ଆସନ୍ତା ୧୬ ତାରିଖରେ ପ୍ରଥମ ପର୍ଯ୍ୟାୟ ପଞ୍ଚାୟତ ନିର୍ବାଚନ ହେବ । ନିର୍ବାଚନ ପ୍ରସ୍ତୁତି ନେଇ ଆଜି ଜିଲ୍ଲାପାଳଙ୍କ ସହ ରାଜ୍ୟ ନିର୍ବାଚନ କମିସନର ଆଦିତ୍ୟ ପାଢୀ ବୈଠକ କରିଛନ୍ତି । ବୈଠକରେ ଉଭୟ ପୌର ଓ ପଞ୍ଚାୟତ ନିର୍ବାଚନ ନେଇ ଆଲୋଚନା ହୋଇଛି । ନିର୍ବାଚନ କମିସନ କହିଛନ୍ତି, ପ୍ରଚାର ସରିବା ପରେ ରାଜନୈତିକ ଦଳର ବ୍ୟକ୍ତି କିମ୍ବା ଅନ୍ୟ ଅଞ୍ଚଳର ଲୋକ ସମ୍ପୃକ୍ତ ପଞ୍ଚାୟତ କିମ୍ବା ଜିଲ୍ଲା ପରିଷଦ ଜୋନରେ ରହିବେ ନାହିଁ । ପ୍ରଚାର ସରିବା ପରେ ପରେ ଅଞ୍ଚଳ ଛାଡିବେ ବାହାର ଲୋକ ଓ ନେତା । ୧୪ ତାରିଖ ସନ୍ଧ୍ୟା ୬ ସୁଦ୍ଧା ଅଞ୍ଚଳ ଛାଡିବାକୁ ନିର୍ଦ୍ଦେଶ ଦିଆଯାଇଛି । ନିର୍ବାଚନର ୩୬ ଘଣ୍ଟା ପୂର୍ବରୁ ଲାଉଡ ସ୍ୱିକର ବନ୍ଦ କରାଯିବ । ଏବଂ ସେହି ଅଞ୍ଚଳକୁ ଖାଲି କରାଯିବ ।
୧୬ ତାରିଖରେ ହେବାକୁ ଥିବା ପ୍ରଥମ ପର୍ଯ୍ୟାୟ ପଞ୍ଚାୟତ ନିର୍ବାଚନରେ ୩୦ ଜିଲ୍ଲାର ୭୧ ବ୍ଲକ, ୨୦୨ ଜିଲ୍ଲା ପରିଷଦ, ୧୬୬୯ ପଂଚାୟତ ଓ ୨୨ ହଜାର ୩୭୯ ୱାର୍ଡ ପାଇଁ ଭୋଟ ଗ୍ରହଣ ହେବ । ଏହି ପର୍ଯ୍ୟାୟରେ ୬୭.୫୧ ଲକ୍ଷ ଭୋଟର ମତଦାନ କରିବେ । ପୁଲିଂ ଅଧିକାରୀମାନେ ୧୪ ଓ ୧୫ ତାରିଖରେ ମତଦାନ କେନ୍ଦ୍ରରେ ପହଞ୍ଚିବେ। ଷ୍ଟ୍ରଙ୍ଗରୁମରେ ସିସିଟିଭି ଲଗାଯିବ । ସମ୍ବେଦନଶୀଳ ବୁଥ ମାନଙ୍କରେ ଅଧିକ ପୁଲିସ ମୁତୟନ ହେବେ । ସବୁ ବୁଥରେ ଅଧିକ ପୁଲିସ ରହିବେ ଓ ଭିଡିଓଗ୍ରାଫି କରାଯିବ ।