିକାର ବ୍ୟବହାର ପାଇଁ ଅନୁମତି ଦିଆଯାଇଛି ।
ଭାରତରେ ଗତବର୍ଷ ଜୁଲାଇରେ ସ୍ପୁଟନିକ ଲାଇଟର ଜରୁରୀକାଳୀନ ବ୍ୟବହାର ପାଇଁ ସୁପାରିସ କରାଯାଇଥିଲା । କିନ୍ତୁ ଦେଶରେ ଟିକାର ପରୀକ୍ଷା ହୋଇନଥିବାରୁ ଡିସିଜିଆଇ ଏହାକ ଆଗ୍ରହ୍ୟ କରିଦେଇଥିଲା ।ଏବେ ଟ୍ରାଏଲ ପରେ ଟିକାର ବ୍ୟବହାର ପାଇଁ ଅନୁମତି ମିଳିଛି ।