ପଞ୍ଜାୟତ ନିର୍ବାଚନର ଭୋଟ ଗଣତିର ଆଜି ତୃତୀୟ ଦିନ ।ଆଜି ଶେଷ ଦିନରେ ୨୩୦ଟି ଜିଲ୍ଲା ପରିଷଦ ଜୋନରେ ଭୋଟ ଗଣତି ଆରମ୍ଭ ହୋଇଛି । ଆଜି ସାରା ରାଜ୍ୟରେ ଫଳାଫଳ ଆସିବା ପରେ ସ୍ପଷ୍ଟ ହୋଇଯିବ କିଏ କେଉଁଠି ଅଧ୍ୟକ୍ଷ ପଦ ଦଖଲ କରିବ । ପ୍ରଥମ ଦୁଇ ଦିନର ଫଳାଫଳ ଅନୁସାରେ ରାଜ୍ୟରେ ବିଜେଡି ନିଜର ଦବଦବା ଜାହିର କରିଥିବା ବେଳେ ବହୁ ପଛରେ ପଡିଯାଇଛନ୍ତି ବିଜେପି ଓ କଂଗ୍ରେସ । ପ୍ରଥମ ଦିନରେ ୩୧୫ ଜିଲ୍ଲା ପରିଷଦ ଜୋନରେ ଭୋଟ ଗଣତି ହୋଇଥିଲା । ସେଥିରୁ ବିଜେଡି ୨୮୨ ଆସନରେ ବାଜିମାତ କରିଛି । ବିଜେପିକୁ ମିଳିଛି ୧୫ ଆସନ । କଂଗ୍ରେସ ୧୪ ଜିଲ୍ଲା ପରିଷଦ ଜୋନରେ ବିଜୟୀ ହୋଇଛି । ସେହପରି ସ୍ୱାଧୀନକୁ ୨ଟି ଓ ଅନ୍ୟାନ୍ୟ ଦଳ ଦୁଇଟି ଆସନ ଅକ୍ତିଆର କରିଛନ୍ତି ।
ସେହିପରି ଦ୍ୱିତୀୟ ଦିନରେ ୩୦୬ ଜୋନରେ ଭୋଟ ଗଣତି ହୋଇଥିଲା । ଦ୍ୱିତୀୟ ଦିନ ଗଣତିରୁ ଏଯାଏଁ ୨୭୦ଟି ଜିଲ୍ଲା ପରିଷଦ ଜୋନର ଫଳାଫଳ ପ୍ରକାଶ ପାଇଛି । ଏଥିରେ ବିଜେଡି ୨୩୬ଟି ଆସନରେ ବିଜୟୀ ହୋଇଛି । ସେହିପରି ବିଜେପି ୧୬ ଓ କଂଗ୍ରେସ ୧୫ ଆସନ ପାଇଛନ୍ତି । ସ୍ୱାଧୀନ ଓ ଅନ୍ୟ ଦଳଙ୍କ ସପକ୍ଷରେ ଯାଇଛି ୩ଟି ଜୋନ । ଆହୁରି ୩୫ଟି ଜୋନର ଫଳାଫଳ ଆସିନାହିଁ । ଦ୍ୱିତୀୟ ଦିନର ଗଣତି ଆଜି ବି ଜାରି ରହିଛି । ତେବେ ଆଜି ତୃତୀୟ ଦିନ ଅର୍ଥାତ ଶେଷ ଦିନରେ ଭୋଟ ଗଣତି ଚାଲିଥିବା ବେଳେ ମୋଟ ୮୫୧ ଆସନର ଚୂଡାନ୍ତ ଫଳାଫଳ ପ୍ରକାଶ ପାଇବ । ଏହା ପରେ କେଉଁ ଦଳ କେତେ ଆସନ ପାଇଲେ ସ୍ପଷ୍ଟ ହୋଇଯିବ । ତେବେ ଏହି ଦୁଇ ଦିନର ଅର୍ଥାତ ପ୍ରଥମ ଓ ଦ୍ୱିତୀୟ ଦିନର ଫଳାଫଳକୁ ଦେଖିଲେ ବିଜେଡି ଏକ ବୃହତ ବିଜୟ ଆଡକୁ ଯାଉଛି ।